29 قىركۇيەك. كەشقۇرىم شاق. استانا قالاسى. مەيرامحانا. اكىمدىكتەن كەلگەن جىگىت مەيرامحانا ديرەكتورىنا سويلەدى:
– مەرەكەلەردىڭ ءبارى ءوتتى. ەندىگى جوسپاردا – جاڭا جىل مەرەكەسى. جاڭا جىل مەرەكەسىنە وراي مەيرامحانالار ىشكى-سىرتقى بەزەندىرۋلەرىن باستاۋ كەرەك. سىزدەرگە 2 اپتا ۋاقىت بەرەمىز.
مەيرامحانا ديرەكتورى:
– اينالايىن، باۋىرىم! ەندى عانا قىركۇيەكتىڭ اياعى بولدى. جاڭا جىلعا دەيىن تولىق 3 اي بار. دايىندىقتى ەرتە باستاپ كەتكەن جوقسىزدار ما؟
اكىمدىك وكىلى:
– جوق!
مەيرامحانا ديرەكتورى:
– جاڭا جىلعا ەشقانداي دايىندىق باستامايمىن.
اكىمدىك:
– بۇل – اكىمدىكتىڭ شەشىمى. وعان قارسى كەلسەڭىز، ءىرى كولەمدە ايىپپۇل تولەۋگە ءماجبۇر بولاسىز.
مەيرامحانا ديرەكتورى:
– ءبارىبىر دايىندىقتى ەرتە باستامايمىن. سەبەبى، جاڭا جىلعا دەيىن الدا قۇندىلىعى جوعارى مەنىڭ قوس مەرەكەم تۇر. ول – رەسپۋبليكا كۇنى مەن تاۋەلسىزدىك كۇنى. مەنىڭ اتا-بابامىن قانىمەن، جانىمەن كەلگەن تاۋەلسىزدىكتىڭ قۇنى جاڭا جىلدان قاشان دا بيىك.
جوعارىداعى ديالوگ استانا قالاسىنىڭ سول جاعالاۋىنداعى «Saya Sushi» مەيرامحاناسىنىڭ ديرەكتورى نۇربولات ءابىلحان مەن ەسىل اۋدانى اكىمدىگىنىڭ قىزمەتكەرى اراسىندا وربىگەن. بالكىم، كوپتەگەن مەكەمەلەردىڭ باسشىلىعىنا تاڭسىق بولماس. بايقاعانىمىزداي، ەلىمىزدە جاڭا جىلعا دايىندىق 3 اي بۇرىن باستالىپ كەتتى. وقيعانىڭ ءمان-جايىن تولىعىراق ءبىلۋ ماقساتىندا Qamshy.kz اقپارات اگەنتتىگىنىڭ ءتىلشىسى مەيرامحانا ديرەكتورى نۇربولات ءابىلحاننان سۇحبات الدى.
– مۇنداي جاعداي ءبىرىنشى رەت بولدى ما؟ بۇعان دەيىن دە اكىمدىك وسىلاي 2-3 اي بۇرىن كەلەتىن بە ەدى؟
– ءيا، بىلتىر دا كەلگەن، ءبىراق قاراشادا. ال وسى جىلى قىركۇيەك بىتپەي جاتىپ جاڭا جىلدىق بەزەندىرۋدى تالاپ ەتىپ وتىر.
– وتكەن جىلى قالاي بولىپ ەدى؟ دايىندىقتى قاراشادا باستاپ كەتتىڭىزدەر مە؟
– جو-جوق، 16 جەلتوقساندى وتكىزىپ، 20-سىنا قاراي مەيرامحانانى بەزەندىردىك. ءبىزدىڭ مەيرامحانا بۇرىن استانانىڭ وڭ جاعالاۋىندا بولاتىن. ول ۋاقىتتا اكىمدىك مەيرامحانامىزدى ءجيى تەكسەرمەيتىن. ەندى سول جاعالاۋعا، بايتەرەك ماڭىنا كوشىپ كەلگەلى تەكسەرىس جيىلەدى. اكىمىدىكتەن قىزمەتكەرلەر ءار اي سايىن كەلەتىن، وسى جولى دا جاي عانا تەكسەرۋگە كەلگەن بولار دەپ ويلادىم. ءبىراق جاعداي باسقاشا بولدى.
– ال ءسىزدىڭ مەيرامحاناڭىزدىڭ ۇجىمى جاڭا جىلعا دايىندىقتى قاشان باستايدى؟ جانە قانشا قارجى بولەسىزدەر؟
– ارتىمدا ءبىراز ەلىم تۇر، قولدايتىندار دا كوپ. سوعان سۇيەنىپ وسى جولى جاڭا جىلدىق بەزەندىرۋدى تاۋەلسىزدىكتى وتكىزىپ العاننان كەيىن باستايمىن. جاڭا جىلعا دايىندىقققا ارتىق شىعىندانبايمىز. كىشىگىرىم شىرشا مەن گيرلياندا ءۇشىن ارى كەتسە 15-20 مىڭ شىعارامىز. وسى جەتەدى، ارنايى دايىندىق بولمايدى.
