قىركۇيەكتىڭ 6-سى كۇنى تاجىكستاندا ۇيالى بايلانىس وپەراتورلارىنىڭ ابونەنتتەرى ۇلتتىق كيىم كيۋ تۋرالى حابارلاما الدى، دەپ جازادى Qamshy.kz اقپارات اگەنتتىگى. تاجىكستان ۇكىمەتىندەگى ايەلدەر جانە وتباسىلىق ىستەر جونىندەگى كوميتەت اتالمىش حابارلامانى راستادى.

«ءبىز «تاجىكتەلەكوم» كومپانياسىنىڭ باسشىلىعى مەن وزگە دە ۇيالى بايلانىس وپەراتورلارىنا «ءسالت-داستۇر مەن ادەت-عۇرىپتى رەتتەۋ» تۋرالى زاڭناما اياسىندا ۇلتتىق مادەنيەت اتريبۋتتارىن ساقتاۋعا مىندەتتەيتىن رەسمي حاتتار جىبەردىك. تاجىكستاننىڭ ءار ازاماتى مەملەكەتتىك ءتىلدى ءبىلىپ، ۇلتتىق كيىمدە ءجۇرۋى ءتيىس»، –  دەدى كوميتەت وكىلى ماحبۋبا ازيموۆا.

«ۇلتتىق كيىمدى كيۋ مىندەتتەلەدى!»، «ۇلتتىق كيىمدى قۇرمەتتەڭىزدەر!»، «ۇلتتىق كيىم كيۋدى داستۇرگە اينالدىرايىق» –  ءدال وسىنداي مازمۇنادعى حابارلامالار ۇيالى تەلەفون قولداناتىن 6 ميلليون تۇرعىنعا كەلگەن.

ەل ازاماتتارىنا ۇلتتىق كيىم كيۋدى مىندەتتەگەن «ءسالت-داستۇر مەن ادەت-عۇرىپتاردى رەتتەۋ» تۋرالى زاڭناماداعى تۇزەتۋلەردى تاجىكستان پارلامەنتىنىڭ  تومەنگى پالاتاسى 23 تامىزدا ماقۇلداعان. «جەكە جانە زاڭدى تۇلعالار ۇلتتىق مادەنيەت اتريبۋتتارىن ساقتاۋعا مىندەتتى – مەملەكەتتىك ءتىلدى ءبىلۋ جانە ۇلتتىق كيىمدە ءجۇرۋ»، –  دەلىنگەن زاڭ جوباسىندا.