عالامتوردا كەڭىنەن تارالىپ جاتقان بۇل سۋرەت كوپتىڭ اشۋىنا تيگەنى انىق دەپ حابارلايدى «قامشى» پورتالى. ايگەرىم جامبىل قىزى ەسىمدى الماتى قالاسىنىڭ تۇرعىنى ءوزىنىڭ ينستاگرام پاراقشاسىنا جۇرگىزۋشى كۋالىگىن فوتوعا ءتۇسىرىپ، ونىڭ استىنا «بۇگىن ماعان جۇرگىزۋشى كۋالىگىن ساتىپ الىپ بەردى. راقمەت ساعان، اكەشىم» دەپ جازىپ قويعان. 

ياكوۆ فەدوروۆ ەسىمدى فەيسبۋك قولدانۋشىسىنىڭ ويىنشا بۇل بارىپ تۇرعان سوراقىلىق، شەكتەن شىعۋ. ايگەرىمنىڭ فوتوسىن ءوزىنىڭ پاراقشاسىنا سالىپ، دابىل قاققان ياكوۆتىڭ جازباسىنىڭ استىندا پىكىر قالدىرعان وقىرماندار قاراسى كوپ. كوبىسى قىزدىڭ اقىل-ەسىنىڭ دۇرىستىعىنا كۇمان كەلتىرىپ، قايعى-قاسىرەتكە الىپ كەلەتىن جول-كولىك وقيعالاردىڭ دەنى كۋالىك ساتىپ العانداردىڭ كەسىرىنەن بولاتىندىعىن ايتىپ ايگەرىمدى سىناپ-مىنەدى. دەگەنمەن وقىرماندار اراسىندا قىزدى جاقتاعاندار دا تابىلدى. «كۋالىك ونسىز دا ساتىلادى عوي. 2989 تەڭگە تولەيسىڭ الاردا. بۇل فوتونى قانداي ماعىنادا سالعاندارىن بىلمەيسىڭدەر عوي. قىزعا سونشا اتىلعاندارىڭ نە؟» دەيدى جاقتاۋشىسى.

ۇزىنقۇلاققا سەنسەك، ايگەرىمنىڭ اكەسى الماتىداعى №5 اۋرۋحانانىڭ دارىگەرى ەكەن. ايگەرىمنىڭ بۇل فوتونى قانداي ماعىنا، قانداي ماقساتپەن سالعانىن ءبىز دە بىلمەيمىز. الايدا اكەسىنىڭ، اقشانىڭ ارقاسىندا جۇرگىزۋشى كۋالىگىن ساتىپ الىپ، تاجىريبەسىز بولا تۇرا تەمىر تۇلپارعا وتىرىپ، جول ەرەجەسىن بۇزىپ، بىرنەشە ادامنىڭ ولىمىنە سەبەپكەر بولعان ونداي بالالاردى قوعام جاتقا بىلەدى. ايتقىمىز كەلەتىنى، ۇسەنوۆتاردىڭ بارىن بىلە تۇرا بۇل ماسەلەگە الاڭداماۋ مۇمكىن ەمەس.

جازيرا بايدالى