«جول مۇراتى – جەتۋ». سوڭعى كەزدەرى جولعا شىعاردا ۇيگە امان-ەسەن جەتۋدى ويلايمىز. ونىڭ سەبەبى دە بار. الەۋمەتتىك جەلى ارقىلى تاراعان اقپاراتتاردىڭ ىشىندە «ادام جوعالىپتى»، «ءىز-تۇسسىز جوعالدى» سىندى جاڭالىقتار قاپتاپ ءجۇر. سونى كورەسىڭ دە، قورقاسىڭ. كولىككە مىنگەننەن كەيىن ەشكىم كورمەدى، ەستىمەدى، بىلمەيدى... جول جونەكەي ۇستاعان تاكسيدىڭ ءقاۋىپتى ەكەنى ەل اراسىندا ايتىلىپ ءجۇر.  راسىندا دا، اۆتوكولىك ىشىندە ءسىزدىڭ قاۋىپسىزدىگىڭىزگە ەشكىم كەپىلدىك بەرمەيدى. ال ءبىر جاعىنان اۆتوكولىك جۇرگىزۋشىسىنە باعانى ءوزىڭىز ۇسىنىپ، ساۋدالاسا دا الاسىز. باعاسى دا ارنايى باعدارلاما ارقىلى شاقىرىلعان كولىكتەن ارزان بولادى.  ال ءار ادام  ءوز ءومىرى ءۇشىن قورقاتىن بۇل كەزەڭدە قاي تاكسي ءقاۋىپسىز؟

قوعامدىق كولىككە ءمىنىپ الىپ، قالاعان جەرىڭە دەيىن جەتۋگە قالادا بارلىق جاعداي جاسالعان. ءبىر اۆتوبۋستان ەكىنشىسىنە اۋىسىپ ءجۇرۋ دە قالتاڭدى جۇقارتادى دەمەسەڭ، ءقاۋىپسىز ەكەنى بەلگىلى. ال اۆتوبۋس توقتاپ قالعان ۋاقىتتا  نەمەسە بارار جەرىڭە اسىعىس بولعاندا مىندەتتى تۇردە جەڭىل كولىك، ياعني تاكسي كەرەك بولادى. بۇگىندە ۇيالى تەلەفونعا جۇكتەپ، كەز كەلگەن ۋاقىتتا تاكسي شاقىرتۋعا مۇمكىندىكتەر جەتەرلىك. ول ءۇشىن ارنايى تاكسي شاقىراتىن پروگراممالار دا بارشىلىق. مىسالى، ياندەكس تاكسي، InDriver، Uber، جانە ت،ب. قوعامدا اتالعان وسى ءۇش پروگرامما كوپ قولدانىسقا يە. ەندەشە تالداۋ جاساپ كورەيىك.

ياندەكس تاكسي

ياندەكس تاكسي قولدانۋشىلارى 3 جولمەن تولەم جاساي الادى:

-قولما-قول؛

-Online بانك كارتاسى ارقىلى؛

ونلاين- تولەم بارىسىندا ەشقانداي كارتا قاجەت ەمەس. جۇرگىزۋشى  چەككە قول قويۋدى دا تالاپ ەتپەيدى. ونلاين تولەم جاساۋ ءۇشىن جولاۋشى ءوز كارتاسىن ۇيالى تەلەفونداعى ياندەكس.تاكسي باعدارلاماسىنداعى اككاۋنتپەن بايلانىسىتىرىپ قويۋ جەتكىلىكتى. جول ءجۇرۋ اقىسىن جۇرگىزۋشى «ساپار اياقتالعان» كەزدە عانا ناقتى ايتا الادى. الايدا قالانىڭ جاقسى بىلەتىن جۇرگىزۋشىلەر تاپسىرىس تۇسكەن كەزدە جوبالاپ باعانى دا ايتىپ جاتادى.

-پروموكود/جەڭىلدىكتەر؛

ياندەكس.تاكسي وزىنە قولدانۋشىلاردىڭ سانىن ارتتىرۋ ماقساتىندا كينوتەاترلار مەن دۇكەن، كافە جانە مەيرامحانالارمەن بىرلەسىپ ءتۇرلى اكسيالار وتكىزىپ وتىرادى. ال كەلۋشىلەرگە تاكسيدى قولدانۋ كەزىندە ءبىرىنشى تاپسىرىسقا جەڭىلدىك جاسالادى.

