ق ر پرەمەر-مينيسترى باقىتجان ساعىنتايەۆ سولتۇستىك قازاقستان وبلىسىنا جۇمىس ساپارى اياسىندا پەتروپاۆلداعى تۇرعىن ءۇي، الەۋمەتتىك-مادەني جانە سپورت نىساندارىنىڭ، ينفراقۇرىلىم جانە ينجەنەرلىك كوممۋنيكاسيالاردىڭ قۇرىلىس بارىسىمەن تانىستى دەپ حابارلايدى Qamshy.kz اقپارات اگەنتتىگى.

وبلىس اكىمى ق. اقساقالوۆ سپورت سارايىن ارالاۋ كەزىندە ق ر پرەمەر-مينيسترى باقىتجان ساعىنتايەۆقا مەملەكەتتىك-جەكەشەلىك ارىپتەستىك اياسىندا سپورت سارايىنا اكەلەتىن جامبىل كوشەسىن قايتا جوندەۋ جۇمىستارى تۋرالى، ءمجا تەتىكتەرىن قولدانۋ ارقىلى وقۋشىلار سارايى مەن تەننيس ورتالىعىنىڭ قۇرىلىسىن جۇرگىزۋ بارىسى جايىندا باياندادى. 

پەتروپاۆلدا 2017 جىلى بارلىعى 1 000-نان استام پاتەردى وتكىزۋ كوزدەلىپ وتىر. قۇرىلىس سالىناتىن نەگىزگى ورىن رەتىندە «جاس وركەن» شاعىن اۋدانى تاڭدالدى، ول جەردە 500-دەن استام نىسان – ەسكى ۇيلەر مەن وزگە دە قۇرىلىستار جويىلادى. بۇل جەردە ەكى جىلدىڭ ىشىندە 2 500 پاتەرلى 11 كوپ پاتەرلى تۇرعىن ءۇي، وقۋشىلار سارايى مەن تەننيس ورتالىعى تۇرعىزىلادى.

اۋەجاي پەررونىن كەڭەيتۋ، جولدارعا كۇردەلى جوندەۋ جۇمىستارىن جۇرگىزۋ، كوشە شامدارىنىڭ جەلىسىن رەكونسترۋكسيالاۋ بويىنشا كولەمدى جۇمىستار اتقارىلۋى ءتيىس. ەكى جىلدىڭ ىشىندە 28 كوشە مەن 400 اۋلا اۋماعى جوندەلەدى.

بۇدان وزگە، ق ر پرەمەر-مينيسترى باقىتجان ساعىنتايەۆ وبلىس ورتالىعىنداعى الەۋمەتتىك-مادەني نىساندار، مەيمانحانالار مەن ساۋدا ورتالىقتارى بار ويىن-ساۋىق ورتالىقتارى مەن مادەني ساۋىقتىرۋ كەشەندەرىنىڭ قۇرىلىس جوبالارىمەن تانىستى.