قىرعىزستان پرەزيدەنتى المازبەك اتامبايەۆ مەملەكەتتىك سىيلىقتى تاپسىرۋ راسىمىندە قىرعىزستانعا "قازاقستاندىق بيلىك تاڭىپ وتىرعان" جەتەكشىلەر جايلى پىكىر ايتقان. بۇعان قاتىستى ق ر ءسىم مالىمدەمە جاسادى.  Qamshy.kz اقپارات اگەنتتىگى دە ق ر پرەزيدەنتى المازبەك اتامبايەۆتىڭ سوزىنە قاتىستى ءوز نارازىلىعىن بىلدىرەدى. 

«قىرعىز قازاق ءبىر تۋعان» دەگەن ءسوز بار. قازاقستان مەن قىرعىزستان ەجەلدەن باۋىرلاس ءارى كورشىلەس ەل. كورشىسىنە قامقور بولىپ ۇيرەنگەن قازاق حالقى قىرعىزستانعا تالاي كومەك كورسەتتى. «وڭ قولىڭ بەرگەندى، سول قولىڭ بىلمەسىن» دەگەن دە ءسوز بار. الايدا بۇل تۇستا ءۇنسىز قالۋ مۇمكىن ەمەس. سەبەبى اس بەرگەنگە تاسپەن اتۋ ادامشىلىققا جات.

وسىدان ءبىر جىل بۇرىن-اق قازاقستان قىرعىزستانعا تەحنيكالىق كومەك رەتىندە 100 ملن. دوللار بەردى. بۇل قارجى باقىلاۋ-وتكىزۋ بەكەتتەرىندەگى جاعدايدى جاقسارتۋ جانە ەاەو تالاپتارىنا ساي زەرتحانا ورنالاستىرۋ ءۇشىن بولىنگەن.

مۇنىمەن كورشى قىرعىز ەلىنە كورسەتىلگەن كومەك بىتپەك ەمەس. بۇعان دەيىن  «قازاقستان رەسپۋبليكاسىنىڭ ۇكىمەتى مەن قىرعىز رەسپۋبليكاسىنىڭ ۇكىمەتى اراسىنداعى وتەۋسىز اسكەري-تەحنيكالىق كومەك كورسەتۋ تۋرالى كەلىسىمدى راتيفيكاسيالاۋ تۋرالى» زاڭ جوباسى قابىلدانعان. وسى رەتتە وتەۋسىز اسكەري-تەحنيكالىق كومەكتى باسا اتاپ وتكەن ابزال. بۇل كەلىسىمدى راتيفيكاسيالاۋ ارقىلى ەكى مەملەكەتتىڭ اسكەري-تەحنيكالىق ىنتىماقتاستىعىن دامىتۋعا، سونداي-اق وڭىرلىك جانە ۇجىمدىق قاۋىپسىزدىكتى ودان ءارى نىعايتۋ كوزدەلدى.

باۋىرىمىز دەپ جۇرگەن قىرعىز حالقىنا قازاقستان تاراپىنان تەك دوستىق، ىنتىماقتاستىق، ارىپتەستىك قارىم-قاتىناستى كوزدەيتىنىن بىلە تۇرا جانە ونى ءىس جۇزىندە كورىپ مۇنداي مالىمدەمە جاساعانى قازاقستان ءۇشىن تۇسىنىكسىز.

قازاقستانعا قاتىستى اۋىر سوزدەردى ايتپاس بۇرىن اتامبايەۆ وتكەنگە كوز جۇگىرتىپ وتسە يگى ەدى. قىرعىزستان باستان قانداي قيىن كۇندەردى وتكىزسە دە كورشى ءارى باۋىرلاس ەل رەتىندە قازاقستان قىرعىزستانعا كومەك كورسەتۋگە دايىن ەدى. ءقازىر دە سولاي. ونى ق ر ءسىم-نىڭ بۇگىنگى مالىمدەمەسىنەن انىق اڭعارۋعا بولادى.

2010 جىلى قىرعىزستاندا جاعداي تۇراقسىز بولىپ، ساياسي جاعداي شيەلەنىسە تۇسكەندە، ەكونوميكاسىنا سىزات تۇسكەندە ەڭ ءبىرىنشى بولىپ قازاقستان قول ۇشىن بەرگەن ەدى. قازاقستان بيلىگى سول ۋاقىتتا دا ايانىپ قالماي، قىرعىزستانعا گۋمانيتارلىق كومەك جىبەردى.

قىرعىز باۋىرلارىمىزدىڭ قازاقستاندا ەمىن-ەركىن جۇمىس ىستەپ، ءناپاقاسىن تاۋىپ جۇرگەنى بولەك اڭگىمە. ءوز ەلىندە جوق جۇمىستى قازاقستاننان تاۋىپ جۇرگەنىن اتامبايەۆ ۇمىت قالدىرعان سەكىلدى. قانشا قىرعىز جاستارى قازاقستاندا ءبىلىم الىپ جاتىر. قىرعىز ستۋدەنتتەر جاتىن ورىن، شاكىرت اقى سەكىلدى كومەكتەردەن دە كەندە قالىپ جاتقان جوق. 

ەكىجاقتى ىنتىماقتاستىقتى ودان ءارى دامىتۋ، ونىڭ ىشىندە تەحنيكالىق كومەك كورسەتۋ، تەمىرجول تاريفتەرىن سايكەستەندىرۋ، ازاماتتارعا قويىلاتىن كوشى-قون تالاپتارىن جەڭىلدەتۋ تۋرالى باستامالاردى كوتەرىپ، ەكى ەل اراسىنداعى دوستىق قارىم-قاتىناستى ودان ءارى نىعايتۋدى عانا كوزدەگەن قازاقستانعا قاتىستى اتامبايەۆتىڭ مۇنداي سوزدەرى قىرعىزستان پرەزيدەنتىنىڭ سايلاۋ الدىنداعى ارانداتۋشىلىق ءماندى ءسوز دەپ تۇسىنۋگە بولادى. سەبەبى قازاقستاننان تەك جاقسىلىق كورە وتىرا سىرتىنان شىندىققا جاناسپايتىن سوزدەردى ايتۋىن باسقالاي قالاي تۇسىنۋگە بولادى؟!