قازاقستان رەسپۋبليكاسىنىڭ مەملەكەتتىك حاتشىسى گۇلشارا ءابدىقالىقوۆا ەلشىلەردەن سەنىم گراموتالارىن قابىلدادى، دەپ حابارلايدى Qamshy.kz اقپارات اگەنتتىگى اقورداعا سىلتەمە جاساپ.

مەملەكەتتىك حاتشىعا ءراسىم بارىسىندا ۋرۋگۆاي شىعىس رەسپۋبليكاسىنىڭ قازاقستانداعى توتەنشە جانە وكىلەتتى ەلشىسى مىندەتىن قوسا اتقارۋشى ەنريكە حۋان دەلگادو حەنتا، كولۋمبيا رەسپۋبليكاسىنىڭ قازاقستانداعى توتەنشە جانە وكىلەتتى ەلشىسى مىندەتىن قوسا اتقارۋشى الفونسو لوپەس كابالەرو، ەريترەيا مەملەكەتىنىڭ قازاقستانداعى توتەنشە جانە وكىلەتتى ەلشىسى مىندەتىن قوسا اتقارۋشى پەتروسا سەگگاي، فيدجي رەسپۋبليكاسىنىڭ قازاقستانداعى توتەنشە جانە وكىلەتتى ەلشىسى مىندەتىن قوسا اتقارۋشى يوانە نايۆالۋرۋان، لاوس حالىق دەموكراتيالىق رەسپۋبليكاسىنىڭ قازاقستانداعى توتەنشە جانە وكىلەتتى ەلشىسى مىندەتىن قوسا اتقارۋشى سيۆيەنگفەتا فەتۆوراساك، چيلي رەسپۋبليكاسىنىڭ قازاقستانداعى توتەنشە جانە وكىلەتتى ەلشىسى مىندەتىن قوسا اتقارۋشى رودريگو حوسە نەتو ماتۋرانا، گۆاتەمالا رەسپۋبليكاسىنىڭ قازاقستانداعى توتەنشە جانە وكىلەتتى ەلشىسى مىندەتىن قوسا اتقارۋشى گيسەلۋ اتاليدا گودينەس ساسو سەنىم گراموتالارىن تاپسىردى.

گۇلشارا ءابدىقالىقوۆا ەلشىلەردى قازاقستانداعى ديپلوماتيالىق ميسسيالارىنىڭ رەسمي تۇردە باستالۋىمەن قۇتتىقتاپ، ولاردىڭ قىزمەتى ەلدەرىمىز اراسىنداعى ىنتىماقتاستىقتىڭ الەۋەتىن ارتتىرۋعا ىقپال ەتەتىنىنە سەنىم ءبىلدىردى.

مەملەكەتتىك حاتشى ۋرۋگۆاي شىعىس رەسپۋبليكاسىنىڭ ەلشىسىمەن كەزدەسۋدە ۋرۋگۆاي قازاقستاننىڭ لاتىن امەريكاداعى پەرسپەكتيۆالى سەرىكتەستەرىنىڭ ءبىرى بولىپ سانالاتىنىن ايتىپ، بۇۇ قاۋىپسىزدىك كەڭەسىنىڭ 2017-2018 جىلدارداعى تۇراقتى ەمەس مۇشەسىن سايلاۋ بارىسىندا ەلىمىزگە قولداۋ كورسەتكەنى ءۇشىن ريزاشىلىق ءبىلدىردى.

– ساۋدا-ەكونوميكالىق ىنتىماقتاستىق ەكىجاقتى ءوزارا ءىس-قيمىلدىڭ قوزعاۋشى كۇشى بولۋعا ءتيىس. وسىعان بايلانىستى، تاۋار اينالىمىن ارتتىرۋ جانە ءوزارا ينۆەستيسيا قۇيۋ ىسىنە نازار اۋدارا وتىرىپ، ىسكەرلىك بايلانىستارىمىزدى جانداندىرۋ قاجەت، – دەدى گۇلشارا ءابدىقالىقوۆا كولۋمبيا رەسپۋبليكاسىنىڭ ەلشىسىمەن كەزدەسۋدە.

