بۇگىن پالاتا سپيكەرى نۇرلان ءنىعماتۋليننىڭ توراعالىعىمەن ءماجىلىستىڭ بيۋرو وتىرىسىنىڭ ءۇشىنشى پارلامەنتتىك سەسسياسىنىڭ ءبىرىنشى وتىرىسى ءوتتى.
پارلامەنت سەسسياسىنىڭ اشىلۋىندا ەلباسى بەلگىلەگەن زاڭنامالىق باسىمدىقتاردى باسشىلىققا الىپ، ءبىرقاتار ماسەلەلەر تالقىلاندى، دەپ حابارلايدى Qamshy.kz اقپارات اگەنتتىگى پالاتانىڭ باسپا ءسوز قىزمەتىنە سىلتەمە جاساپ.
پالاتانىڭ الداعى ۋاقىتتا وتەتىن وتىرىسىندا ماجىلىسكە كەلىپ تۇسكەن جاڭا زاڭ جوبالارىنىڭ قورىتىندىلارىن دايىنداۋ مەرزىمىن انىقتاۋ ۇسىنىلدى. بۇلار «2018-2020 جىلدارعا ارنالعان رەسپۋبليكالىق بيۋدجەت تۋرالى» جانە «قازاقستان رەسپۋبليكاسىنىڭ ۇلتتىق قورىنان 2018-2020 جىلدارعا ارنالعان كەپىلدەندىرىلگەن ترانسفەرت تۋرالى» قارجىلىق زاڭدار جوباسى. وسى قاتاردا «قازاقستان رەسپۋبليكاسىنداعى كەدەندىك رەتتەۋ تۋرالى» كودەكسىنىڭ جوباسى جانە ىلەسپە تۇزەتۋلەر.
سونداي-اق، ماجىلىسكە كەلىپ تۇسكەن تۇرعىن ءۇي قاتىناستارى ماسەلەلەرى بويىنشا جاڭا زاڭ جوباسى، اكىمشىلىك قۇقىقبۇزۋشىلىق، ەسىرتكى، پسيحوتروپتىق زاتتار، سول تەكتەستەر مەن پرەكۋرسورلار اينالىمىن باقىلاۋ تۋرالى تۇزەتۋلەر جانە اكىمشىلىك قۇقىق بۇزۋشىلىق تۋرالى كودەكسىنە تۇزەتۋلەر.
قۇجاتتاردىڭ ىشىندە راتيفيكاسيالاناتىن اكتىلەر دە بار. ولار ەۋرازيالىق ەكونوميكالىق وداقتىڭ كەدەن كودەكسى تۋرالى شارتى مەن 1996 جىلعى 9 جەلتوقسانداعى نيۋ-دەليدە جاسالعان قوسارلانعان سالىق سالۋدى بولدىرماۋ تۋرالى كونۆەنسيا مەن حاتتاما. ماجىلىسكە تۇسكەن راتيفيكاسيالاناتىن پاكەتتەر مەن تۇزەتۋگە ەنگىزىلەتىن 2006 جىلعى 20 ناۋرىزداعى قازاقستان مەن وزبەكستان اراسىنداعى حالىقارالىق اۆتوموبيل قاتىناسى تۋرالى كەلىسىم مەن وسى سىندى قازاقستان مەن نورۆەگيا اراسىنداعى حالىقارالىق اۆتوموبيل تاسىمالدارى تۋرالى كەلىسىمدى اتاپ كورسەتۋگە بولادى.
جاڭا زاڭ جوبالارىنىڭ قاتارىندا «ۇستاپ بەرۋ تۋرالى كونۆەنسيانى راتيفيكاسيالاۋ تۋرالى» قازاقستان رەسپۋبليكاسى زاڭىنىڭ جوباسى، سونداي-اق، قازاقستان مەن ساۋد ارابياسى اراسىنداعى ۇستاپ بەرۋ، سوتتالعان ادامداردى بەرۋ تۋرالى كەلىسىمدى راتيفيكاسيالاۋ تۋرالى اكتىلەر كۇن ءتارتىبىنىڭ جوباسىنا ەنگىزىلگەن.
سونداي-اق، پالاتا دەپۋتاتتارىنىڭ پلەنارلىق وتىرىسىندا راتيفيكاسيالىق قۇجاتتاردى قاراۋ ۇسىنىلدى. اتاپ ايتساق، قازاقستاننىڭ سەربيامەن سوتتالعان ادامداردى بەرۋ تۋرالى شارتتى راتيفيكاسيالاۋ تۋرالى كەلىسىم-شارتى. بۇگىن بيۋرو وتىرىسىندا «مەملەكەتتىك ءتىلدىڭ لاتىن گرافيكاسىنداعى ءالىپبيىنىڭ ءبىرىڭعاي ستاندارتىن ەنگىزۋ ماسەلەلەرى تۋرالى» پارلامەنتتىك تىڭداۋ وتكىزۋ تۋرالى شەشىم قابىلداندى.
بۇدان باسقا، پالاتانىڭ پلەنارلىق وتىرىسىنداعى كۇن تارتىبىندەگى جوباسىنا پارلامەنتى ءماجىلىسىنىڭ وكىلەتتىكتەرىن ىسكە اسىرۋدىڭ ءۇشىنشى سەسسياعا ارنالعان نەگىزگى ءىس-شارالار جوسپارى تۋرالى ماسەلەلەرى تۋرالى ۇسىنىس بەرىلدى.
