قىركۇيەكتىڭ 3ء-ى كۇنى CNN باراك وبامانىڭ اق ۇيدەگى قىزمەتىنەن كەتىپ بارا جاتقان كەزىندە جاڭا پرەزيدەنت دونالد ترامپقا جازىپ قالدىرعان حاتىنىڭ كوشىرمەسىن جاريالادى. وباما ترامپقا ءتورت كەڭەس ايتقان.
"قۇرمەتتى پرەزيدەنت مىرزا،
ايتارلىقتاي سايلاۋ ناۋقانىن وتكىزگەنىڭىز قۇتتى بولسىن. ميلليونداعان ادام سىزگە ءۇمىت ارتتى، قاي پارتياعا جاتاتىنىمىزعا قاراماستان بارشامىز ءسىزدىڭ بيلىك قۇرۋ كەزىڭىزدە داۋلەتىمىز ارتىپ، قاۋىپسىزدىگىمىز كۇشەيەدى دەپ ءۇمىت قىلۋىمىز كەرەك.
بۇل - ەرەكشە قىزمەت، تابىسقا جەتۋدىڭ ناقتى ءبىر جوسپارى جوق، سوندىقتان قانداي دا ءبىر كەڭەسىم پايدالى بولار ما ەكەن، بىلمەدىم. سوندا دا سوڭعى سەگىز جىلدا ويىما تۇيگەن از-كەم كەڭەسىمدى ۇسىنۋعا رۇقسات ەتىڭىز.
بىرىنشىدەن، ەكەۋمىزدىڭ دە تۇرلىشە جاعدايدا كەرەمەت جولىمىز بولدى. ەلدىڭ بارىنە مۇنداي ب ا ق بۇيىرمايدى. [اقش-تاعى] ەڭبەكقور ءار بالا مەن وتباسىنىڭ تابىسقا جەتۋى ءۇشىن قولدان كەلگەننىڭ ءبارىن جاساۋ - بىزگە قاراپ تۇرعان ءىس.
ەكىنشىدەن، امەريكالىق جەتەكشىلىكتىڭ مىنا الەم ءۇشىن قاجەتتىلىگى وتە زور. ارەكەت قىلا وتىرىپ، ۇلگى بولا ءجۇرىپ، "قىرعي قاباق سوعىستان" سوڭ كەڭي تۇسكەن ءھام بايلىعىمىز بەن قاۋىپسىزدىگىمىز ءۇشىن ءوزىمىز دە تاۋەلدى بولا تۇسكەن حالىقارالىق ءتارتىپ جۇيەسىن ساقتاۋ - بىزگە قاراپ تۇرعان ءىس.
ۇشىنشىدەن، ءبىز - بۇل كەڭسەنىڭ ۋاقىتشا تۇرعىندارىمىز. بۇل جايت ءبىزدى زاڭ ۇستەمدىگى، بيلىك ءبولىنىسى، تەڭدىكتى قورعاۋ مەن ازاماتتىق بوستاندىقتار سياقتى بىزگە دەيىنگىلەر قان توگىپ قورعاعان دەموكراتيالىق ينستيتۋتتار مەن داستۇرلەردىڭ ساقشىسىنا اينالدىرىپ تۇر. كۇندەلىكتى ساياساتتىڭ ىرىڭ-جىرىڭىنا قاراماستان دەموكراتيامىزدىڭ وسى قۇرالدارىن ءوزىمىز قابىلداپ العان كۇيدەگىدەي قۋاتتى ەتىپ تاپسىرىپ كەتۋ دە - بىزگە قاراپ تۇرعان ءىس.
اقىرعى ايتارىم، قىزمەت پەن مىندەتتىڭ ورتاسىندا جۇرسەڭىز دە، دوستارىڭىز بەن وتباسىڭىز ءۇشىن ۋاقىت تابىڭىز. بۇل جاندار اينالىپ وتۋگە كەلمەيتىن قيىن-قىستاۋ شاقتان ءسىزدى امان الىپ وتەدى. ميشەل ەكەۋمىز سىزگە جانە مەلانياعا وسى ءبىر عالامات ساپارلارىڭىز ءساتتى بولسىن دەپ تىلەيمىز، قولىمىزدان كەلگەنشە كومەكتەسۋگە دايار جۇرەتىنىمىزدى بىلگەيسىزدەر.
باقتارىڭىز تايماسىن، قۇداي جار بولسىن،
ب.و".
عالىم بوقاشتىڭ Facebook پاراقشاسىنان
