قوعامدىق ورىنداردا ەگدە كىسىلەردىڭ گازەت وقىپ وتىرعانىن ءجيى بايقايمىز. ارينە، ورىسشا. قاتەلەسپەسەم، گازەت ۇستاعان ادام دا ورىس. قازاق ءتىلىنىڭ سويلەنبەۋى حاقىندا اڭگىمە قوزعالعان جەردە ونىڭ وقىلماۋى دا زاڭدى سەكىلدى. بۇرىننان ۇراندالىپ كەلە جاتقان «كىتاپ وقىمايدىنى» ەمەس، «قازاق گازەتتەرىن كىم، قالاي وقىپ ءجۇر؟» دەگەنگە توقتالعانىمىز دۇرىس-اۋ.

         ءتۇرلى تەحنيكاعا تاۋەلدى بولعان سانامىزدا گازەت تۋرالى مىنانداي ءبىر كورىنىس جاتتالىپ قالىپتى: گازەت وقىپ وتىرعان قاريا. ءيا، ءقازىر گازەت وقۋ ءسان ەمەس. سول سەبەپتەن بولار قوعامدا «گازەتتىڭ بولاشاعى بۇلىڭعىر» دەگەن پىكىر قالىپتاسقان. ويتكەنى قالاداعى كەز كەلگەن دۇڭگىرشەككە قازاق باسىلىمدارىن ىزدەپ بارساڭىز، تاپپايسىز. ەگەر تاۋىپ جاتساڭىز، ءسۇيىنشى سۇراڭىز! قالالىق قازاقتار كوبىنە ورىسشا وقيدى. قازاق گازەتتەرىنەن وقيتىن دۇنيە تاپپاعاندىق پا، ياكي باسەكەگە جاراماعاندىعىنان با، سۇرامادىق. ال اۋىلدىق جەرلەردە ءار شاڭىراقتان بىر-ەكى گازەتتىڭ سۇلباسىن بايقايسىز. ەڭ الدىمەن اۋداندىق باسىلىم، ارينە، ودان سوڭ وبلىستىق، كەيىنگى كەزەكتى «ەگەمەن قازاقستان» الادى. اتالعان گازەتتەرگە جۇمىس ورنى تالاپ ەتكەن سوڭ جازىلاتىنى دا بەلگىلى جاعداي. مۇندايدا «گازەت وقيتىن ادەبيەت سۇيەر قاۋىم امان بولسىن!» دەپ ىشتەي كۇبىرلەپ وتىراسىڭ. ايتتىڭ نە، ايتپادىڭ نە...

P.S.:«گازەتتى قاريالار عانا وقي ما ەكەن؟ بىلمەسەڭىز، ءبىز دە وقيمىز...» دەپ تۋلاپ وتىرساڭىز، سابىر ەتىڭىز. بۇگىنگى جاستاردىڭ كىتاپ ۇستاپ، گازەت وقىپ جۇرگەنىنەن حابارىمىز بار. تەك، ونى ايتا بەرسەك، كوز ءتيىپ قالاتىنداي...

مارجان ءابىش