ۇلجان ءال-فارابي اتىنداعى قازاق ۇلتتىق ۋنيۆەرسيتەتىنىڭ 3 كۋرس ستۋدەنتى. ول ساباققا بارۋ ءۇشىن تاڭعى ساعات 6-دا ۇيقىسىنان تۇرىپ، ۋنيۆەرسيتەتىنە اسىقتى. ۇلجان اۆتوبۋس ايالداماسىنا  كەلگەندە 45 ءنومىرلى اۆتوبۋستىڭ كەلىپ قالعانىن بايقاپ ەرتە باراتىن بولدىم دەپ قۋانىپ ەدى، ءبىراق ادام تولى اۆتوبۋس ايالداماعا توقتاماي ءوتىپ كەتە باردى. سەبەبى اۆتوبۋستىڭ ىشىندە ادام  لىق تولى بولدى. اۆتوبۋس توقتاعانىمەن ۇلجان اۆتوبۋسقا سىيماي قالاتىن ەدى. كەلەسى اۆتوبۋستى كۇتىپ تۇرسا ۇلجان ساباققا كەشىگەتىنىن ءبىلىپ، ۋنيۆەرسيتەتكە دەيىن تاكسي ۇستاۋعا ءماجبۇر بولدى. ءاردايىم وسىلاي اۆتوبۋسقا سىيماي تاكسي ۇستاي بەرسە، ۇلجاننىڭ قالتاسى كوتەرمەسى انىق. ستۋدەنت تۇرماق، تۇراقتى جۇمىسى بار ادامدار اقشاسىنىڭ دالاعا كەتكەنىن قالامايدى.

ساباعىنا ۋاقىتىلى جەتىپ، قاتىسقان ۇلجان ەندى ۇيىنە قايتۋعا اسىقتى. تاعى سول 45 ءنومىرلى اۆتوبۋس. جارتى ساعات ءوتتى، اۆتوبۋس ءالى جوق. ال ادامدار از ءمىنىپ جاتقان 30، 9، 11، 7  ءنومىرلى اۆتوبۋستار ەكى-ۇش رەت ءوتىپ كەتتى. ايالدامادا 45 ءنومىرلى اۆتوبۋستى كۇتكەن ادامدار كوپ. ءبىراز ۋاقىتتان سوڭ 45-تە كەلدى، ىشىندە ادام ادەتتەگىدەي لىق تولى. ۇيگە ەرتەرەك جەتۋ ءۇشىن ۇلجان ادام تولى اۆتوبۋسقا ءمىنىپ كەتۋگە تىرىستى. ۇلجان عانا ەمەس ايالداماداعى ادامدار دا اۆتوبۋسقا مىنۋگە تىرىستى. اۆتوبۋستا قىسىلىسقان ادامداردان ينە شانشىر جەر تاپپايسىڭ. بۇل – ۇلجاننىڭ عانا ەمەس، اۆتوبۋستى جارتى ساعات كۇتەتىن بۇكىل حالىقتىڭ ءومىرى.

قىركۇيەك ايى باستالعاننان وسىنداي جاعدايلار كوبەيەدى. قالانىڭ ىشىندە  جۇمىسقا اسىققان قىزمەتكەرلەر مەن اۋىلدان كەلگەن ستۋدەنتتەر  لەگى كوبەيگەن. ءوز قىزمەتىنە اسىققان كەز كەلگەن ادام اۆتوبۋس كۇتىپ قالارى انىق، جولىڭىز بولعاندا عانا اۆتوبۋستى بەس مينۋت  كۇتەسىز. مۇنداي ساتتىلىك كەز كەلگەن  ادامعا بۇيىرمايدى. ەرتە تۇرىپ، جۇمىسقا ەرتەرەك بارايىن دەسەڭ دە كەشىگىپ باراسىڭ. وعان سەبەپ – اۆتوبۋسقا سىيماي قالۋىڭ نەمەسە اۆتوبۋستى ۇزاق ۋاقىت بويى كۇتىپ تۇرۋىڭ. اۆتوبۋسقا مىنە قالساڭ، ادامداردىڭ قاباقتارىنان قار جاۋىپ تۇرادى. قايتەسىڭ ەندى ءجۇز ادام مىنەتىن اۆتوبۋسقا ءجۇز ەلۋ ادام ءمىنىپ الامىز.  وسىنداي جاعدايدان كەيىن كىمنىڭ سىركەسى سۋ كوتەرسىن. وسىنداي قاۋىرت تىرشىلىككە تۇرعىندار شىداپ ءجۇر، باسقا امال بار ما؟..

