«باعدارلامانىڭ تەحنيكالىق-كاسىبي بىلىممەن جانە قىسقا مەرزىمدەگى كاسىبي وقۋمەن قامتاماسىز ەتۋ كوزدەلگەن العاشقى باعىتى اياسىندا بيىل تەحنيكالىق ءارى كاسىبي ءبىلىمى بار 21 مىڭ كادر دايارلاۋ جانە دە 70 مىڭ قازاقستاندىقتى قىسقا ارالىقتا كاسىبي وقىتۋ جوسپارلانىپ وتىر، دەپ حابارلايدى قامشى اقپاراتتىق اگەنتتىگى.
بۇل تۋرالى ورتالىق كوممۋنيكاسيالار قىزمەتىندە وتكەن باسپا ءسوز كونفەرەنسياسىندا ق ر ەڭبەك جانە حالىقتى الەۋمەتتىك قورعاۋ ۆيسە-مينيسترى ءبىرجان نۇرىمبەتوۆ ايتتى. ناتيجەلى جۇمىسپەن قامتۋدى جانە جاپپاي كاسىپكەرلىكتى دامىتۋ باعدارلاماسى جىلدىڭ العاشقى جارتىسىنداعى قورىتىندىسى بويىنشا 2017 جىلدىڭ 1 شىلدەسىنەن جۇمىسپەن قامتۋ ورىندارىنا جۇمىسسىز رەتىندە 151،7 مىڭ ادام تىركەلگەن. وڭىرلىك كوميسسيالاردا 360-تان استام ءبىلىم بەرۋ ۇيىمىنىڭ ءتىزىمى بەكىتىلىپ، ولاردا وقىتىلاتىن كاسىپتەر تۇرعىسىندا ورىندار ايقىندالدى. ەسەپتىك كەزەڭدە وقۋعا 921 ادام ءوتىنىش ءبىلدىردى. "وقۋ ساباقتارى بۇگىندە قاجەتتىلىككە يە كاسىپتەر بويىنشا قولعا الىنادى: سلەسارلىك ءىس، ەلەكترمەن جابدىقتاۋ، قوناق ءۇي شارۋاشىلىقتارىنا قىزمەت كورسەتۋدى ۇيىمداستىرۋ، مۇناي-گاز قۇبىرلارى مەن قويمالارىنىڭ قۇرىلىسى مەن قولدانىسى جانە ت.ب. 1 شىلدەدەگى دەرەككە سۇيەنسەك، 21 127 ادام قىسقا مەرزىمدى وقۋعا جىبەرىلىپ ۇلگەردى"، - دەپ ءتۇسىندىردى ءبىرجان نۇرىمبەتوۆ.
بۇگىندە اسپاز، تىگىنشى، ەسەپشى، شاشتاراز، ەلەكتر مونتاجداۋشى، دانەكەرلەۋشى سياقتى ماماندىقتار سۇرانىسقا يە بولىپ وتىر. سونىمەن قاتار، «اتامەكەن» ۇلتتىق كاسىپكەرلەر پالاتاسىمەن بىرلەسە، وڭىرلەردىڭ ماماندارعا زارۋلىگى مەن ماماندانۋ سيپاتىنا بايلانىستى 49 جۇمىس بەرۋشىدەگى وندىرىستە تىكەلەي قىسقا ۋاقىتتا كاسىبي وقىتۋ كارتاسى جاسالعان. جۇمىس ىستەپ تۇرعان كاسىپورىنداردىڭ جانىنان قىزمەت ەتەتىن وقۋ ورتالىقتارىنىڭ تىزبەسى تۇزىلگەن. اتالعان ءىس-قيمىل باعىتىنىڭ ارتىقشىلىعى سول، ءتيىستى كاسىپورىندا بىردەن داعدىلارعا ۇيرەنىپ، ءارى قاراي جۇمىسقا ورنالاسۋعا مۇمكىندىك تۋماق. جالپى، الداعى كەزدە، ورتاق بەلەستى باعىندىرۋعا ات سالىساتىن جۇمىس بەرۋشىلەر سانى وسە تۇسپەك. وقۋعا كەلەسى ماماندىقتار ارقاۋ بولاتىنى كۇتىلۋدە: تىگىنشى، مەكتەپكە دەيىنگى مەكەمەلەردىڭ تاربيەلەۋشىلەرى، داياشى، بارمەن، ەلەكتر مەحانيگى، تەحنيك-مەحانيك، اككۋمۋلياتور مامانى، ەلەكتر مونتاجداۋشى، بەتونداۋشى، دانەكەرلەۋشى، اسپاز، توكار ماماندىقتارىنا قۇجاتتار قابىلدانادى.
