ەلباسى مەملەكەتتىك ءتىلدى لاتىن قارپىنە كوشىرۋ جونىندەگى جوبانى ىسكە اسىرۋ ءۇشىن قۇرىلعان جۇمىس توبىنىڭ مۇشەلەرىمەن كەزدەستى، دەپ حابارلايدى Qamshy.kz اقپارات اگەنتتىگى اقورداعا سىلتەمە جاساپ.

جيىندا مەملەكەت باسشىسىنا قوعامدىق تالقىلاۋلار بارىسىندا كەلىپ تۇسكەن ۇسىنىستاردى ەسكەرە وتىرىپ ازىرلەنگەن قازاق ءتىلىنىڭ لاتىن قارپىنە نەگىزدەلگەن ءبىرىڭعاي ستاندارتىنىڭ جوباسى ۇسىنىلدى.

قازاقستان پرەزيدەنتى مەملەكەتتىك ءتىلدى رەفورمالاۋ رۋحاني جاڭعىرۋ باعدارلاماسى اياسىنداعى ماڭىزدى ماسەلەلەردىڭ ءبىرى ەكەنىن اتاپ ءوتتى.

 «وسى كۇندەرى قازاق ءتىلىنىڭ جاڭا الىپبيىنە قاتىستى ماسەلە بەلسەندى تالقىلاندى. كوپتەگەن ادامدار اتسالىستى. قازاق ءتىلىن لاتىن الىپبيىنە كوشىرۋ تۋرالى يدەيا تاۋەلسىزدىك العان جىلدارى تۋعان. بۇل ماسەلە مەنىڭ قاتاڭ باقىلاۋىمدا بولاتىن»، - دەدى نۇرسۇلتان نازاربايەۆ.

سونىمەن قاتار، مەملەكەت باسشىسى قازاق ءتىلىنىڭ لاتىن الىپبيىنە كوشۋ پروسەسىنىڭ تاريحي ماڭىزىن ەسكەرىپ، اتالمىش ماسەلە بويىنشا ۇيلەسىمدى شەشىمگە كەلۋ كەرەكتىگىن مالىمدەدى.

«بىردە ءبىر ەل ءوزىنىڭ جاڭا ءالىپبيىن قوعام تالقىسىنا سالعان ەمەس. ءبىز ءۇشىن ءار ادامنىڭ ويى ماڭىزدى. پرەزيدەنت اكىمشىلىگىنە لاتىن الىپبيىنە كوشۋ تۋراسىندا 300-گە جۋىق ۇسىنىس ءتۇستى. جاستار دا بۇل پروسەسكە بەلسەنە اتسالىستى»، – دەپ اتاپ ءوتتى قازاقستان پرەزيدەنتى.

نۇرسۇلتان نازاربايەۆ ءوز كەزەگىندە قازاق ءتىلىنىڭ جاڭا الىپبيىنە قاتىستى جوباسىن تالقىلاۋدا اتسالىسقان قوعامدىق بىرلەستىكتەر مەن عىلىمي ورتانىڭ بەلسەندىلىگىنە باسا نازار اۋداردى.

كەزدەسۋ بارىسىندا اتقارىلعان جۇمىستاردىڭ ناتيجەسى تۋرالى مەملەكەت باسشىسىنا احمەت بايتۇرسىنوۆ اتىنداعى ءتىل ءبىلىمى ينستيتۋتىنىڭ جەتەكشىسى ە. قاجىبەك، ش. شاياحمەتوۆ اتىنداعى تىلدەردى دامىتۋ ورتالىعىنىڭ رەسپۋبليكالىق ۇيلەستىرۋ-ادىستەمەلىك ورتالىعىنىڭ ديرەكتورى ە. تىلەشوۆ باياندادى.

جيىنعا قاتىسۋشىلاردىڭ باياندامالارىن تىڭداعان مەملەكەت باسشىسى كوڭىل اۋدارارلىق ماڭىزدى ماسەلەلەردى ۇمىتپاۋ كەرەكتىگىن ەسكەرتتى.

«جالپى، اتقارىلىپ جاتقان جۇمىستاردىڭ نەگىزگى باعىتتارىن قولدايمىن. جوبانى ىسكە اسىرۋ بارىسىندا الەمدىك تاجىريبە ەسكەرىلدى. بۇل وتە ماڭىزدى. سونىمەن بىرگە، قازاق ءالىپبيىن لاتىن قارپىنە كوشىرۋ ۇدەرىسىنە قاتىستى ءاقپاراتتىق-تۇسىندىرۋ جۇمىستارىن جالعاستىرۋ قاجەت»، – دەدى مەملەكەت باسشىسى.

قازاقستان پرەزيدەنتى بۇل رەفورما باسقا تىلدەردىڭ دامۋىنا نۇقسان كەلتىرمەي، ازاماتتاردىڭ قۇقىقتارىن بۇزباۋعا ءتيىس ەكەنىنە ەرەكشە توقتالدى.

«قازاق ءتىلىنىڭ لاتىن قارپىنە كوشۋى ورىس ءتىلدى ازاماتتاردىڭ قۇقىقتارىن، ورىس ءتىلى مەن باسقا دا تىلدەردىڭ مۇمكىندىكتەرىن شەكتەمەيدى. ورىس ءتىلىنىڭ كيريلل قارپىندە قولدانىلۋى وزگەرىسسىز قالادى. ول بۇرىنعىداي قىزمەت اتقارا بەرەتىن بولادى. جاڭا الىپبيگە كوشۋ قازاق ءتىلىن مەڭگەرۋدى جەڭىلدەتەدى»، – دەدى نۇرسۇلتان نازاربايەۆ.

ەلباسى لاتىن قارپىنە كوشۋ كۇردەلى ۇدەرىس ەكەنىن، سونداي-اق ونىڭ ماقساتى ءتىلىمىزدى دامىتۋ جانە ونى الەمدىك اقپاراتتىق كەڭىستىككە شىعارۋ ءۇشىن جاعداي جاساۋ بولىپ تابىلاتىنىن اتاپ ءوتتى.

بۇدان بولەك، مەملەكەت باسشىسى جاڭا ءالىپبيدى ءبىلىم بەرۋ جۇيەسىنە ەنگىزۋ ءۇشىن مۇعالىمدەر مەن ادىستەمەلىك بازانى دايىنداۋ قاجەتتىگىن ايتىپ، ۇكىمەتكە ونى كەزەڭ-كەزەڭىمەن ەنگىزۋ جونىندەگى جوسپار ازىرلەۋدى تاپسىردى.

سوڭىندا نۇرسۇلتان نازاربايەۆ قازاق ءالىپبيىن رەفورمالاۋعا قولداۋ ءبىلدىرىپ، ونى ىسكە اسىرۋعا بەلسەندى اتسالىسقان بارشا قازاقستاندىقتارعا، عالىمدار مەن ءتىلتانۋشىلارعا العىس ايتتى.