«مايقاپشاعاي» شەكارا بەكەتىنەن وتەر كەزدە زاڭسىز جولمەن 60 مىڭ اقش دوللارىن وتكىزدى دەپ ايىپتالعان گۇلجان ءماۋىتحان اقشاسىن تولىق قايتارىپ الدى، -  دەپ حابارلايدى Qamshy.kz اقپارات اگەنتتىگى.

وسى ىسكە قاتىستى ءىستىڭ باسى قاسىندا جۇرگەن زاڭگەر ابزال قۇسپاننىڭ پىكىرىن بىلگەن ەدىك.

«بۇل تولىق جەڭىس ەمەس»

- گۇلجان ءماۋىتحاننىڭ ءىسى وڭىنان شەشىلگەنىنە قۋانىشتىمىز. وسى تۇستا ەكىنشى ماسەلەنىڭ شەتىن شىعارعىم كەلەدى. بۇل گۇلجان ءماۋىتحاننىڭ جەكە ماسەلەسى بولىپ قالماۋى كەرەك. بۇدان كەيىن دە كەلەتىن قانشاما قانداستارىمىز بار. ولار دا وسى جاعدايعا تاپ بولۋى مۇمكىن. سوندىقتان بۇل ماسەلەنى تولىق شەشتىم دەپ ايتا المايمىن.

مەنىڭ نەگىزگى كوتەرگەن ماسەلەم، گۇلجان ءماۋىتحان اپايىمىز تاراپىنان جاسالعان ارەكەتتە قىلمىس قۇرامى بولعان جوق دەگەندى دالەلدەۋ. 10 مىڭ دوللاردان اساتىن قارجىسى بار ادام شەكارادان وتكەن كەزدە دە، كىرگەندە دە دەكلاراسيا تولتىرۋ كەرەك دەگەن تالاپ بار. ونى ورىنداماعان جاعدايدا ەكونوميكالىق كونتراباندا دەگەن باپپەن ايىپتاۋ بارىپ تۇرعان ساۋاتسىزدىق. ەگەر قازاقستاننان وسىنداي سوممامەن شىعىپ بارا جاتسا ورىندى. سەبەبى ول ادام قازاقستاننىڭ ەكونوميكاسىنا بەلگىلى جاعدايدا نۇقسان كەلتىردى. ال ەلگە كىرىپ كەلە جاتقان ادام ەلىمىزدىڭ ەكونوميكاسىنا قانداي نۇقسان كەلتىرۋى مۇمكىن؟

ەۋروپانىڭ 7  مەملەكەتىنىڭ قىلمىستىق جانە قارجى قارىم-قاتىناسىنا بايلانىستى زاڭناماسىن وقىپ شىقتىم. ەۋروپا ەلدەرىندە اقشامەن كىرگەن ادامدى ينۆەستور دەپ اتايدى ەكەن. ماسەلەن ءسىز بريتانياعا 3 ملن. دوللارمەن بارساڭىز سىزگە ينۆەست ۆيزا بەرەدى. ينۆەست ۆيزا يەگەرىنىڭ قۇقىعى جەرگىلىكتى بريتان ازاماتتارىنان دا ارتىق. ال بىزدە ەكونوميكالىق كونتراباندامەن سوتتايدى.

كسرو كەزىنەن بەرى قالىپتاسقان زاڭدى بۇزىپ، ەشقانداي قىلمىس قۇرامى جوق دەپ بولاشاقتا دا سوت تاجىريبەسىن وزگەرتەمىن دەگەن ءۇمىتى بولىپ ەدى. ونىڭ ىشىندە باسقا دا زاڭ بۇزۋشىلىقتاردى اتاپ وتتىك. ونىڭ ءبىرى  تىلگە بايلانىستى. بۇل كىسى كيريلليسا ءقارپىن بىلمەيدى. لاتىن قارپىمەن وقىعان. سوندىقتان گۇلجان ءماۋىتحان بەرگەن بارلىق جاۋاپتارىن جوققا شىعارعان. سونىڭ نەگىزىمەن ءتىل زاڭناماسىن بۇزۋ دەگەن قىلمىستىق پروسەستىك كودەكستىڭ  تالاپتارىن بۇزۋ بولىپ ەسەپتەلدى. اپەللياسيالىق القادان تەرگەۋگە قايتادان قايتارىلىپ، گۇلجان ءماۋىتحان تەرگەۋدە قايتا جاۋاپ بەرگەندە، اقشانىڭ تەك گۇلجان ءماۋىتحانعا عانا ەمەس باسقا دا كىسىلەرگە تيەسىلى ەكەنىن دالەلدەندى.  

مەنىڭ ماقساتىم -  سوت تاجىريبەسىن وزگەرتۋ. سەبەبى ءماۋىتحان اپايىمىزعا دەيىن دە قانشا قانداستارىمىز زارداپ شەككەن. سول ىستەردىڭ بارلىعىن جيناقتاپ جاتىرمىن. بۇل ماسەلەنى بىلاي قالدىرمايمىن. مەن پارلامەنت دەپۋتاتتارىنا، باس پروكۋراتۋراعا وسى زاڭدى، تاجىريبەنى وزگەرتۋگە قاۋقارى جەتەتىن مەكەمەلەردىڭ بارلىعىنا بارامىن. تەك وسىمەن اينالىسامىن دەگەن ازامات بولسا مەن دە بارلىق ماتەريال دايىن تۇر. بۇل تەك گ.ءماۋىتحان اپايىمىزدىڭ عانا جەڭىسى بولىپ قالدى. سوندىقتان مۇنى تولىق جەڭىس  دەپ ايتۋعا كەلمەيدى.

ەستەرىڭىزگە سالا كەتەيىك، زايسان اۋداندىق سوتى «مايقاپشاعاي» شەكارا بەكەتىندە 49 990 دوللارىنان ايىرىلعان گۇلجان ءماۋىتحاننىڭ ءىسى قايتا قارادى. الايدا شەكارادا 50 مىڭ دوللارىنان ايىرىلعان جالعىزباستى ايەلدىڭ تەك 9 900 دوللارى عانا قايتارىلاتىن بولعان.

شىعىس قازاقستان وبلىسى زايسان اۋداندىق سوتى جالعىزباستى ايەلدى 234-باپ بويىنشا ايىپتى دەپ تانىعان. سونداي-اق، 68 مىڭ تەڭگە ايىپپۇل سالعان. ال، قالعان 40 مىڭ دوللار مەملەكەتكە كىرىس بولىپ بەكىتىلگەن.