رەسەيدەگى كەيبىر جوعارى لاۋازىمدى مەملەكەتتىك قىزمەتكەرلەردىڭ ايەلدەرىنىڭ ايلىعى كۇيەۋلەرىنەن بىرنەشە ەسەگە ارتىق. بۇل تۋرالى رەسەيلىك "Forbes Woman" باسىلىمى مالىمدەدى دەپ حابارلايدى Qamshy.kz اقپارات اگەنتتىگى.

2016 جىلعى كورسەتكىش بويىنشا رەسەيلىك شەنەۋنىكتەردىڭ ەڭ باي ايەلدەرىنىڭ العاشقى بەستىگىنە تاتارستان پرەزيدەنتىنىڭ جارى گۇلسينا ميننيحانوۆا، بريانسك وبلىسى گۋبەرناتورىنىڭ ايەلى ولگا بوگوماز، «روستەح» باسشىسى سەرگەي چەمەزوۆتىڭ ايەلى ەكاتەرينا يگناتوۆا كىرگەن.

تاتارستان پرەزيدەنتى جارىنىڭ تابىسى 2 ميلليارد ءرۋبلدى ($33 ملن.) قۇرادى. Forbes مالىمەتىنشە، ميننيحانوۆا –  قازان كرەملىنىڭ ماڭايىندا ورنالاسقان سپا-كەشەن، قوناق ءۇي، مەيرامحانا، فيتنەس-كلۋب سىندى دەمالاتىن ورىندار كىرەتىن كومپانيا يەلەرىنىڭ ءبىرى. ال كۇيەۋىنىڭ، ياعني تاتارستان پرەزيدەنتىنىڭ تابىسى 7،5 ملن. رۋبل ($126 مىڭ)  عانا.

ەڭ جوعارعى كورسەتكىشتە ەكىنشى بولىپ تۇرعان ۋلان-ۋدە قالاسىنىڭ دەپۋتاتى ۆاديم برەدنيندىڭ جارى – رايسا. ول – كۇيەۋى باسشىلىق ەتىپ وتىرعان «تيتان» كومپانياسىنىڭ باسقارۋشى ديرەكتورى. «تيتان» كومپانياسىنىڭ قۇرامىنا 40-قا جۋىق ازىق-تۇلىك دۇكەنى، ەت وڭدەۋ زاۋىتى، بالىق زاۋىتى، كونديتەرلىك سەحى، مەيرامحانا جانە فيتنەس-ورتالىق كىرەدى. رايسا برەدنيدىڭ تابىسى جىلىنا $2 ميللياردتى قۇراعان. كۇيەۋىنەن ەكى ەسە جوعارى تابىس تابادى.

بريانسك وبلىسى گۋبەرناتورىنىڭ ايەلى ولگا بوگوماز شارۋا قوجالىعىن باسقارادى. ونىڭ تابىسى كۇيەۋىنەن 240 ەسەگە اسىپ ءتۇستى.