بۇگىن «ەكسپو-2017» اۋماعىندا يسپانيا كورولدىگىنىڭ ۇلتتىق كۇنى وتۋدە دەپ حابارلايدى Qamshy.kz اقپارات اگەنتتىگى. سالتاناتتى ءىس-شاراعا يسپانيا دەپۋتاتتار كونگرەسىنىڭ ءتورايىمى انا پاستور قاتىستى. ءىس-شارانىڭ رەسمي بولىمىنەن كەيىن يسپاندىقتار قوناقتارعا بەلگىلى «Compañía Flamenca» توبىنىڭ، «Carros de Foc» كوشە تەاترىنىڭ قاتىسۋىمەن وتەتىن قىزىقتى مادەني باعدارلامانى دايىنداپ وتىر، سونداي-اق، «لامانچتىق ايلاكەر يدالگو دون كيحوت» رومانى كوپشىلىك اراسىندا وقىلاتىن بولادى.

 «ءبىز «استانا ەسكپو-2017» حالىقارالىق مامانداندىرىلعان كورمەسىنە قاتىسىپ وتىرعانىمىزعا اسا قۋانىشتىمىز. يسپانيا - جاسىل ەنەرگەتيكانى زەرتتەۋ سالاسىندا كوش باستاپ تۇرعان ەل. ماسەلەن، المەرياداعى PSA كۇن ەلەكترستانسياسى كۇن جىلۋىنىڭ ەنەرگياسىن زەرتتەۋ سالاسىنداعى الەمدىك دەڭگەيدەگى وزىق ورتالىق بولىپ تابىلادى، ال CENER – جەل تۋربينالارىنىڭ بەرىكتىگى مەن ساپاسىنا سىناق جۇرگىزەتىن الەمدەگى تۇڭعىش زەرتحانا. جاڭارتىلمالى ەنەرگيا كوزدەرىن قولدانۋ سالاسىنداعى سوڭعى جەتىستىكتەرىمىز بەن جيناقتاعان تاجىريبەمىزدى ۇلكەن ماقتانىشپەن تانىستىرىپ وتىرمىز»، - دەپ اتاپ ءوتتى انا پاستور.

يسپانيا پاۆيلونى كرەاتيۆتىك ءارى مەتافورالىق ديزاينمەن بەزەندەندىرىلگەن. پاۆيلون ورتاسىندا ءۇش ءۇي ورنالاسقان: «جاڭارتىلمالى ەنەرگيا كوزدەرىنىڭ ۋاقىتى» دەپ اتالاتىن ءبىرىنشى ءۇي كومىرتەكسىزدەندىرۋگە جانە جاسىل ەنەرگەتيكاعا نەگىزدەلگەن جاڭا ەنەرگەتيكالىق ۇلگىگە ءوتۋدىڭ قاجەتتىلىگىن كورسەتەدى.

«ارمانشىلدار، ءىزاشارلار، جاڭاشىلدار» دەپ اتالاتىن ەكىنشى ءۇي جاڭارتىلمالى ەنەرگەتيكا سالاسىندا سوڭعى ونجىلدىقتا يسپانيادا ازىرلەنىپ، ەندىرىلگەن ناقتى جوبالار مەن يننوۆاسيالىق شەشىمدەرگە ارنالعان. بۇل جوبالاردىڭ كوبىسى ەنەرگەتيكانى كومىرتەكسىزدەندىرۋگە باعىتتالعان.

 «يسپانيا: عالامشارعا ارنالعان ەنەرگيا» اتتى ءۇشىنشى ۇيدە وسى ەلدە تابىستى تۇردە ەندىرىلگەن جاڭارتىلمالى تازا ەنەگيانى وندىرۋگە ارنالعان شەشىمدەر مەن قۇرالداردىڭ كەڭ تۇرلەرى جايلى باياندايتىن پانورامالىق بەينەروليكتەردەن تۇراتىن پروەكسيالىق شوۋدى تاماشالاۋعا بولادى. بۇل كومپوزيسيا يسپانيا كومپانيالارىنىڭ جاسامپاز ءارى تەحنولوگيالىق مۇمكىندىكتەرىن، جاسىل ەنەرگەتيكا سالاسىنداعى باي تاجىريبەسىن ايشىقتايدى.

