بۇگىن ءىرى مەملەكەت قايراتكەرى، 2006 جىلى قاستاندىقپەن قازاق تاپقان التىنبەك سارسەنباي ۇلىنىڭ 55 جاسقا تولاتىن تۋعان كۇنىنە وراي تۋىستارى مەن دوستارى، شاكىرتتەرى مارقۇمنىڭ ءقابىرى باسىندا قۇران وقىدى، دەپ جازادى Qamshy.kz ءتىلشىسى.

31 جاسىندا-اق قازاقستاننىڭ اقپارات ءمينيسترى قىزمەتىنە كەلگەن، اشىق ويلى، جاڭاشىل تۇلعاعا كەڭساي زيراتىندا قۇران باعىشتاۋعا تۋعان اعاسى، «جاس الاش» گازەتىنىڭ بۇرىنعى باس رەداكتورى رىسبەك سارسەنباي ۇلى، مەملەكەت جانە قوعام قايراتكەرى تولەگەن جۇكەيەۆ، مەملەكەت جانە قوعام قايراتكەرى وراز جاندوسوۆ، قوعام قايراتكەرى، تاۋەلسىز ساياساتكەر ءامىرجان قوسانوۆ، «دات» جوباسىنىڭ جەتەكشىسى، قوعام قايراتكەرى ەرمۇرات باپي، «قازاق ادەبيەتى» گازەتىنىڭ باس رەداكتورى جاناربەك ءاشىمجان سياقتى ەل اعالارى كەلدى.

جينالعاندار بىرنەشە مارتە قۇران وقىعان سوڭ، تولەگەن تىلەك ۇلى ءسوز الىپ: «التىنبەك ەلدىڭ ەسىندە، حالىقتىڭ جادىندا قالعان تۇلعا. قازاقتىڭ جاڭا تاريحىندا ءوزىنىڭ ورنىن ويىپ العان ازامات ەدى. ەلگە، ۇلتىمىزعا، مەملەكەتىمىزگە ۇلكەن ۇلەس قوستى. مەملەكەتتىڭ قازىرگى دامۋىنا ينتەللەكتۋالدى، ساياسي ۇيىمداستىرۋىمەن ايرىقشا ەڭبەك ەتتى. قازىرگى قازاق مەملەكەتىنىڭ ءبىرىنشى ىرگەسىن قالاۋشىلاردىڭ قاسىندا بولدى، مەملەكەت قۇرعان سوۆەتتىك بۋىننىڭ ىشىندەگى اسا دارىندى ازامات ەدى. جاس كەتتى. قالاي ايتقاندا دا التەكەڭ ەسىمىزدە قالاتىن، جادىمىزدا قالاتىن، تاريحىمىزدا قالاتىن التىن ارىپپەن جازىلاتىن تۇلعا. سول سەبەپتەن ۇمىتپايىق، التەكەڭنىڭ اۋلەتىنە، جانۇياسىنا، بالالارىنا، تۋىستارىنا جاقسىلىق تىلەپ سولاردىڭ قۋانىشىندا كەزدەسىپ تۇرايىق! امان بولايىق! التەكەڭنىڭ ارمانىن بالالارى، حالقى كورسىن!»، - دەپ جالىندى ءسوزىن ارنادى.

ءومىرىنىڭ سوڭعى جىلدارى قازاقستانداعى وپپوزيسيا جەتەكشىلەرىنىڭ ءبىرى بولعان ساياساتكەر التىنبەك سارسەنباي ۇلى 2006 جىلعى اقپاننىڭ 11ء-ى ەكى كومەكشىسى – باۋىرجان بايبوسىن جانە ۆاسيليي جۋراۆليەۆپەن بىرگە قاستاندىقپەن ولتىرىلگەن. مارقۇمنىڭ تۋىستارى التىنبەكتىڭ ولىمىنە بايلانىستى قىلمىستىق ءىستىڭ ساياسي استارى بار دەپ ەسەپتەيدى.