– اكىمدىك جوعارعى دارجەدە بەزەندىرۋدى تالاپ ەتەتىن بولسا، نە ىستەيسىزدەر؟
– ونداي جاعدايدا اقپارات قۇرالدارىنا جۇگىنۋگە ءماجبۇر بولامىز. ماعان قاتىسى جوق مەيرامعا شاشىلمايمىن. تەرەزەگە جارق-جۇرق جاناتىن دۇنيەلەردى ءىلىپ قويامىن. قوناقتار مەنىڭ مەيرامحانامدى تاڭداپ، ماعان كەلگەن سوڭ مەن ول كىسىلەردى سىيلاۋىم كەرەك. الايدا ۇلت ازاماتى رەتىندە جاڭا جىلدى 16 جەلتوقساننان كەيىن بەزەندىرەمىن. تۇتىنۋشىلارىم ءۇشىن جاڭا جىلدىق كوڭىل-كۇي سىيلاۋعا بارىنشا تىرىساتىن بولامىز.
– ال تاۋەلسىزدىك مەرەكەسىنە وراي اكىمدىكتەن ۇسىنىستار بولا ما؟
– ەشقانداي ۇسىنىس تۇسپەيدى. اكمىدىك تەك جاڭا جىلعا قارسى مازالاي باستايدى.
– ەگەر سىزگە ايىپپۇل سالسا، ونى تولەۋگە دايىنسىز با؟
– ونى كورە جاتارمىز... ءبىراق العان بەتىمنەن قايتپايمىن، جاڭا جىلعا دايىندىقتى تاۋەلسىزدىك مەرەكەسىنەن كەيىن عانا باستايمىن.
– ال مەيرامحانالىرىڭىز تاۋەلسىزدىككە قارسى قانداي دا ءبىر شارالار وتكىزە مە؟ ءوزىڭىز اتالمىش مەرەكەنى قالاي اتاپ وتەسىز؟
– ءبىزدىڭ مەيرامحانا يتاليان جىنە جاپون اس ءمازىرىن ۇسىنادى، كوبىنە سۋشي-پيسسا جاسايمىز. ال قازاقى داستۇرگە ساي تاعامداردى جاساۋدىڭ رەتى كەلە بەرمەيدى. سەبەبى، ءبىزدىڭ باعىتىمىز باسقا. ەگەر كەلگەن قوناقتارىمىز قانداي دا ءبىر شارانى تويلايمىز دەپ جاتسا، ولارعا ىڭعايلاپ جاساپ بەرەمىز. ال تاۋەلسىزدىك مەيرامى ءبىر-بىرىمىزدى شىن جۇرەكتەن قۇتتىقتاپ، قۋانىشىمزعا ورتاقتاساتىن كۇن رەتىندە وتەدى. ارنايى اتاپ وتەمىز دەپ ايتا المايمىن.
راسىندا، جاڭا جىل مەرەكەسىنە ءالى 3 اي ۋاقىت بار. الايدا بيلىك باسىنداعى شەنەۋنىكتەرىمىز دايىندىقتى باستاپ تا كەتىپتى. كۇنى كەشە الماتى اكىمدىگى دەپۋتاتتاردان جاڭا جىلعا وراي قالانى بەزەندىرۋگە 429 ميلليون 323 مىڭ تەڭگە ءبولۋدى سۇراعان. ال دەپۋتاتتار باسقارماداعىلاردىڭ اتالمىش ۇسىنىسىن ماقۇلداي كەتكەن.
ەلىمىزدىڭ تاۋەلسىزدىك العانىنا الداعى جىلى 27 جىل تولادى. قازاقستاندىقتار ءۇشىن ەڭ قۋانىشتى كۇنگە شيرەك عاسىر تولسا دا، جاڭا جىل مەرەكەسىنىڭ كولەڭكەسىندە قالىپ قويا بەرەتىنى جاسىرىن ەمەس. 2-3 اي بۇرىن ميلليونداعان قارجى ءبولىنىپ، قىزۋ دايىندىق باستالىپ، 1 جەلتوقساندا-اق ءار قالانىڭ باستى شىرشاسى جاعىلادى. ال تۇعىرى بيىك تاۋەلسىزدىك العان ۇلى كۇن جاڭا جىلدىڭ تاساسىندا قالادى. وعان باس اۋىرتىپ جاتقان ەشكىم جوق، اتالمىش كۇنگە ارى كەتسە 10 كۇن قالعاندا كوشەلەرگە پلاكاتتار ءىلىنىپ، 17 جەلتوقساندا-اق پلاكاتتاردىڭ ورنىن جاڭا جىلدىق جىلتىراقتار قايتا باسادى.
جوعارىدا اتالىپ وتكەندەي مەيرامحانا، ءتۇرلى مەكەمە باسشىلىعىنا جاڭا جىلدىق بەزەندىۋرلەر تالاپ ەتىلەدى. قارسى كەلگەندەردى ايىپپۇلمەن قورقىتادى. ءيا، ول دا مەرەكە... جاڭا جىلدى جوعارعى دارەجەدە اتاپ ءوتۋ سوۆەت ۇكىمەتى زامانىنان سانامىزعا ءسىڭىپ قالعان. الايدا اتا-بابالارىمىز تالاي عاسىر اڭساعان، سول ماقساتتا جاندارىن قيىپ، قاندارىن توگە قول جەتكىزگەن، كەلەسى ۇرپاققا ميراس ەتىپ قالدىرعان تاۋەلسىزدىكتەن بيىك تۇرماۋ كەرەك ەكەنى ەسكەرىلۋى قاجەت!
دايىنداعان: گۇلىم جاقان
پىكىر قالدىرۋ