نۇرسۇلتان نازاربايەۆ پولشا رەسپۋبليكاسىنىڭ پرەزيدەنتى اندجەي دۋدامەن كەزدەستى، دەپ حابارلايدى Qamshy.kz اقورداعا سىلتەمە جاساپ.

مەملەكەت باسشىسى نۇرسۇلتان نازاربايەۆ ا. دۋداعا «ەكسپو-2017» حالىقارالىق كورمەسى اياسىندا پولشانىڭ ۇلتتىق كۇنىن وتكىزۋگە قاتىسقانى ءۇشىن العىس ءبىلدىردى.

– بۇگىن ءبىز قازاقستان-پولشا بيزنەس-فورۋمىنا قاتىسامىز. بىلتىرعى تامىزدا پولشاعا جاساعان ساپارىمدى جىلى سەزىممەن ەسكە الامىن. مۇنداي بايلانىستار ەكى ەلدىڭ ىنتىماقتاسۋعا دەگەن نيەتىنىڭ زور ەكەنىن بىلدىرەدى، – دەدى قازاقستان پرەزيدەنتى.

سونىمەن بىرگە، نۇرسۇلتان نازاربايەۆ مەملەكەتتەرىمىز اراسىنداعى ەكىجاقتى ءوزارا ءىس-قيمىلدى كەڭەيتۋ ءۇشىن ەشقانداي كەدەرگى جوق ەكەنىن اتاپ ءوتتى.

– قازاقستان پولياك بيزنەسمەندەرى ءۇشىن اشىق. ءسىزدىڭ وتىنىشىڭىزبەن ەلدەرىمىزدىڭ استانالارى اراسىندا تىكەلەي اۋە رەيسى ورنادى. وسى اۋە قاتىناسىنا ەكى مەملەكەت تۇرعىندارىنىڭ سۇرانىسى جوعارى ەكەنىن جانە بۇل حالىقتارىمىزدىڭ تىعىز بايلانىستار ورناتۋعا مۇددەلىلىگىن بىلدىرەتىنىن اتاپ وتكەن ءجون، – دەدى مەملەكەت باسشىسى.

پولشا پرەزيدەنتى قازاقستانعا شاقىرعانى ءۇشىن نۇرسۇلتان نازاربايەۆقا ريزاشىلىعىن ءبىلدىرىپ، قازاقستان-پولشا بيزنەس-فورۋمىنىڭ جۇمىسىنا بىرلەسە قاتىسۋدىڭ ماڭىزدى ەكەنىن ايتتى.

– مەن ءبىزدىڭ كەزدەسۋلەرىمىزدىڭ ءبارىن زور قۋانىشپەن ەسكە الامىن. ءسىزدىڭ پولشاعا بىلتىرعى ساپارىڭىز ەلدەرىمىزدىڭ ەكونوميكالىق ىنتىماقتاستىعىن دامىتۋعا زور ۇلەس قوستى. ءسىزدىڭ ساپارىڭىز وسى باعىتتا جۇرگىزىلىپ جاتقان جۇمىستارعا تىڭ سەرپىن بەرگەنىن ەرەكشە اتاپ وتكىم كەلەدى. پولشادان قازاقستانعا جەتكىزىلەتىن تاۋار كولەمى 50%-عا، ال قازاقستاننىڭ پولشاعا جولدايتىن تاۋارى 80%-عا ارتتى. وسىلايشا، ءسىزدىڭ بىزگە كەلگەن ساپارىڭىزدىڭ ناتيجەسى ايقىن كورىنۋدە. مەن سوعان قۋانىشتىمىن، – دەدى ا.دۋدا.