قازاقستان پارلامەنتى سەناتىنىڭ ءتوراعاسى قاسىم-جومارت توقايەۆ چەح پارلامەنتى سەناتىنىڭ ءتوراعاسى ميلان شتەحپەن كەزدەسۋ وتكىزدى دەپ حابارلايدى Qamshy.kz اقپارات اگەنتتىگى ق ر پارلامەنتى سەناتىنىڭ باسپا ءسوز قىزمەتىنە سىلتەمە جاساپ.  

ق.توقايەۆ پراگانىڭ«ەكسپو-2017» وتكىزۋگە قولداۋ بىلدىرگەن شەشىمىن جانە حالىقارالىق كورمەنىڭ اشىلۋىنا پرەزيدەنت ميلوش زەمانننىڭ ءوزى قاتىسقانىن جوعارى باعالادى. 15 شىلدەدە ەكى ەل پارلامەنتتەرى جوعارعى پالاتالارى ءتوراعالارى «ەكسپو-2017» كورمەسىندەگى چەحيانىڭ ۇلتتىق كۇنىنىڭ اشىلۋىندا ءسوز سويلەيتىن بولادى.

ق.توقايەۆ چەحيا قازاقستاننىڭ ەۋروپالىق وداق پەن ورتالىق ەۋروپاداعى ماڭىزدى ارىپتەسى بولىپ تابىلادى دەپ اتاپ ءوتتى. ءبىزدىڭ مەملەكەت باسشىلارىنىڭ، ۇكىمەتتەرىمەن ىسكەر ورتانىڭ اراسىندا سەنىم جانە جان-جاقتى ديالوگ قالىپتاسقان. زاڭ شىعارۋشى ورگاندار اراسىنداعى ىنتىماقتاستىق سەرپىندى سيپاتالدى.

ق.توقايەۆ چەحيا پارلامەنتى العاشقىلاردىڭ ءبىرى بولىپ ەۋروپالىق وداق پەن قازاقستاننىڭ اراسىنداعى كەڭەيتىلگەن سەرىكتەستىك جانە ىنتىماقتاستىق تۋرالى كەلىسىمدى راتيفيكاسيالاعانى ءۇشىن م. شتەحقا العىسىن ءبىلدىردى. قازاقستان پارلامەنتى سەناتىنىڭ ءتوراعاسىنىڭ ايتۋىنشا، بۇل كەلىسىم ءبىزدىڭ ەلىمىزدىڭ ەڭ ءىرى ساۋدا-ەكونوميكالىق جانە ينۆەستيسيالىق ارىپتەسى ەۋروپالىق وداقپەن ىنتىماقتاستىقتى بەلسەندى ەتۋگە مۇمكىندىك بەرەدى.

ق.توقايەۆ بايلانىستاردى ودان ءارى كەڭەيتۋ الەۋەتىن ازيا مەن ەۋروپانى جالعايتىن ءىرى حالىقارالىق كولىك ينفراقۇرىلىمدىق جوبالاردىڭ جۇزەگە اسىرىلۋىمەن بايلانىستىرادى. ەلىمىزدەگى «نۇرلى جول» باعدارلاماسىمەن ۇشتاساتىن قىتايدىڭ«ءبىر – بەلدەۋ، ءبىر – جول» باستاماسى جۇزەگە اسۋىندا قازاقستان ماڭىزدى ءرول اتقارادى.

تاراپتار ساۋدا-ەكونوميكالىق، ينۆەستيسيالىق جانە گۋمانيتارلىق سالالارداعى بايلانىستاردى دامىتۋ كەلەشەگىن تالقىلادى.

م. شتەح قازاقستاندا جۇزەگە اسىرىلىپ جاتقان ساياسي جانە ەكونوميكالىق رەفورمالارعا، مەملەكەتتىك مەكەمەلەردى جەكەشەلەندىرۋ باعدارلامالارىنا قىزىعۋشىلىق تانىتتى. چەحيا سەناتىنىڭ ءتوراعاسى پارلامەنتارالىق ءۇنقاتىسۋدىڭ جوعارى دەڭگەيى ەكى مەملەكەت اراسىنداعى ءداستۇرلى جىلى جانە دوستىق قارىم-قاتىناستاردىڭ ماڭىزدى بولشەگى بولىپ تابىلادى دەپ اتاپ ءوتتى. كەزدەسۋ اياعىندا م. شتەح ءوزىنىڭ قازاقستاندىق ارىپتەسىن چەحياعا رەسمي ساپارمەن كەلۋگە شاقىردى.

شولۋشى: اسەم المۇحانبەت