«جەتىم كورسەڭ، جەبەي ءجۇر» دەگەن قازاق اتامىز. بۇل ماقالدىڭ مانىنە جەتە بەرمەيتن ساناسىزداردىڭ بارى كوڭىلىڭدى قىنجىلتادى. قاتال تاعدىرىنا كوندىگە الماي جۇرگەن جەتىمدى باسىنان سيپاۋدىڭ ورنىنا قورلاپ، قۇلدىققا سالىپ قوياتىن ادامدار قانشاما. سونىڭ ءبىر دالەلى اقتوبە قالاسىندا ورىن العان.  

اقتوبەدە اقشاعا الدانىپ، جۇمىسقا جەگىلگەن جەتىم بالا قۇلدىقتا بولعان، دەپ حابارلايدى 31 ارنا.

ايتۋىنشا، ءۇش ايى بويى ونى قوبدا اۋدانىنىڭ تۇرعىنى قورلىقتا ۇستاپ، مال باقتىرعان. ال قاشىپ كەتەتىن بولساڭ ولتىرەمىن دەپ قورقىتتى دەيدى. مال باققان ازامات قوبدا اۋدانىنان اقتوبەگە جاياۋلاتىپ قاشىپتى. ءقازىر 21جاستاعى جىگىت وبلىستىق اۋرۋحانانىڭ گاراجىن پانالاپ ءجۇر.

جاسۇلان ساندىبەكوۆ وسىدان ەكى جىل بۇرىن اقتوبەدەگى "جايسان" جەتىمدەر ۇيىنەن شىققانىن ايتادى. سودان بەرى  جالدانىپ جۇمىس جاساپ، اركىمنىڭ تابالدىرىعىندا ءجۇردىم،- دەيدى. ال سوڭعى قوجايىنى ەركىنەن تىس ۇستاپ، ناعىز قۇلعا اينالدىرعانىن ايتادى. سوزىنشە، اقشا تولەيمىن دەپ قوبدا اۋدانىنا الداپ الىپ كەتىپ، بارعاننان كەيىن  كۇندىز-تۇنى مالدىڭ سوڭىنا سالىپ قويعان.

 ءقازىر قۇلدىقتان قۇتىلعان جاسۇلان اقتوبە وبلىستىق اۋرۋحانانىڭ گاراجىن پانالاپ ءجۇر. جول بويىنان تاۋىپ العان وسى اۋرۋحانانىڭ جۇرگىزۋشىسى ونى ازىرگە گاراجدىڭ ءبىر بولمەسىنە ورنالاستىرىپتى.  قارجاۋ بەدەروۆ جاسۇلاندى ءوز ۇيىنە تىركەۋگە وتىرعىزعانىن جانە وعان ءقازىر جان- جاقتان جۇمىس ىزدەپ جاتقانىن دا ايتادى.

 ال وبلىستىق ىشكى ىستەر دەپارتامەنتىنىڭ ستاتيستيكاسى بويىنشا، وتكەن جىلى  اقتوبە وبلىسىندا وسى قۇلدىققا قاتىستى ەكى جاعداي تىركەلسە، بيىلدىڭ وزىندە  قۇلدىققا جەگىلگەن ەكى ايەل ادام شاعىمدانىپ ۇلگەرگەن. ايتا كەتۋ كەرەك قۇلدىققا جەكتى دەپ شاعىمدانعان ادامداردىڭ بارلىعى دا  اۋىلشارۋاشىلىعىمەن اينالىساتىن شارۋا قوجالىقتارىنىڭ قۇرباندارى ەكەن.