22  تامىزدا وزبەكستان رەسپۋبليكاسىنىڭ جوعارعى سوتىنىڭ ءتوراعاسى كوزيمدجان كاميلوۆ باستاعان سۋديالار دەلەگاسياسى شىمكەنت قالاسىنا رەسمي ساپارمەن كەلدى، دەپ حابارلايدى Qamshy.kz اقپارات اگەنتتىگى ق ر جوعارعى سوتىنىڭ باسپا ءسوز قىزمەتىنە سىلتەمە جاساپ.

ءىس-ساپار شەڭبەرىندە ءوڭىردىڭ ماماندىرىلعان سوتتارىنىڭ قىزمەتىمەن تانىستىرۋ وتكىزىلدى. شەتەلدىك دەلەگاسياعا ەلدەگى سوت جۇيەسىنىڭ اقپاراتتىق كوممۋنيكاسيالىق تەحنولوگيالارىنىڭ جۇمىسى ۇسىنىلدى.

وڭتۇستىك قازاقستان وبلىستىق سوتىنىنىڭ عيماراتىندا قازاقستان رەسپۋبليكاسىنىڭ جوعارعى سوت ورگانىنىڭ باسشىسىمەن كەزدەسۋى ءوتتى. اڭگىمە باسىندا ق.ءمامي ك.كاميلوۆتى وزبەكستان رەسپۋبليكاسى جوعارعى سوتىنىڭ ءتوراعاسى لاۋازىما تاعايىندالۋىمەن قۇتتىقتادى. «ءبىزدىڭ العاشقى كەزدەسۋىمىز شىمكەنت قالاسىندا وتۋدە، بۇل ءبىز ءۇشىن، كورشى جانە تۋىسقاندىق ەلدەر ءۇشىن وتە قاسيەتتى»، – دەدى ق.ءمامي.

ودان ءارى وزبەكستان تارابى رەسپۋبليكا سوت جۇيەسىنىڭ جۇمىسىمەن جانە ەلباسى باستاماشىلىق ەتكەن ۇلت جوسپارىنىڭ شەڭبەرىندەگى سوت رەفورماسىنىڭ نەگىزگى جەتىستىكتەرىمەن تانىستىرىلدى. ەنگىزىلگەن جاڭاشىلدىقتاردىڭ پراكتيكالىق ناتيجەلەرىنە ەرەكشە كوڭىل ءبولىندى. وسىلاي سوت ساتىلارىن وڭتايلاندىرۋ ناتيجەسىندە سوت داۋلارىن قاراۋدىڭ ەڭ ۇزاق مەرزىمى ەكى ەسەگە قىسقارتىلدى. بۇگىنگى تاڭدا ازاماتتىق ىستەردىڭ كوپشىلىگى تاراپتاردى سوتقا شاقىرۋىنسىز جەڭىلدەتىلگەن ءوندىرىس تارتىبىمەن قاراستىرىلادى. ەلدەگى قىلمىستىق ىستەردىڭ تورتتەن ءبىر بولىگى 10 تاۋلىك مەرزىمگە دەيىن جەڭىلدەتىلگەن پروسەدۋرا بويىنشا قاراستىرىلادى.

سونىمەن قاتار، ق.ءمامي بىتىمگەرلىك پروسەدۋرالاردى جانە مەدياسيانى ەنگىزۋدىڭ قازاقستاندىق تاجىريبەسىنە، حالىقارالىق كەڭەستىڭ قىزمەتىنە توقتالىپ ءوتتى. ەلەكتروندىق سوت تورەلىگىن جۇزەگە اسىرۋعا ەرەكشە كوڭىل ءبولىندى. سونداي-اق، سوت ءبىلىمىن الۋ جانە رەسپۋبليكانىڭ جوعارعى سوتى جانىنداعى سوت تورەلىگى اكادەمياسىنىڭ قىزمەتىنە كوڭىل ءبولىندى.

كەزدەسۋ بارىسىندا وزبەكستاندىق تاراپ سوتتاردى رەفورمالاۋ جانە ەلەكتروندىق تەحنولوگيالاردى ەنگىزۋ بويىنشا قازاقستاندىق اتقارىلعان جۇمىستارعا قىزىعۋشىلىقتارىن تانىتتى.

كەزدەسۋ سوڭىندا قازاقستاننىڭ جوعارعى سوت ءتوراعاسى وتكىزىلگەن كەزدەسۋ ءۇشىن العىسىن ءبىلدىرىپ، ونىڭ ماڭىزدىلىعىن اتاپ، تاشكەنت قالاسىندا وتەتىن شىۇ مۇشە ەلدەرىنىڭ جوعارعى سوت ءتوراعالارىنىڭ كەزەكتى كەڭەسىنىڭ بارىسىندا ەكى ەلدىڭ جوعارعى سوتتارى اراسىنداعى ىنتىماقتاستىق تۋرالى مەموراندۋمعا قول قويۋ بويىنشا ۇسىنىس ءبىلدىردى. اتالمىش قۇجات قازاقستان مەن وزبەكستان سوت ورگاندارىنىڭ قارىم-قاتىناسىنىڭ باستى باعىتتارى مەن فورمالارىن بەلگىلەيدى.

كەزدەسۋ اياقتالعاننان كەيىن شەتەلدىك دەلەگاسيا ق.ءماميدىڭ توراعالىعىمەن وتكەن وڭىرلەردىڭ قوسىلۋىمەن بەينە-كونفەرەنسياعا قاتىستى. تاقىرىبى: «ەلەكتروندىق سوت تورەلىگىنىڭ وزەكتى ماسەلەلەرى». بكب شەڭبەرىندە جامبىل وبلىسىنداعى «ەلەكتروندىق قىلمىستىق ءىس» پيلوتتىق جوباسىن وتكىزۋ ماسەلەسى، باتىس قازاقستان وبلىسىنداعى بۇيرىقتىق وندىرىستەگى ىستەردى ەلەكتروندىق تۇردە قاراستىرۋ پراكتيكاسى، سونداي-اق، باسقا دا ءبىرقاراتار پيلوتتىق جوبالار تالقىلاندى. سونىمەن قاتار، ەنگىزۋلەردى قورىتىندىلاپ، «تالداۋ» فورۋمىن ودان ءارى دامىتۋ بويىنشا، اۋديوبەينەجازبالار جۇيەسىن قولدانۋ، ونىڭ ىشىندە ق ر ءىىم قىلمىستىق-اتقارۋ كوميتەتىنىڭ ۇيىمدارىمەن بەينەكونفەرەنسيا بايلانىسىن قولدانۋ بويىنشا تاپسىرمالار بەرىلدى. «تورەلىك» اۆتوماتتاندىرىلعان اقپاراتتىق-ساراپتامالىق جۇيەسىن ءارى قاراي دامىتۋعا ەرەكشە كوڭىل ءبولىندى.

بكب اياقتالىسىمەن جوعارعى سوت ءتوراعاسى جاقىن ارادا 2018-2021 جىلدارعا ارنالعان قازاقستان رەسپۋبليكاسى سوت جۇيەسىنىڭ اقپاراتتىق-كوممۋنيكاسيالىق تەحنولوگيالارىنىڭ ستراتەگياسى قابىلداناتىنىن اتاپ ءوتتى. اتالمىش ستراتەگيادا ەلەكتروندىق سوت ءىسىن جۇرگىزۋ بويىنشا الداعى جوبالار كىرەتىن بولادى.