17 ناۋرىز كۇنى م.اۋەزوۆ اتىنداعى قازاق مەملەكەتتىك اكادەميالىق دراما تەاترىندا سوعىس زامانىندا تىلداعى حالىقتىڭ ناۋبەتىن سۋرەتتەيتىن م.وماروۆانىڭ «كومبە ناننىڭ ءدامى» قويىلىمىنىڭ پرەمەراسى ءوتتى.

ەركەك اتاۋلى تۇگەل مايدانعا اتتانعاندا، اۋىلداعى قيامەت-قيىنشىلىق انالارىمىزدىڭ، شال-كەمپىرلەردىڭ، بالا-شاعانىڭ موينىنا ارتىلدى. بىرەۋدىڭ باۋىر ەتى بالاسى كەتسە، بىرەۋدىڭ باۋىرى، بىرەۋدىڭ ءسۇيىپ قوسىلعان جارى، ەندى بىرەۋىنىڭ ءسوز بايلاسقان كۇيەۋ جىگىتى كەتتى. الايدا، ەڭ اۋىر جۇك انالارىمىزعا تيگەن زامان بولدى. سوعىسقا اتتانىپ ءومىر مەن ءولىمنىڭ اراسىندا ارپالىسىپ جۇرگەن بالالارىن ويلاپ قايعىرا ما، الدە قاسىندا قالعان بالاسى اشتىقتان اجال قۇشپاسا ەكەن دەپ قايعىرا ما؟ زارىعا كۇتىپ جۇرگەن بالاسىنىڭ ورنىنا كۇن سايىن ءبىر قارالى قاعاز كەلەدى. ول قارالى قاعاز اناعا بالا بولا ما؟ انا جۇرەگنىدەگى جارانى جەڭىلدەتە مە؟ 

 ونىمەن قوسا، كەڭەس ۇكىمەتىنىڭ ساياساتىنا قايشى بولىپ كورىنگەن ءتۇرلى ۇلتتاردى تۋعان جەرىنەن ايىرىپ، قازاقتىڭ جەرىنە قونىستاندىردى. ءوز جەرىندە جاپا شەگىپ، قان جۇتىپ جاتسا دا، قازاق جۇرتى وزگە ۇلت وكىلدەرىن قۇشاق جايا قارسى الدى. ءوز باۋىرىنداي كوردى، دەمەدى، قولدادى، ءبىر ءۇزىم نانىمەن ءبولىستى.

باستارىنان قانداي قيامەت كەشسە دە، ناعىز شىنايىلىق سول كەزدە بولدى. شىنايى ماحاببات، شىنايى كۇلۋ، شىنايى جىلاۋ. ەڭ باستىسى ۇلتتار اراسىنداعى ناعىز باۋىرماشىلدىقتىڭ شىنايى كورىنىسى.

وسىنداي شىنايىلىقتى سەزىندىرگەن «كومبە ناننىڭ ءدامى» قويىلىمىنىڭ پرەمەراسى ءساتتى شىقتى. قويىلىمنىڭ قويۋشى-رەجيسسەرى قازاقستاننىڭ ەڭبەك سىڭىرگەن قايراتكەرى الما كاكىشيەۆا. ايتا كەتەيىك، دراما «تەاتر كوكتەمى – 2017» فەستيۆالىنە قاتىسادى.

قامشىگەر: گۇلىم جاقان