14 قىركۇيەك كۇنى اقوردادا وتاندىق جانە شەتەلدىك جۋرناليستەرمەن كەزدەسكەن ەلباسى نۇرسۇلتان نازاربايەۆ ەل ومىرىندەگى ماڭىزدى كوپتەگەن ساۋالدار تۋرالى پىكىرىن ءبىلدىردى، دەپ جازادى Qamshy.kz. پرەزيدەنتكە «قامشى» اقپارات اگەنتتىگى جەتەكشىسى ءبىلال قۋانىش: «ەلدىڭ بولاشاعى جاستاردىڭ قولىندا» دەپ ءجيى ايتاسىز. بۇگىنگى جاستار ماسەلەسىندە ءسىزدى نە تولعاندىرادى. جالپى بۇگىنگى جاستاردىڭ تاربيەسىنە قاتىستى ويىڭىزدى بىلگىم كەلەدى»، - دەپ ساۋال قويدى.

«ونى ءبىز ايتىپ ءجۇرمىز. «رۋحاني جاڭعىرۋدا» ايتىلعان ماسەلەنىڭ ىشىندەگى كوبىسى جاستارعا ارنالعان بولاشاقتىڭ ماسەلەسى. ءبىرىنشى، جاستارعا ايتاتىنىم بۇگىنگى زاماندا ءبىلىم كەرەك، عىلىم كەرەك. تەك قانا ساۋاتتى ەل، تەك قانا بىلىمگە ۇمتىلعان ەل بۇگىن الدىڭعى قاتاردا بولادى. شەتەلدە دە وقىتاتىن، ىشىمىزدە دە ءار جەردە مەكتەپتەرگە كوڭىل ءبولىپ جاتقانىمىز، ينتەللەكتۋالدىق مەكتەپ، جاڭادان ۋنيۆەرسيتەتتەر سالىپ جاتقانىمىز، مەكتەپتەرىمىز جاستار ءۇشىن.

ەكىنشى، قازاقستاننىڭ جاستارى ءۇشىن وتانسۇيگىشتىك. تاۋەلسىز قازاقستاندى قولدا ۇستاپ تۇرۋ ءۇشىن وتاندى ءسۇيۋ كەرەك. بۇل قازاقستان جاستاردىڭ قازاقستانى. XXI-XXII عاسىردىڭ، ارعى عاسىرلاردىڭ قازاقستانى. وسى مەملەكەتتى ابىرويلى قىپ ۇستاۋ ءۇشىن قازاقستاندى جانىنداي ءسۇيۋى كەرەك.

ءۇشىنشى، دۇنيەدە نەشە ءتۇرلى ءدىني اعىمدار بار. سيريادا قاقتىعىستار بولىپ جاتىر. ولار ءار جەردەن جاستاردى شاقىرتىپ سوعىسقا بەيىمدەپ، سوعىستىرىپ جاتىر. سودان كەيىن ەلدەرىڭە قايتىپ، لاڭكەستىك جاساڭدار دەپ وعان ۇيرەتىپ جاتىر. ءبىزدىڭ جاستارىمىز قۇداي ساقتاپ ونداي جاعدايعا تۇسپەسىن دەپ ويلايمىن، ول جەردە ەشقانداي بولاشاق جوق»، - دەپ جالعادى پرەزيدەنت ءوز جاۋابىن.  

«بۇرىن دا ايتقانمىن، ءقازىر دە ايتايىن. ءبىزدىڭ قازاقتىڭ قىزدارى، جالپى ايەل ازاماتتارى ەش ۋاقىتتا بەتىن بۇركەمەگەن. قىزدارىمىز بۇرىمدارىن سالبىراتىپ، شولپىلارىن سىڭعىرلاتىپ جۇرەتىن. ءبىزدىڭ انالارىمىز باتىر بولعان. ەرلەرىنىڭ جانىندا ءجۇرىپ سوعىسقان، قولىنا نايزا العان. سوندىقتان سونشا عاسىرلىق تاريحىمىزدى الىپ كەلىپ، بۇگىن باسقاشا جولعا تۇسەمىز بە؟ شالداردىڭ شولتيتىپ شالبار كيگەندەرىن قايدان كوردىڭىزدەر؟ ساقالىن بەلىنە ءتۇسىرىپ ءجۇرۋ مۇسىلماندىقتىڭ كادەسى ەمەس قوي. قاي قۇراندا جازىلعان؟ بۇل سالتىمىزدى بۇزادى. مۇندا تۇرعان قانداي ەرەكشەلىك بار؟ وعان كىم قىزىعادى؟ سوندىقتان ول بىزدىكى ەمەس. مەن بۇل تۋرالى ءبىر رەت ايتتىم. مەن ايتقاننان كەيىن ورىنداتاتىن اداممىن. سوندىقتان جاستارعا وسىلاردان اۋلاق بولىڭدار دەيمىن»، - دەدى قازاقستان پرەزيدەنتى.

مۇنان بولەك، نۇرسۇلتان نازاربايەۆ قازىرگى تاڭدا وتانداستارىمىز سوعىسىپ جۇرگەن ايماقتارداعى جاعدايدىڭ وتە اۋىر ەكەنىن باسا ايتتى.

«دۇنيەدە نەشە ءتۇرلى ءدىني اعىمدار بار. سيريادا قاقتىعىستار بولىپ جاتىر. ولار ءار جەردەن جاستاردى شاقىردى، اقشا تولەدى. ولاردى سوعىسقا بەيىمدەپ، سوعىستىردى. سودان كەيىن «ەلدەرىڭە قايتىپ، لاڭكەستىك جاساڭدار» دەپ وعان ۇيرەتىپ جاتىر. بىزدەن دە بارىپ جاتقان ادامداردى بىلەمىن. ول جاستار ءوزىنىڭ ورنىن وسى جەردە تابا الماعان، نە جۇمىسقا ورنالاسپاعان نە ءبىلىم الماعان. انا جاقتا قاراجات تولەيمىز دەگەننەن كەيىن سوعان بارىپ الدانىپ قالادى. سول جاققا وتباسىن دا اپارعاندىقتان ولار كەتە المايدى»، - دەدى مەملەكەت باسشىسى.