الماتى قالاسى تۇرعىندارى اراسىندا ياندەكس تاكسيدىڭ باعاسى قىمبات دەگەن پىكىرلەر دە بار.

InDriver

InDriver تاكسي شاقىرۋدىڭ ءبىر ارتىقشىلىعى جۇرگىزۋشىگە باعانى ءوزىڭ ۇسىناسىڭ. سونىمەن قاتار ساۋدالاسۋعا دا بولادى. باعاسى باسقا تاكسي شاقىرۋ باعدارلامالارىمەن سالىستىرمالى تۇردە ارزانىراق. جانە ساپار سوڭىندا جۇرگىزۋشى مەن كولىككە بايلانىستى ءوز پىكىرىڭىزدى، شاعىمىڭىزدى جازىپ قالدىرۋعا بولادى. الايدا شاعىمنىڭ قارالىپ، قارالماسىنا ەشكىم كەپىلدىك بەرمەيدى.

InDriver جۇرگىزۋشىلەرى كولىك ىشىندە جولاۋشى بارىنا قاراماستان، جولدان تاعى دا بىرنەشە ادامدى الۋعا قۇقىقتارى بار ەكەنىن ءجيى ايتادى.

Uber taxi

دىتتەگەن جەرىڭىزگە جەتۋ بارىسىندا سىزگە اۆتوكولىكتىڭ سىيىمدىلىعى مەن باعاسى ۇسىنىلادى. ارتىنشا سىزگە جۇرگىزۋشىنىڭ ءنومىر مەن اۆتوكولىك ءنومىرى جىبەرىلەدى. قالاعان جەرىڭىزگە جەتكەن سوڭ جۇرگىزۋشىنى باعالاي الاسىزدار.

تاكسيدەگى وقيعا

اسەم ەسىمدى بويجەتكەننىڭ ايتۋىنشا، ول ۇنەمى InDriver تاكسي شاقىرۋ قىزمەتىن قولدانادى.

اسەم تۇركىسىب اۋدانى گەتە العاباس كوشەلەرىنىڭ قيىلىسىنان التىن وردانىڭ بازارىنا دەيىن 1600 تەڭگە ۇسىنعانىن ايتتى. جۇرگىزۋشى سول ساتتە حابارلاسىپ، 2000 تەڭگە بەرسەڭىز بارامىن دەپ شارت قويعان. جول جۇرۋىنە از عانا ۋاقى قالعاندىقتان، امالسىز كەلىسكەنىن ايتادى. ارتىنشا باراحولكا تۇسىنان تاعى 2 ادامدى وتىرعىزىپ، ولارمەن 1000 تەڭگەگە كەلىسەدى. ارتىنان مىنگەن ەكى جولاۋشىنى ءۇيىنىڭ تۇسىنا دەيىن جەتكىزىپ، «اسىعىسپىن» دەگەن سوزىنە نازار اۋدارماعانىن دا تىلگە تيەك ەتتى. بىرىنشىدەن، ۇسىنعان باعادان كوپ اقشا سۇرادى جانە مەنى جولىمنان قالدىرا جازدادى دەپ ءوز رەنىشىن ءبىلدىردى.

بۇدان دا وزگە ءبىز ءبىلىپ، بىلمەيتىن وقيعالار قانشاما...سوندىقتان ارنايى باعدارلاما ارقىلى شاقىرىلعان تاكسي بولسىن، جول جونەكەي مىنگەن اۆتوكولىك بولسىن تۋىستار مەن دوستارىڭىزعا اۆتوكولىكتىڭ مەملەكەتتىك ءنومىرىن، شامامەن كەلەتىن ۋاقىتى مەن جۇرگىزۋشى تۋرالى جەكە مالىمەتتى حابارلاعانىڭىز ءجون.

مۇمكىندىگىڭىز بولسا قالانىڭ كارتاسىن قوسىپ، كولىكتىڭ جىلجۋ بارىسىن باقىلاپ وتىرۋ كەرەك. جەكە باس قاۋىپسىزدىگىڭىزگە نەمقۇرايلى قاراپ، باعالى زاتتارىڭىز بەن اقشاڭىزدان ايىرىلىپ قالماۋدىڭ بىردەن-بىر جولى – وسى.

ەسىڭىزدە بولسىن، تاكسي جۇرگىزۋشىسى  ءسىزدىڭ قاۋىپسىزدىگىڭىز ءۇشىن جاۋاپتى ءارى مۇددەلى!

ايگەرىم تاۋباي