الماتىدا "قازاق ءتىلىنىڭ لاتىن الىپبيىنە كوشۋدەگى ەرەكشەلىكتەرى" اتتى دوڭگەلەك ۇستەلدە جازۋشى، كينودراماتۋرگ سماعۇل ەلۋباي ءسوز سويلەدى.

"ءبىز ءساۋىر ايىندا ەلباسىمەن وتكەن كەزدەسۋدە لاتىن الىپبيىنە ءوتۋ تۋرالى كوپ وي ايتقان ەدىك. سونىڭ ءبىرى، بارلىق مەملەكەتتىك ءبىلىم بەرۋ ورىندارىندا، بالاباقشالاردا 3 ءتۇرلى ءالىپبيدى وقىتۋ قاجەت دەپ سانايمىز.

ماسەلەن، قازاق تىلىندە وتەتىن پاندەردى لاتىن الىپبيىندە، ورىس تىلىندەگى ساباقتار كيريلليسادا جانە اعىلشىن تىلىندەگى پاندەر ءۇشىن  اعىلشىن ءالىپبيىن قولدانۋ قاجەت. وسى ورايدا ءبىز بىرلىگىمىزدى ساقتاپ، ونى ءارى قاراي دامىتۋعا ۇلەس قوسا الامىز. سوندا عانا ءبىزدىڭ بولاشاق ۇرپاق ءۇش ءتىلدى تەرەڭ مەڭگەرىپ،  ناعىز ساۋاتتى ازامات بولماق.

قيىن دەۋلەرىڭىز مۇمكىن. الايدا، بۇل ماسەلە ەشقانداي قيىندىق تۋدىرمايدى. ويتكەنى ورىس تىلىندەگى پاندەر كيريلليسادا وتە بەرمەك، ال اعىلشىندى وقىپ جۇرگەندەر ءۇشىن لاتىن الىپبيىنە ءوتۋ وڭاي سوعادى.  جاستارىمىز ۇلتىنا قاراماي ءۇش ءتىلدى تەڭدەي مەڭگەرىپ شىعادى. ەكى تىلگە ءبولىنۋ، ءبىرىن-بىرى تۇسىنبەۋ  دەگەن ماسەلەلەردى تۇبەگەيلى جويىپ، بىرلىگىمىز ارتا بەرەدى دەمەكپىن.

بۇدان بولەك، لاتىن الىپبيىنە وتە وتىرىپ، مادەني مۇرامىز بەن تاريحىمىزدى تەرەڭنەن زەرتتەۋگە مۇمكىندىك الاتىنىمىزدى ەسكەرۋ قاجەت" دەدى سماعۇل ەلۋباي.