ورتالىق كوممۋنيكاسيالار قىزمەتىندە مەملەكەتتىك ءبىلىم گرانتتارىن بەرۋ جونىندەگى رەسپۋبليكالىق كوميسسيا مۇشەلەرى، ق ر ءبىلىم جانە عىلىم مينيسترلىگى مەن اتا-انالار وكىلدەرىنىڭ قاتىسۋىمەن باسپا ءسوز ماسليحاتى بولىپ ءوتتى دەپ حابارلايدى Qamshy.kz اقپارات اگەنتتىگى.

ق ر بعم جوعارى جانە جوعارى وقۋ ورنىنان كەيىنگى ءبىلىم دەپارتامەنتىنىڭ ديرەكتورى گۇلزات كوبەنوۆا مەملەكەتتىك ءبىلىم گرانتتارى يەگەرلەرىنىڭ ءتىزىمى «ەگەمەن قازاقستان» جانە «كازاحستانسكايا پراۆدا» گازەتتەرىندە جاريالانعانى تۋرالى مالىمدەدى.  

«بيىلعى ءبىلىم گرانتتارى تالاپكەرلەردىڭ تاڭداعان ماماندىقتارىنا قويىلعان تالاپتارعا سايكەس تاپسىرعان تەستىلەۋ بارىسىندا العان باللدارى بويىنشا، سونداي-اق زاڭنامادا بەكىتىلىپ، جەڭىلدىك بەرەتىن اۋىل كۆوتالارى مەن باسقا دا كاتەگوريالار بويىنشا ءبولىندى. گرانت يەگەرلەرىنىڭ تولىقتىرىلعان ءتىزىمى «التىن بەلگى» يەگەرلەرىنە بەرىلەتىن باسىمدىق فاكتورىن ەسكەرۋسىز جاسالدى.

13 تامىزدا وتكەن مەملەكەتتىك ءبىلىم گرانتتارىن بەرۋ جونىندەگى رەسپۋبليكالىق كوميسسيانىڭ وتىرىسىنا «اتامەكەن» ۇكپ، ءبىلىم سالاسى قىزمەتكەرلەرىنىڭ كاسىپوداقتارىنىڭ، جوو اسسوسياسياسىنىڭ، سونداي-اق اتا-انالار قاۋىمىنىڭ وكىلدەرى قاتىستى. ۇلتتىق تەستىلەۋ ورتالىعىندا اتا-انالار وكىلدەرى گرانتتاردى بولەتىن اۆتوماتتاندىرىلعان جۇيە جۇمىسىمەن تانىستىرىلدى. ولار گرانتتاردى ءبولۋ پروسەسىنىڭ اشىقتىعىنا جانە وندا ادامي فاكتوردىڭ جوقتىعىنا كوزدەرىن جەتكىزدى.

الايدا، قولدانىستاعى زاڭ تالاپتارىنا سايكەس، «التىن بەلگى» يەگەرلەرىنە ءبىلىم گرانتتارى تيەسىلى بولعاندىقتان، رەسپۋبليكالىق كوميسسيا بۇل ساناتتاعى تالاپكەرلەردى گرانتتارمەن ۋنيۆەرسيتەتتەردىڭ، سونداي-اق ءبىلىم جانە عىلىم مينيسترلىگى مەن دەنساۋلىق ساقتاۋ مينيسترلىگى قاراجاتتارى ەسەبىنەن قامتاماسىز ەتىلەتىندىكتەرى جونىندەگى شەشىمگە كەلدى (بولەك تىزىممەن گازەتتەردىڭ سوڭىندا جاريالانىپ وتىر). ناتيجەسىندە گرانتتار ءتىزىمى 3،5% نەمەسە 1487 گرانتقا ۇلعايتىلىپ وتىر.  بۇل – «التىن بەلگى» يەگەرلەرىنىڭ ءبىلىم دەڭگەيىنىڭ نەگىزىنەن جوعارى ەكەندىگىنىڭ تاعى ءبىر كورسەتكىشى. الايدا «التىن بەلگى» يەگەرلەرى گرانتسىز قالدىرىلمايدى.

سونىمەن قاتار بعم زاڭنامانى جەتىلدىرۋ جۇمىستارىن جالعاستىرادى.  ءبىز الداعى جىلداردا ءبىلىم گرانتتارىنىڭ تەك تەستىلەۋ ناتيجەلەرى مەن  زاڭنىڭ اۋىل كۆوتالارى بويىنشا، جەتىم بالالارعا، مۇگەدەكتەرگە جانە باسقا دا جەڭىلدىك بەرىلەتىن ساناتتاعىلارعا بولىنەدى دەپ ۇمىتتەنەمىز.

مينيسترلىك الداعى اپتادان باستاپ «التىن بەلگى» يەلەنىپ، ۇبت بارىسىندا تومەن ناتيجە كورسەتكەن مەكتەپتەردە تەكسەرۋ جۇمىستارىن جۇرگىزە باستايدى. بۇل تەكسەرىستەردىڭ ناتيجەسى تۇلەكتەرگە اسەرى بولمايدى. الايدا بەلگىنى تاعايىنداۋ بارىسىندا قۇجاتتاردى بۇرمالاۋ فاكتىلەرى انىقتالعان جاعدايدا مەكتەپ باسشىلىعىنا قاتاڭ شارالار قولدانىلادى. 

مەملەكەتتىك گرانتتاردى بەرۋ بويىنشا سۇراق تۋىنداعان جاعدايدا ۇلتتىق تەستىلەۋ ورتالىعىندا جۇمىس جاساپ جاتقان قوعامدىق قابىلداۋ جانە «قاۋىرت جەلى» ارقىلى جاۋاپ الۋعا بولادى. تولىق اقپارات ۇلتتىق تەستىلەۋ ورتالىعىنىڭ سايتىندا www.testcenter.kz» دەپ مالىمدەدى گ. كوبەنوۆا.