قازاقستاندىق رەجيسسەر ءسابيت قۇرمانبەكوۆتىڭ "ورالمان" ءفيلمى رەسەيدىڭ قازان قالاسىندا وتكەن ءحىىى حالىقارالىق مۇسىلمان كينوفەستيۆالىندە جۇلدە الدى. ال فيلمدە باستى ءرولدى سومداعان اكتەر دۋلىعا اقمولدا 5 جانە 11 قىركۇيەك ارالىعىندا تاتارستاندا وتكەن XIII حالىقارالىق مۇسىلماندار كينوسى فەستيۆالىندە «ۇزدىك ەر ادام ءرولى» جۇلدەسىمەن ماراپاتتالدى، دەپ جازادى Qamshy.kz اقپارات اگەنتتىگى.

«ورالمان» ءفيلمى تۋعان جەرىنەن كەتۋگە ءماجبۇر بولعان، الايدا ونداعان جىلدار وتكەن سوڭ اۋعانستاننان ەلىنە قايتا ورالعان قانداستارىمىز جايلى باياندايدى.

- تولىقمەتراجدى كارتينالاردا سومداعان رولدەرىم ىشىندەگى بۇل مەنىڭ العاشقى جەڭىسىم، وتە قۋانىشتىمىن. بۇل تەك مەنىڭ عانا تابىسىم ەمەس، رەجيسسەر ءسابيت قۇرمانبەكوۆتىڭ، وپەراتور مارس ۋماروۆتىڭ، قويۋشى سۋرەتشى، كومپوزيتوردىڭ، سونىمەن قاتار بارلىق ءتۇسىرۋ توبىنىڭ ەڭبەگى. ولاردىڭ بارلىعىنا العىسىمدى بىلدىرە وتىرىپ، وسى جەڭىسپەن قۇتتىقتايمىن، - دەدى اكتەر دۋلىعا اقمولدا.  

قازاقستان رەسپۋبليكاسى مادەنيەت جانە سپورت مينيسترلىگىنىڭ تاپسىرىسى بويىنشا ش.ايمانوۆ اتىنداعى «قازاقفيلم» كينوستۋدياسى تۇسىرگەن اتالمىش فيلم وسى فەستيۆالدىڭ نەگىزگى بايقاۋىندا 10 تولىقمەتراجدى كارتينامەن ب ا ق سىنادى. جالپى فەستيۆالگە قاتىسۋعا 61 ەلدەن 782 فيلم ۇسىنىس تاستاعان. 

ايتا كەتسەك، فەستيۆالدىڭ «ۇزدىك فيلم» جۇلدەسىن تۇرىك رەجيسسەرى مۇستافا قارانىڭ «كالاندرا ىزعارى» ءفيلمى، ال «ۇزدىك رەجيسسەر» جۇلدەسىن ءۇندى رەجيسسەرى مانگەش دجوشي («دجوشي جونۋشى» ءفيلمى ءۇشىن) يەلەندى. رەسەيدىڭ ەكى كارتيناسى دا جۇلدەلى ورىنداردان كورىندى – «امۋن» ءفيلمى «ۇزدىك سەناريي» جۇلدەسىمەن ماراپاتتالسا، «سوفيچكا» ءفيلمىنىڭ وپەراتورى ايرات ياميلوۆ ۇزدىك وپەراتور اتاندى. ال «ۇزدىك ايەل ادام ءرولى» جۇلدەسى «ايەل كۇنى» ءفيلمىنىڭ ءۇش اكتريساسىنا بۇيىردى. 

اتالمىش حالىقارالىق مۇسىلماندار كينوسى فەستيۆالى – 2005 جىلدان بەرى تاتارستاندا وتكىزىلىپ كەلە جاتقان رەسەيدىڭ ءىرى كينوفەستيۆالدەردىڭ ءبىرى. فەستيۆال ۇيىمداستىرۋشىلارىنىڭ ايتۋىنشا، بۇل كينوفورۋمنىڭ ماقساتى – مۇسىلمان ەلدەردىڭ فيلمدەرىن ۇلكەن ەكرانعا شىعارىپ، ءدىني عانا ەمەس، ادامي قۇندىلىقتاردى دا دارىپتەۋ، ۇلتارالىق ديالوگ قالىپتاستىرۋ.

ەستەرىڭىزگە سالا كەتسەك، «ورالمان» كوركەم ءفيلمى وسى جىلدىڭ باسىندا يراننىڭ استاناسى تەگەراندا وتكەن  35ء-شى حالىقارالىق فادجر كينوفەستيۆالىندە باس جۇلدەنى، سونىمەن قاتار XIII حالىقارالىق «ەۋرازيا» كينوفەستيۆالىندە باس جۇلدەسىن جەڭىپ العان بولاتىن. 

ايتا كەتسەك، «ورالمان» كوركەم ءفيلمى  15 قىركۇيەكتەن باستاپ ەلىمىزدە پروكاتقا شىعادى.  

فيلم جايلى: فيلم حح عاسىردىڭ 30-شى جىلدارى قىزىل اسكەردىڭ جەندەتتەرىنەن اۋعانستانعا قونىس اۋدارۋعا ءماجبۇر بولعان  قازاق وتباسى تۋرالى. باس كەيىپكەر بازارباي قارتتىڭ ءبىر قىزى مەن ۇلى سول جاقتا دۇنيەگە كەلەدى. بالالارى ەسەيىپ، وتباسىن قۇرادى. ۇلى ساپارقۇل جەرگىلىكتى پۋشتۋن ۇلتىنان كەلىنشەك الادى. ال قىزى اۋعان جىگىتىنە تۇرمىسقا شىعادى.  ساپارقۇل سوعىس كەزىندە مودجاحەتتەر جاعىندا سوعىسادى. جىلدار وتەدى. بازاربايدىڭ وتباسى قازاقستانعا كوشۋگە رۇقسات بەرەتىن كۆوتا الادى. بارلىعى جولعا جينالادى. تاۋلى قىشلاقتان شىققان وتباسىنى ۇزاق جول كۇتەدى.