حالقىمىزدىڭ لاتىن ءالفاۆيتىن ەش قيىندىقسىز يگەرىپ كەتۋى كۇمانسىز. بۇل تۋرالى «تۇران» ۋنيۆەرسيتەتىنىڭ رەكتورى، الماتى قالاسى قوعامدىق كەڭەسىنىڭ ءتوراعاسى راحمان الشان ۇلى الشانوۆ مالىمدەدى، دەپ حابارلايدى Qamshy.kz اقپارات اگەنتتىگى.

«كەشەگى جيىندا ەلباسىمىز ايتقانداي لاتىن قارپىنە كوشۋگە بايلانىستى حالىقتان 300 دەن استام ۇسىنىس كەلىپ ءتۇستى. كۇردەلى ماسەلە بولعاندىقتان حالىقتىڭ پىكىرىن ءبىلۋ ماڭىزدى. ءبىراز نارسە ەسكەرىلدى، جۇمىس جالعاسىپ كەلەدى»، - دەدى الشانوۆ.

سونداي-اق جاڭا جوباعا سايكەس اتقارىلىپ جاتقان جۇمىستاردىڭ باعىتىنا وڭ باعا بەردى.

«جالپى، اتقارىلىپ جاتقان جۇمىستاردىڭ نەگىزگى باعىتتارى وتە دۇرىس دەپ ەسەپتەيمىن. جوبانى ىسكە اسىرۋ بارىسىندا الەمدىك تاجىريبە ەسكەرىلدى. بۇل وتە ماڭىزدى.

سونىمەن قاتار، ەلباسىمىز ايتقانداي قازاق ءتىلىنىڭ لاتىن قارپىنە كوشۋى ورىس ءتىلدى ازاماتتاردىڭ قۇقىقتارىن، ورىس ءتىلى مەن باسقا دا تىلدەردىڭ مۇمكىندىكتەرىن شەكتەمەيتىندىگى جانە ورىس ءتىلىنىڭ بۇرىنعىداي قىزمەت اتقارا بەرەتىنى جايىندا پىكىرىمەن تولىقتاي كەلىسەمىن. قازاق ءتىلىنىڭ جازۋ تاريحىندا ءالىپبي جۇيەسى بىرنەشە تاريحي كەزەڭدەردى باسىنان وتكىزىپ، ۇلتتىق ءالىپبي دەڭگەيىنە جەتكەن. مىسالى، 8 عاسىر بويى قازاق حالقى اراب ءالفاۆيتىن جۇرگىزدى، ودان كەيىن 10 جىلدان استام لاتىن ءالفاۆيتىن پايدالاندى. وسى رەتتە، حالقىمىزدىڭ لاتىن ءالفاۆيتىن ەش قيىندىقسىز يگەرىپ كەتۋىنە كۇمان جوق».

ايتا كەتەيىك، 9 قازاندا ەلباسىنا قازاق ءتىلىنىڭ لاتىن قارپىنە نەگىزدەلگەن جاڭا جوباسى تانىسترىلدى.