مەملەكەتتىك حاتشى ەريترەيا مەملەكەتىنىڭ ەلشىسىمەن كەزدەسۋ بارىسىندا قازاقستان بۇۇ قاۋىپسىزدىك كەڭەسىنىڭ تۇراقتى ەمەس مۇشەسى رەتىندە وزىنە سومالي مەن ەريترەيا جونىندەگى سانكسيا كوميتەتى ءتوراعاسىنىڭ مىندەتتەمەلەرىن الىپ، افريكا ءمۇيىسى وڭىرىندە جانە جالپى وسى قۇرلىقتا بەيبىتشىلىكتىڭ، تۇراقتىلىقتىڭ جانە قاۋىپسىزدىكتىڭ ورناۋىنا ىقپال ەتۋگە ۇمتىلاتىنىن اتاپ ءوتتى.

گۇلشارا ءابدىقالىقوۆا فيدجي رەسپۋبليكاسىنىڭ ەلشىسىمەن اڭگىمەلەسۋدە تۋريزم سالاسى ىنتىماقتاستىقتىڭ پەرسپەكتيۆالى باعىتتاردىڭ ءبىرى بولىپ سانالاتىنىنا نازار اۋداردى. ەكى ەلدىڭ تۋريستىك ۆەدومستۆولارى مەن كومپانيالارى اراسىنداعى تىكەلەي بايلانىستاردى ورناتۋ بۇل سالاداعى ءوزارا ءىس-قيمىلدى دامىتۋعا سەرپىن بەرەدى.

مەملەكەتتىك حاتشى لاوس حالىق دەموكراتيالىق رەسپۋبليكاسىنىڭ ەلشىسىمەن كەزدەسۋدە قازاقستاننىڭ سىرتقى ساياساتىندا وڭتۇستىك-شىعىس ازيا ەلدەرىمەن ەكونوميكالىق ىنتىماقتاستىقتى جانداندىرۋدىڭ زور ماڭىزعا يە ەكەنىن اتاپ ءوتتى. ەلىمىز وڭتۇستىك-شىعىس ازيا مەملەكەتتەرى قاۋىمداستىعى (اسەان) قىزمەتىنىڭ تەتىكتەرى مەن تاجىريبەسىن قولدانۋعا نيەتتى.

– قازاقستاننىڭ ەكونوميكالىق ىنتىماقتاستىق جانە دامۋ ۇيىمىنا (ەىدۇ) مۇشە بولۋىنا قولداۋ كورسەتكەنى ءۇشىن چيلي ۇكىمەتىنە ريزاشىلىق بىلدىرەمىز، – دەدى مەملەكەتتىك حاتشى چيلي رەسپۋبليكاسىنىڭ ەلشىسىمەن كەزدەسۋ بارىسىندا.

گۆاتەمالا رەسپۋبليكاسىنىڭ ەلشىسىمەن كەزدەسۋ بارىسىندا گۇلشارا ءابدىقالىقوۆا: «ينفراقۇرىلىم، قارجى، قىزمەت كورسەتۋ، كولىك، اۋىل شارۋاشىلىعى، جەڭىل جانە ازىق-تۇلىك ونەركاسىبى، تۋريزم سالالارىنداعى بىرلەسكەن جوبالاردى ىسكە اسىرۋ ىنتىماقتاستىقتىڭ ماڭىزدى باعىتى بولۋى مۇمكىن»، – دەپ اتاپ ءوتتى.

سونداي-اق، مەملەكەتتىك حاتشى بارلىق ەلدىڭ وكىلدەرىن كورمە اياقتالعاننان كەيىن ەكسپو اۋماعىندا «استانا» حالىقارالىق قارجى ورتالىعى، بۇۇ قولداۋىمەن «جاسىل» تەحنولوگيالاردى جانە ينۆەستيسيالىق جوبالاردى دامىتۋ جونىندەگى حالىقارالىق ورتالىق، IT-ستارتاپتار حالىقارالىق تەحنوپارك سياقتى ىسكە اسىرىلاتىن جوبالارعا قاتىسۋعا شاقىردى.

گۇلشارا ءابدىقالىقوۆا ەلشىلەرگە ساتتىلىك تىلەپ، ەلدەرىمىز اراسىنداعى ديالوگتىڭ ءساتتى داميتىنىنا سەنىم ءبىلدىردى.