ق ر ءسىم قىرعىزستان پرەزيدەنتى المازبەك اتامبايەۆتىڭ مەملەكەتتىك سىيلىقتاردى تاپسىرۋ راسىمىندە ايتقان سوزىنە قاتىستى مالىمدەمە جاسادى دەپ حابارلايدى Qamshy.kz اقپارات اگەنتتىگى.
«قازاقستان رەسپۋبليكاسىنىڭ سىرتقى ىستەر مينيسترلىگى قىرعىز باق-تارىندا تاراتىلعان 2017 جىلعى 7 قازانداعى قىرعىز رەسپۋبليكاسىنىڭ پرەزيدەنتى ا. اتامبايەۆتىڭ قازاقستان رەسپۋبليكاسىنىڭ باسشىلىعىنا قاتىستى سوزدەرىنە بايلانىستى قاتاڭ نارازىلىق بىلدىرەدى جانە مۇنداي سوزدەرگە ەكى دوستاس مەملەكەتتەر اراسىنداعى قاتىناستاردا جول بەرىلمەۋى ءتيىس دەپ سانايدى.
قىرعىزستان پرەزيدەنتىنىڭ سايلاۋ الدى ماقساتىنداعى جاۋاپسىز، ارانداتۋشىلىق ءماندى جانە جالعان پىكىرى ەلدەرىمىز اراسىنداعى دوستىق پەن ءوزارا كومەكتىڭ كوپعاسىرلى بايلانىستارىنا نۇقسان كەلتىرە المايتىنىنا سەنىم بىلدىرەمىز.
قازاقستان تاراپى قىرعىز حالقىمەن ءداستۇرلى باۋىرلاستىق قاتىناستارىن دامىتۋ جولىنا بەرىك بولىپ قالا بەرەدى» دەلىنگەن مالىمدەمەدە.
ايتا كەتەيىك، المازبەك اتامبايەۆ مەملەكەتتىك سىيلىقتى تاپسىرۋ كەزىندە قىرعىزستانعا "قازاقستاندىق بيلىك تاڭىپ وتىرعان" جەتەكشىلەر جايلى پىكىر ايتقان.
«مەن ءادىل سايلاۋ وتكىزەمىن. حالىق ءوز باسشىسىن تاڭداۋى كەرەك. حالىق كىمدى تاڭداسا، ياعني ول ادام سوعان لايىق. قازاق بيلىگى باكييەۆتى جاقسى كورەدى. سوندىقتان ءدال سونداي باسقارۋشىلاردى بىزگە تاڭعىسى كەلەدى. مەن ءالى كۇنگە دەيىن قازاقستاننىڭ رەسمي وكىلدەرىنەن باكييەۆتىڭ ادامداردى اتقانىن دۇرىس دەگەنىن ەستيمىن» دەدى قىرعىزستان پرەزيدەنتى المازبەك اتامبايەۆ.