 زال ورتاسىندا جايقالىپ تۇرعان ءتىرى اعاش ادامزات مەكەندەپ جاتقان «جاھاندىق اۋىلدىڭ» نىشانى ىسپەتتەس. ول ادامزاتقا عالامشارمەن ۇندەسە وتىرىپ دامۋعا كومەكتەسەتىن تارازىلانعان ءارى تۇراقتى شەشىمدەردى ىزدەۋدىڭ قاجەتتىلىگىن بايقاتادى. پاۆيلون قۇرىلىسى مەن ديزاينىنا جۇمسالعان جالپى قارجى كولەمى 2 ملن. ەۋرو قۇراعانىن اتاپ ءوتۋ قاجەت.

«كورمە جۇمىسىنىڭ العاشقى ايىندا ءبىزدىڭ پاۆيلونعا 130 مىڭنان اسا ادام كەلىپ ۇلگەردى. بىزدەر ءۇشىن بۇل كورمە - يسپانيانىڭ جەل، فوتوەلەكتر جانە كۇن جىلۋى سىندى جاسىل ەنەرگەتيكاداعى ۇلكەن سۇرانىسقا يە بولىپ وتىرعان ەنەرگيا كوزدەرىن زەرتتەۋ، دامىتۋ جانە ەندىرۋ سالاسىندا كوش باستاي وتىرىپ، جاڭارتىلمالى ەنەرگيا كوزدەرىن دامىتۋدا جەتكەن سوڭعى ونجىلدىقتاعى جەتىستىكتەرىن الەمگە كورسەتۋ ءۇشىن بىردەن-بىر مۇمكىندىك»، - دەيدى پاۆيلون ديرەكتورى كارمەن بۋەنو.

يننوۆاسيالىق جوبالارعا قوسا، يسپانيا كورمەگە كەلۋشىلەرگە ءبىرقاتار مادەني ءىس-شارالاردى ۇسىنىپ وتىر. ماسەلەن، 17 شىلدە كۇنى ۇلتتىق كۇن اياسىندا «لامانچتىق دون كيحوت» رومانىنىڭ ۇزىندىلەرى ورىس تىلىندە كوپشىلىك الدىندا وقىلادى. بۇل شىعارمانى يسپانيا پاۆيلونىندا قىزمەت جاسايتىن قازاقتاندىقتار وقيدى. بۇل قىزىقتى كوستيۋمدى قويىلىم كەزىندە پاۆيلون قىزمەتكەرلەرى كورمە قوناقتارىن مىنبەرگە شاقىرىپ، روماننىڭ ءبىر ءۇزىندىسىن ساحنا تورىندە وقۋدى ۇسىناتىن بولادى.

ۇلتتىق كۇن اياسىندا مۇنداي ءىس-شارانىڭ وتكىزىلەتىنى كەزدەيسوق ەمەس: يسپانيادا جىل سايىن ساياسات، سپورت جانە شوۋ-بيزنەس سالاسىنداعى بەلگىلى قايراتكەرلەردى شاقىرتا وتىرىپ «دون كيحوت» رومانىن وقۋ داستۇرگە اينالعان. وسىلايشا يسپاندىقتار ءوز داستۇرلەرىن قۇرمەتتەپ، ۇلى جازۋشى ميگەل دە سەرۆانتەستىڭ رۋحىن قاستەرلەيدى.

سونداي-اق، 17-21 شىلدە ارالىعىندا كۇندە كەشكە ساعات 19:00-دە «Compañía Flamenca» فلامەنكو سپەكتاكلى وتەتىن بولادى. 17-26 شىلدە ارالىعىندا كۇنىنە بىرنەشە مارتە «Carros de Foc» كوشە تەاترىنىڭ كۇندەلىكتى قويىلىمدارى ۇيىمداستىرىلادى.

تامىز ايىندا پاۆيلون قالا كينوتەاترلارىندا يسپاندىق كينو فەستيۆالىن، سونداي-اق، يسپان ءتىلىن قولداۋعا ارنالعان ءبىرقاتار ءىس-شارالاردى وتكىزۋدى جوسپارلاپ وتىر.