ۇلتتىق ەكونوميكا مينيسترلىگىندە «2025 جىلداعى مەن جانە مەنىڭ قازاقستانىم» تاقىرىبىنداعى 5-9 سىنىپ وقۋشىلارى اراسىنداعى جالپىرەسپۋبليكالىق ەسسە-شىعارما جازۋدان جەڭىمپازدار ماراپاتتالدى، دەپ حابارلايدى Qamshy.kz اقپارات اگەنتتىگى. ق ر ۇلتتىق ەكونوميكا ءمينيسترى تيمۋر سۇلەيمەنوۆ ايتىپ وتكەندەي، شىعارمالاردىڭ قىزىقتى ۇزىندىلەرى 2025 جىلعا دەيىنگى قازاقستان دامۋىنىڭ ستراتەگيالىق جوسپارىندا جاريالانادى.
كونكۋرسقا ەلدىڭ بارلىق وڭىرلەرىنەن قازاق، اعىلشىن جانە ورىس تىلىندە جازىلعان 100 ەسسە كەلىپ ءتۇستى. ناتيجەسىندە 27 وزىق جۇمىس ىرىكتەلىپ الىندى. سونىمەن بىرگە مەكتەپ وقۋشىلارى جۇلدەلى ورىندارعا يە بولىپ، ۇلتتىق ەكونوميكا مينيسترلىگىنىڭ باسشىلىعىنان العىس حاتتار مەن «ەكسپو-2017» حالىقارالىق كورمەسىن ارالاۋعا بيلەتتەر الدى جانە ديۋ سولەي سيركى كورىنىسىن تاماشالايدى. قالعان 17 فينالعا قاتىسۋشى ەستەلىك گراموتالارعا يە بولدى.
«نەعۇرلىم قىزىقتى شىعارمالاردان ۇزىندىلەر قازاقستاننىڭ 2025 جىلعا دەيىنگى ستراتەگيالىق دامۋ جوسپارىندا جاريالانادى. قازىرگى ۋاقىتتا ساراپشىلىق جانە بيزنەس-قوعامداستىعى وكىلدەرىن تارتۋ ارقىلى اتالعان قۇجاتتى ازىرلەۋ جۇرگىزىلىپ جاتىر»، - دەدى مينيستر.
جەڭىمپازداردىڭ ءبىرى ەلوردالىق №82 «دارىن» ليسەيىنىڭ 9-سىنىپ وقۋشىسى دانا وسپانوۆا ەسسەنى قالاي جازعاندىعى تۋرالى ايتىپ، بولاشاقتا نە مازالايتىنىن باياندادى.
« مەن «مەن جانە مەنىڭ قازاقستانىم 2025 جىلى» تاقىرىبىندا ەسسە جازدىم. ءوز شىعارمامدا مەن قازاقستان تۋرالى كوزقاراسىمدى، ويىمدى ءبىلدىردىم. ونى جازباس بۇرىن وتباسىممەن اقىلداسىپ، ەكولوگيا، مەديسينا، ءبىلىم بەرۋ سىندى سالالاردى تالقىلادىق. بىزدە ءوز جوسپارلارىمىزدى جۇزەگە اسىرۋدىڭ مۇمكىندىگى مول. ماسەلەن، ەكولوگيانى الاتىن بولساق، كۇن، جەل جانە ۇلى دالا بار، ءبىز كۇن ەنەرگياسىن، جەل ەنەرگياسىن قولدانا الامىز»، - دەدى د.وسپانوۆا.
مەكتەپ وقۋشىلارىنىڭ ەسسە كونكۋرسى 2 كەزەڭ بويىنشا وتكىزىلدى: وڭىرلىك جانە رەسپۋبليكالىق. ەكىنشى كەزەڭگە وتكەن جۇمىستاردى ارنايى كوميسسيا لوگيكالىق جانە كوركەمدىك پايىمداۋى، باعالاۋ جانە تۇجىرىمىنىڭ دايەكتىلىگى، يدەيالارى مەن ويىن جەتكىزۋدىڭ سونىلىعى، سەزىمدىلىگى مەن شىنايىلىعى، دالەلدىلىگى مەن مازمۇندىلىعى سەكىلدى ولشەمدەر بويىنشا باعالادى. فينالعا شىققان وقۋشىلار ءوز جۇمىستارىندا تاريحي دالەلدەرگە جانە جەكە دۇنيەتانىمىنا سۇيەنە وتىرىپ، ەل دامۋىن وزىنشە پايىمداۋلارىمەن ءبولىستى.
