2017 جىلعى 11 تامىزدا ساع. 19.00-دە «قازاقستان» ورتالىق كونسەرت زالىندا قازاقستان رەسپۋبليكاسى مادەنيەت جانە سپورت مينيسترلىگىنىڭ، استانا قالاسى اكىمدىگى مەن ەرمەك سەركەبايەۆ اتىنداعى مادەنيەتتى جانە ونەردى قولداۋ قورىنىڭ قولداۋىمەن ەكسپو-2017 حالىقارالىق مامانداندىرىلعان كورمەسىنىڭ اياسىندا «ەرمەك سەركەبايەۆقا ارنالادى» اتتى الەمدىك وپەرا جۇلدىزدارىنىڭ گالا-كونسەرتى وتەدى دەپ حابارلايدى Qamshy.kz اقپارات اگەنتتىگى.

گالا-كونسەرت اتاقتى قازاقستاندىق ءانشى، كسرو حالىق ءارتيسى، كسرو جانە قازكسر مەملەكەتتىك سىيلىقتارىنىڭ يەگەرى، سوسياليستىك ەڭبەك ەرى ەرمەك سەركەبايەۆتى ەسكە الۋ ماقساتىندا ۇيىمداستىرىلىپ وتىر.

قۇرامى بويىنشا ايرىقشا بولىپ تابىلاتىن بۇل كونسەرتكە الەمگە تانىمال انشىلەر ونەر كورسەتەدى، ونىڭ ىشىندە الەمنىڭ ۇزدىك باس داۋىس يەسى، گرەممي سىيلىعىنىڭ ەكى دۇركىن يەگەرى، مەتروپوليتەن-وپەرا (نيۋ-يورك)، ماريين تەاترى مەن پاريج وپەراسىنىڭ ءسوليسى يلدار ابدرازاكوۆ، ماريين تەاترىنىڭ ءسوليسى، Opera Awards (لوندون ق.) سىيلىعىنىڭ لاۋرەاتى اسميك گريگوريان، ۇلكەن تەاتردىڭ جەتەكشى ءسوليسى، پلاسيدو دومينگونىڭ «وپەراليا - 2016» كونكۋرسىنىڭ جەڭىمپازى بوگدان ۆولكوۆ، ۇلكەن تەاتردىڭ جەتەكشى ءسوليسى يگور گولوۆاتەنكو، ماريين تەاترىنىڭ ءسوليسى سەرگەي سكوروحودوۆ، ماسكەۋلىك «نوۆايا وپەرا»  تەاترىنىڭ ءسوليسى الەكسەي تاتارينسيەۆ، ۇلكەن تەاتردىڭ ءسوليسى  اگۋندا كۋلايەۆا، «استانا وپەرا» تەاترىنىڭ جەتەكشى سوليستەرى، قازاقستان رەسپۋبليكاسىنىڭ ەڭبەك سىڭىرگەن قايراتكەرلەرى سۇندەت بايعوجين، سالتانات احمەتوۆا، استانا قالاسى مەملەكەتتىك اكادەميالىق فيلارمونياسىنىڭ ءسوليسى ازامات جىلتىركوزوۆ.

ەرمەك سەركەبايەۆتى ەسكە الۋ كەشىندە الەمدىك وپەرا كلاسسيكاسىنىڭ جاۋھارلارى، دج. روسسيني، دج. ۆەردي، ش.گۋنو، ا.پ. بورودين، ك. سەن-سانس، ج. بيزە، پ.ي. چايكوۆسكيي، ا. دۆورجاك، گ. دونيسەتتي، دج. پۋچچيني، ا.ق. جۇبانوۆ، ل. حاميدي وپەرالارىنان اريالار شىرقالاتىن بولادى.

كونسەرتكە رەسەيدىڭ ەڭبەك سىڭىرگەن ءارتيسى، تاتارستاننىڭ حالىق ءارتيسى رەنات سالاۆاتوۆتىڭ جەتەكشىلىگىمەن «استانا وپەرا» تەاترىنىڭ سيمفونيالىق وركەسترى قاتىسادى. كەشتىڭ قويۋشى رەجيسسەرى، الەمدىك وپەرا، تەاتر جانە كونسەرتتىك شوۋلاردىڭ ۇزدىك جانە جارقىن رەجيسسەرلارىنىڭ ءبىرى  ۆاسيليي بارحاتوۆ بولماق. ارنايى وسى كونسەرت ءۇشىن ايرىقشا دەكوراسيالار مەن بەينەكونتەنت قۇرىلدى.