قازىرگى زامان تەحنولوگيانىڭ دامىعان كەزى بولعاندىقتان كەز كەلگەن نارسەنى ۇيالى تەلەفون ارقىلى باسقارا الامىز. سولاردىڭ ءبىرى اۆتوبۋستاردى قاي جەردە كەلە جاتقانىن باقىلايتىن ارنايى باعدارلاما بار: ۇيالى تەلەفونعا ارنالعان «سityBus» اتتى باعدارلاما. بۇل باعدارلامادا اۆتوبۋستىڭ قاي جەردە كەلە جاتقانىن ناقتى كورسەتەدى. ءبىراق  ايتا كەتەتىنى بۇل باعدارلاما «Samsung» ۇيالى تەلەفوندارىنا عانا ورناتىلادى، ال «Iphone» ۇيالى تەلەفوندارىنا ورناتىلعاندارى دۇرىس قىزمەت كورسەتپەيدى. بۇل جاعدايدى دا ەسكەرگەن ءجون بولار.

الماتى قالاسىندا  جولاۋشىلار سانىنىڭ 72%-دان استامى اۆتوموبيل كولىگىمەن تاسىمالداناتىنى بەلگىلى. بۇگىندە  الماتىدا 160-تان اسا قوعامدىق كولىك جۇمىس ىستەپ تۇر، ولاردىڭ كەيبىرى قالا مەن الماتىعا جاقىن ورنالاسقان ەلدى مەكەندەردىڭ بايلانىسىن قامتاماسىز ەتەدى. ال قالادا تروللەيبۋستار جەلىسى 8 مارشرۋتتان تۇرادى ەكەن. ديسپەچەرلەر اۆتوبۋستاردى رەيسكە كەستە بويىنشا قاراما-قارسى قويىپ، تەپە-تەڭ جەدەل ينتەرۆالدارىن جونەلتەدى. كەستە بويىنشا مارشرۋتتاردا 12 اۆتوبۋس جۇمىس ىستەۋگە ءتيىس. قوزعالىس ينتەرۆالى 6 مينۋت بولسا، اينالما رەيستىڭ ۇزاقتىعى 72 مينۋتتى قۇرايدى. بۇل ەسەپتەلگەن دۇنيە. ءبىراق بۇل جاعدايدى قاداعالاپ وتىرعان ەشكىم  جوق.

ءيا، بەلگىلى تالاپقا ساي ۋاقىتپەن جۇرەتىن، اراسىن ون مينۋتتان اسىرمايتىن اۆتوبۋستار بار. حالىقتىڭ وعان ەش نارازىلىعى جوق. حالىقتى قىنجىلتاتىن جاعداي - اۆتوبۋستاردىڭ ازدىعى مەن  ولاردىڭ ۋاقىتىندا كەلمەي، تۇرعىندار از مىنەتىن اۆتوبۋستاردىڭ ءجيى ءجۇرىپ، ادامدار كوپ مىنەتىن اۆتوبۋستاردىڭ سيرەك جۇرەتىنى. الماتى تۇرعىندارى وسى جاعدايعا باسا نازار اۋدارسا ەكەن دەيدى. اسىرەسە سيرەك جۇرەتىن 45، 48، 81، 70، 19، 32 سەكىدى ءنومىرلى اۆتوبۋستاردىڭ سانىن كوبەيتىپ، ۋاقىتىندا جۇرسە ەكەن دەگەن تىلەكتەرى بار.

«حالىق — قازى، ەڭبەك — تارازى» دەمەيدى مە؟ حالىقتىڭ سىنى دا قاتەسىز بولادى. جىرتىققا جاماۋ جاساپ وتىرعان كەزدە جول اقىسىن كوتەردى، قىمباتتاعان جول اقىسىنان ناتيجە كۇتكەن حالىق اۆتوبۋس كۇتىپ شارشادى...

اقنۇر مۇحتارحان