ءبىرىنشى بايلىق - دەنساۋلىق. دەنساۋلىقتى ساقتاۋ ءۇشىن پايدالاناتىن ونىمدەرىمىز جانە ازىقتارىمىز قۇنارلى ءارى تابيعي بولۋ ءتيىس. تابيعي ونىمدەرىمىزدىڭ دەنى ءتورت تۇلىكتىڭ ەتى جانە ءسۇت ءونىمى. الايدا اتالمىش ونىمدەردى ساتىپ الاردا قاۋىپسىزدىگىنە ءجيى ءمان بەرە بەرمەيمىز.

الايدا باتىس قازاقستان وبلىستىق اۋماقتىق ينسپەكسياسىنىڭ بيولوگيالىق قاۋىپسىزدىك ءبولىمىنىڭ باس مامانى مارات قالمەنوۆتىڭ  ايتۋىنشا، ءسۇت پەن ءسۇت تاعامدارىندا برۋسەللەز قوزدىرعىشى  ءبىرشاما ۇزاق ۋاقىت ساقتالادى ەكەن. سالقىنداتىلعان ءسۇتتى 4-7 تاۋلىك، ىرىمشىك، ماي، برىنزادا 67 تالىككە دەيىن تىرشىلىك قابىلەتىن جوعالتپايدى. ال برۋسەللانىڭ حيميالىق زاتتارعا شىدامدىلىعىنا كەلەتىن بولساق، فەنولدىڭ  2 %  ەرىتىندىسى، كرەوليننىڭ 2%، ليزولدىڭ 0،5% ، ءفورماليننىڭ 2 %، ءحلوراميننىڭ 0،01%6 حلورلى اكتىڭ 1% ەرىتىندىلەرى اۋرۋ قوزدىرعىشىن تەز ولتىرەدى.

اتالمىش اۋرۋدىڭ العاشقى بەلگىلەرى سەزىلگەنشە ءۇش جەتى وتەدى ەكەن. كەيدە ناۋقاس، تەمپەراتۋراسىنىڭ 38،5—39،0 گرادۋسكا دەيىن كوتەرىلگەنىن دە سەزبەي قالۋى مۇمكىن. برۋسەللەز ناۋقاستىڭ قىزۋى بىردە كوتەرىلىپ، بىردە تومەندەپ وتىرادى. قىزۋى تۇسكەندە ادام ءوزىن ايىققانداي سەزەدى، تاماق ىشكىسى كەلىپ، كوڭىلى سەرىگەدى. برۋسەللەز قوزعاندا ناۋقاستىڭ ۇيقىسى قاشادى، تۇندە ءجيى  تەرلەيدى، كەيىنىرەك بۋىندارى ىسەدى، نەرۆ جۇيەسى  قابىنادى، توسەك تارتىپ جاتىپ تا قالادى. برۋسەللەز ەركەكتىڭ تۇقىم بەزىن ىسىندىرەدى، ايەلدىڭ ەتەككىرىن بۇزادى، بالا تاستاتادى ەكەن. ادامدى اۋرۋحانادا ەمدەۋ مەرزىمى ءبىر ايدان ءتورت ايعا، كەيدە ودان دا ۇزاققا سوزىلۋى مۇمكىن. 

برۋسەللا قوزدىرعىشى  جەر بەتىندە 40 تاۋلىك، 5-8 سم تەرەڭدىكتە 60، ىلعالدى جەردە 90 تالىككە دەيىن تىرشىلىگىن ساقتايدى. تىكەلەي تۇسكەن كۇن ساۋلەسى ونى بىرنەشە مينۋتتان 3-4 ساعات ارالىعىندا ، ال شاشىراپ تۇسكەن كۇن ساۋلەسى ونى 7-8 تاۋلىكتە ولتىرەدى ەكەن. سالقىن جەردە ساقتالعان زالالدانعان ەتتە ۇزاق ساقتالادى. ءتىپتى تۇزدالعان ەتتە 182 تاۋلىك بويى ءوزىنىڭ ۋىتتىلىعىن جويمايدى.

گۇلىم اقاپ،

باتىس قازاقستان وبلىسى