باس پروكۋراتۋرانىڭ مالىمدەمەسىنە سايكەس كەزىندە التىنبەك سارسەنبايۇلىن ءولتىرۋ جونىندەگى تاپسىرىستى ورىنداعانى ءۇشىن ايىپتى دەپ تانىلعان رۋستام يبراگيمبەكوۆ 2012 جىلعى ساۋىردە قازاقستاننىڭ جوعارعى سوتىنا قايتا ارىز جازىپ، «قاستاندىققا تاپسىرىس بەرۋشىنىڭ شىن ەسىمىن» جاريا ەتكەن.

2013 جىلى جەلتوقساننىڭ 20-سى كۇنى قازاقستان باس پروكۋراتۋراسىنىڭ وكىلى استانادا ارنايى بريفينگ وتكىزىپ، «التىنبەك سارسەنبايۇلىن ولتىرۋگە تاپسىرىس بەرۋشى ەرجان وتەمبايەۆ ەمەس، راحات الييەۆ پەن ءالنۇر مۇسايەۆ» دەگەن مالىمدەمە جاسادى. ەرجان وتەمبايەۆ 2006-شى جىلى ساياساتكەر التىنبەك سارسەنبايۇلىن ولتىرۋگە تاپسىرىس بەردى دەگەن ايىپپەن 20 جىلعا سوتتالعان بولاتىن، كەيىننەن ونىڭ جازاسى ەكى رەت جەڭىلدەتىلىپ، بوساپ شىقتى. قىلمىسقا ايىپتى دەپ تانىلعان، ۇكق ەكس باسشىلارى، سىرتتاي سوتتالعان راحات الييەۆ 2015 جىلى 24 اقپان كۇنى اۆستريا تۇرمەسىندە جۇمباق جاعدايدا قايتىس بولدى. ءولىمىنىڭ سەبەبى رەتىندە وزىنە قول جۇمساعانى ايتىلدى؛ ءالنۇر مۇسايەۆ بولسا ەۋروپادا بوستاندىقتا ءجۇر.

التىنبەك سارسەنباي ۇلى – 1993ء-ىنشى جىلدان باستاپ قازاقستاننىڭ باسپا ءسوز جانە بۇقارالىق اقپارات ءمينيسترى، اقپارات جانە قوعامدىق كەلىسىم ءمينيسترى، مادەنيەت، اقپارات جانە قوعامدىق كەلىسىم ءمينيسترى، 2001ء-ىنشى جىلدان ۇلتتىق قاۋىپسىزدىك كەڭەسىنىڭ حاتشىسى، قازاقستاننىڭ رەسەيدەگى توتەنشە جانە وكىلەتتى ەلشىسى سىندى لاۋازىمدى مەملەكەتتىك قىزمەتتەردى اتقاردى. ال 2003 جىلدىڭ كۇزىنەن باستاپ التىنبەك سارسەنباي ۇلى قازاقستان وپپوزيسياسىنىڭ قاتارىنا قوسىلىپ، «اق جول» دەموكراتيالىق پارتياسىنىڭ تەڭ ءتوراعاسى بولىپ سايلاندى. 2004 جىلى قازاقستاندا پارلامەنت سايلاۋى وتەر الدىندا التىنبەك سارسەنباي ۇلى از عانا مەرزىمگە اقپارات ءمينيسترى قىزمەتىنە قايتا ورالدى. الايدا، سول جىلى كۇزدە وتكەن پارلامەنت سايلاۋى زاڭ تالاپتارىن ورەسكەل بۇرمالاۋشىلىقپەن وتكىزىلگەنىن مالىمدەپ، وعان نارازىلىق رەتىندە مينيستر قىزمەتىنەن كەتتى. 2005 جىلدان وپپوزيسيالىق «ناعىز اق جول» پارتياسىنىڭ تەڭتوراعاسى جانە «ادىلەتتى قازاقستان ءۇشىن» رەسپۋبليكالىق قوزعالىسىنىڭ ءتورالقا مۇشەسى بولدى.