ۇكىمەت اتالعان سالانىڭ باسەكەگە قابىلەتتىلىگىن ارتتىرۋعا جاعدايلار جاساپ جاتىر. سوڭعى 5 جىلدا تىكەلەي مەملەكەتتىك قولداۋ كولەمى شامامەن 3 ەسەگە ارتتى، استىق تۇسىمدىلىگى مەن ەڭبەك ونىمدىلىگىن ارتتىرۋدىڭ جۇيەلىك شارالارى قابىلدانۋدا. سۋبسيديالاۋدىڭ جاڭا ۇلگىسىن ەنگىزۋ ناتيجەسىندە ساپالى تۇقىمداردى ەگۋ مەن تىڭايتقىشتاردى قولدانۋ كولەمى 1،5 ەسەگە ءوستى.

«ازىق-تۇلىك كورپوراسياسى» اق ەكسپورتتىق الەۋەتتى ارتتىرۋ ءۇشىن سىرتقى نارىقتاردا وتاندىق اۋىل شارۋاشىلىعى ونىمدەرىن ىلگەرىلەتۋ بويىنشا وپەراتور رەتىندە قايتا قۇرىلدى. مەملەكەت باسشىسىنىڭ ۋاعدالاستىقتىقتارىنىڭ ارقاسىندا شەتەلدىك نارىقتار اشىلۋدا، سونىڭ قاتارىندا قحر، ءباا، يران جانە ت. ب. بار.

اوك سالاسىندا مەملەكەتتىك قىزمەتتەر ۇسىنۋ ۇدەرىستەرى وڭتايلاندىرىلىپ جاتىر، قۇجاتتاردىڭ مەرزىمدەرى مەن تىزىمدەرى قىسقارتىلۋدا، قوسارلانۋشى راسىمدەر جويىلۋدا. بيىل سۋبسيديالاردىڭ ءۇش ءتۇرىن تاعايىنداۋ ۇدەرىستەرىن اۆتوماتتاندىرۋ كوزدەلگەن، كەلەسى جىلى جۇمىس سۋبسيديالاردىڭ قالعان 15 ءتۇرى بويىنشا اياقتالادى.

اوك دامىتۋ مەملەكەتتىك باعدارلاماسىن ءبىرىنشى جارتىجىلدىقتا ىسكە اسىرۋ قورىتىندىسى بويىنشا ق ر پرەمەر-مينيسترىنىڭ ورىنباسارى – اۋىل شارۋاشىلىعى ءمينيسترى ا. مىرزاحمەتوۆ باياندادى. اۋىل شارۋاشىلىعىنىڭ جالپى ءونىم كولەمى وتكەن جىلدىڭ سايكەس كەزەڭىمەن سالىستىرعاندا 3،1%-عا ۇلعايتىلدى. سونىمەن قاتار، مال شارۋاشىلىعى ونىمدەرىنىڭ ءوندىرىسى 3،1%-عا، ەگىنشىلىك شارۋاشىلىعى - 2،2%-عا ۇلعايتىلدى. وسى كەزەڭدە ازىق-تۇلىك ونىمدەرىنىڭ ءوندىرىسى 7،5%-عا ءوستى.

وبلىستا اوك دامىتۋ تۋرالى سقو اكىمى ق. اقساقالوۆ باياندادى. كەڭەستىڭ وزەكتى تاقىرىپتارى بويىنشا «مامبەتوۆ جانە ك» تس باس ديرەكتورى ە. مامبەتوۆ، ق ر ەت وداعىنىڭ ءتوراعاسى م. باقتىبايەۆ، ق ر كارتوپ وسىرۋشىلەر جانە كوكونىس ءوسىرۋشى وداعىنىڭ ءتوراعاسى ق. بيسەتايەۆ، ق ر فەرمەرلەر وداعىنىڭ پرەزيدەنتى ءا. دارىنوۆ، «قازاقستاننىڭ شوشقا ءوسىرۋ شارۋاشىلىقتارى وداعى» قاۋىمداستىعىنىڭ ءتوراعاسى ۆ. ليم، «زەنچەنكو جانە ك» تس ديرەكتورى گ. زەنچەنكو ءسوز سويلەدى.

اۋىل شارۋاشىلىعى تاۋارىن وندىرۋشىلەر يمپورت پەن ەكسپورتتىق ساياسات بويىنشا، مال شارۋاشىلىعىنداعى ۆەتەرينارلىق قاۋىپسىزدىك، ەگىن شارۋاشىلىعىنداعى سۋبسيديالاۋ مەن ساقتاندىرۋ، ديزەلدىك وتىنمەن جانە تىڭايتقىشتارمەن قامتاماسىز ەتۋ تۋرالى ۇسىنىستارىن ەنگىزدى.

ق ر پرەمەر-مينيسترى باقىتجان ساعىنتايەۆ كەڭەس قورىتىندىسىن شىعارا وتىرىپ، ق ر ۇلتتىق ەكونوميكا مينيسترلىگىنە اۋىل شارۋاشىلىعى تاۋارىن وندىرۋشىلەر مەن وتاندىق اۋىل شارۋاشىلىعى تەحنيكاسىن وندىرۋشىلەرگە سالىق سالۋ ماسەلەسىن پىسىقتاۋدى، ق ر اۋىل شارۋاشىلىعى مينيسترلىگىنە سۋبسيديالاۋ تەتىكتەرىن جەتىلدىرە ءتۇسۋ ماسەلەلەرىن باقىلاۋعا الۋدى تاپسىردى. «قازاگرو» حولدينگىنە اگرارشىلار ۇسىنعان ينۆەستيسيالىق جوبالاردى قاراۋ تاپسىرىلدى.