بۇگىن «ەكسپو-2017» اۋماعىنداعى يسپانيا كورولدىگىنىڭ پاۆيلونىندا يسپان ءتىلىنىڭ كۇنى ءوتتى دەپ حابارلايدى Qamshy.kz اقپارات اگەنتتىگى. ءىس-شارا كەزىندە قالاعان ادام يسپان ءتىلىنىڭ ساباعىنا قاتىسىپ، يسپان ادەبيەتى تۋرالى ءدارىستى تىڭداپ، سونداي-اق، يسپاندىق مۋزىكالىق دۋەتتىڭ ونەرىن تاماشالاي الدى. ءىس-شارا سەرۆانتەس ينستيتۋتىنىڭ (ارى قاراي – ينستيتۋت) قولداۋىمەن ۇيىمداستىرىلدى. بۇكىل الەمدە كەڭ تارالعان ءۇشىنشى ءتىل (جۇڭگو جانە حينديدەن كەيىنگى) سانالاتىن جانە دە رومان تىلدەرى ىشىندە ەڭ تانىمال ءتىل بولىپ تابىلادى ەكەن.
«يسپان تىلىندە عالامشارىمىزداعى 500 ملن. اسا ادام تىلدەسەدى. وسى ءتىلدى ءبىلۋ كەز كەلگەن سالادا قاجەتكە جارايدى. يسپان ءتىلىن بىلەتىن ادام ريۆەرا ماييا نەمەسە گالاپاگوسس ارالدارى سىندى يسپان تىلىندە سويلەيتىن كورىكتى ەلدەرگە ەركىن ساياحات جاساپ، تىلدەسۋ جاعىنان ەش قيىندىقتى سەزىنبەيتىن بولادى»، – دەيدى ماسكەۋدەگى سەرۆانتەس ينستيتۋتىنىڭ ديرەكتورى ابەل مۋرسيا.
مۋرسيا مىرزا اتاپ وتكەندەي، ينستيتۋت قىزمەتى بۇكىل الەم بويىنشا يسپان ءتىلى مەن مادەنيەتىن تاراتۋعا باعىتتالعان.
«سەرۆانتەس ينستيتۋتى يسپان ءتىلىن ۇيرەتەتىن بەتكە ۇستار مەكەمە بولىپ تابىلادى. ءبىزدىڭ قىزمەتكەرلەرىمىز يسپان ءتىلىن كەڭىنەن ناسيحاتتاۋ ءۇشىن بۇكىل جانىن سالىپ ەڭبەك ەتۋدە»، – دەپ قوستى ول.
ينستيتۋت وكىلدەرى يسپان ءتىلى ءبىلىمىن راستايتىن رەسمي قۇجاتتى قالاي الۋعا بولاتىندىعى جايلى ارنايى سەسسيا وتكىزدى. قالاعان ادام ءوزىنىڭ ءتىل دەڭگەيىن تەكسەرىپ، DELE يسپان ءتىلىنىڭ ديپلومى جانە يسپان ءتىلىن مەڭگەرۋ دەڭگەيىن باعالايتىن SIELE حالىقارالىق سەرۆيسىنىڭ ەلەكتروندىق سەرتيفيكاتى سىندى بۇكىل الەم بويىنشا مويىندالعان ديپلومداردى الۋ ءۇشىن ەمتيحانداردى قالاي تاپسىرۋ قاجەت ەكەندىگى جونىندە اقپارات الدى.
سونداي-اق، يسپان ءتىلىنىڭ كۇنىندە ادەبيەت تە اڭگىمەگە ارقاۋ بولدى. ينستيتۋتتىڭ مادەنيەت ءبولىمىنىڭ جەتەكشىسى تاتيانا پيگاروۆا ميگەل سەرۆانتەستىڭ «لامانچتىق ايلاكەر يدالگو دون كيحوت» رومانىنىڭ باس كەيىپكەرىنىڭ قازىرگى زامانداعى ينتەرپرەتاسياسى جايلى ءدارىس وقىدى.
«20 عاسىردا دون كيحوتتىڭ بەينەسى ءوز ىسىنە نىق سەنىممەن قاراۋ يدەياسىمەن تىعىز ۇشتاستى. ءبىزدىڭ قازىرگى زامانىمىزدا دون كيحوت بۇگىنگى وركەنيەتتىڭ باس بەينەسىنە اينالىپ وتىر. ەگەر ادام ءوز ىسىنە سەنسە، ول ءبىزدىڭ ومىردەگى قانداي قيىنشىلىق بولماسىن، البەتتە، جەڭە الادى دەگەن وي جاتىر. يسپانيا پاۆيلونىنىڭ تاقىرىبى كليماتتى جانداندىرۋعا، ەكولوگيالىق كوزقاراستىڭ جەڭىسىنە ارنالعان. ال بۇل ناعىز «دون كيحوتتىق» ماقسات دەۋگە بولادى! الەمدى جۇتاتقان تەحنوگەندىك وركەنيەتتە قالاي جەڭىسكە جەتۋگە بولادى؟ ادامزات ءتىرى عالامشاردا ءومىر ءسۇرۋى قاجەت دەگەن «دون كيحوتتىق» سەنىم عانا ادامداردىڭ ەكولوگيا مەن ەنەرگياعا قاتىستى كوزقاراسىن وزگەرتە الادى»، – دەپ اتاپ ءوتتى ءوز سوزىندە پيگاروۆا حانىم.
سونداي-اق، ءىس-شارا كەزىندە يسپانيانىڭ مادەني جانە تۋريستىك مۇراسى بەينەلەنگەن ينتەراكتيۆتىك كارتا (90 شارشى مەترلىك) تانىستىرىلدى. كارتانى 29-31 تامىز كۇندەرى ساعات 10:00-دەن باستاپ 19:00-گە دەيىنگى ارالىقتا يسپانيا كورولدىگىنىڭ پاۆيلونىندا كورۋگە بولادى.
كۇننىڭ سوڭىندا يسپاندىق مۋزىكانتتار – سازگەر ءارى ءانشى ماريا ارنال (بارسەلونا) جانە گيتاراشى مارسەل باجەس (تارراگونا) ونەر كورسەتتى. كونسەرت كەزىندە دۋەتتىڭ «قىرىق بەس باس جانە ءبىر جۇرەك» اتتى البومىنا (2017 ج.) ەنگەن جاڭا اندەرى ورىندالدى. يسپاندىق باسپا ءسوز بەتتەرىندە «2016 جىلدىڭ باستى مۋزىكالىق جاڭالىعى» دەپ اتالعان بۇل دۋەت مۋزىكا سالاسىنداعى بارسەلونا جۇلدەسىمەن ماراپاتتالعان، «Verbena» اتتى البومى جىلدىڭ ەڭ ۇزدىك ءانى دەپ تانىلعان.
