قازاقستاندىق ءانشى قايرات نۇرستاس پەن جارى جۇلدىز ابدۋكارىموۆا باستى ءرولدى سومداعان «ارمان/كوگدا انگەلى سپيات» ءفيلمى 12 قازاننان باستاپ كورەرمەنگە جول تارتتى. فيلم رەجيسسەرى راشيد سۇلەيمەنوۆ. بۇگىنگى قوعامنىڭ اششى كەلبەتىن اشىق كورسەتۋدى نيەت ەتكەن فيلم اۆتورلارى ءوز ماقساتتارىنا جەتتى مە؟ بۇل سۇراقتىڭ جاۋابىن كينونى تاماشالاعان حالىقتىڭ جارىسا جازعان پىكىرلەرىنەن-اق سارالاپ قاراۋعا بولادى. ءفيلمنىڭ ءساتتى شىققانىن ايتىپ، قايرات نۇرتاسقا ريزاشىلىعىن ءبىلدىرىپ جاتقانداردىڭ قاتارى كوپ. مۇنى الەۋمەتتىك جەلىدە جازىلىپ جاتقان پىكىرلەردەن بايقاۋعا بولادى. الايدا سىننىڭ استىنا العاندار دا جوق ەمەس.
ءفيلمنىڭ تۇساۋكەسەرىندە بولعان بايان ماقسات قىزى: «ءومىردىڭ شىندىعىن ۇلكەن ەكراندا العاش رەت كورىپ وتىرمىز. ءيا، راس، ايەلدەر قورلىق كورۋدە، ال پوليسيا بۇعان كوز جۇما قارايدى. ءيا، راس، وليگارحتاردىڭ ۇلدارىنا زاڭنىڭ قاتىسى جوق، ءيا، راس، اقشاسى مەن تانىسى جوق، ءارى كىناسىز ادامدى تۇرمەگە توعىتا سالۋ تۇك ەمەس. مۇنىڭ ءبارى – اقيقات! ءبىراق ايتۋعا ەشقايسىمىزدىڭ ءداتىمىز بارماي جۇرگەندە، قايرات ايتتى، قايرات ىستەدى. بيلەت ساتىپ الىپ، شىندىققا تۋرا قاراڭىز!»
جۋرناليست اباي تۇزەلباي: «اششى دا بولسا، شىندىق بوياماسىز باياندالىپتى. ەل ىشىندە مۇنداي جاعدايدىڭ ءتۇر-تۇرى كەزدەسىپ جاتىر عوي. ءبىراق، ماسەلەنىڭ كينوداعىداي شەشىلگەنىن ەستىمەگەن سياقتىمىن. قايرات سوتتالدى، جۇلدىز كەك الدى. ءبىراق، قالاي؟ مەنىڭ جازعان مىڭ ءسوزىم، ءسىزدىڭ كوزبەن كورىپ، كوڭىلمەن تۇيگەنىڭىزگە جەتپەس. ريزا بولدىم، قايرات ەل ماقتاعانداي ءانشى عانا ەمەس، اجەپتەۋىر اكتەر دە ەكەن. ال جۇبايى جۇلدىز – ناعىز كاسىبي مامان. ءبىر تاڭ قالاتىنىم، ون جىل ىشىندە مۇنداي تالانتىن تاسادا قالاي ۇستادى ەكەن؟ وسىنشاما ونەر كەۋدەسىنە قالاي سىيعان؟ بۇگىننەن باستاپ جۇلدىز ابدىكارىموۆا تالاي رەجيسسەردەن ۇسىنىس الارى ءسوزسىز. بىتكەن ىسكە سىنشى كوپ. كينودا كەمشىلىك جوق دەۋگە بولمايدى. سوندىقتان، «ارمان... كوگدا انگەلى سپيات...» كينوسىنا كورەرمەن رەتىندە 10 باللدان 9،9 دەگەن باعا بەرەمىن».
اتالمىش كينوعا ورىس كورەرمەندەردىڭ دە باعا بەرگەنىن بايقادىق. ناتاليا سلۋدسكايا ەسىمدى الماتىلىق تۇرعىن: «بۇل جاي عانا كينو ەمەس، بۇل ارەكەت. بۇل فيلم وليگارحتاردىڭ ءومىرى جايىندا ەمەس، ءبىز جايىندا، ءبىزدىڭ قوعام جايىندا... بيلىككە جالپاقتاۋ، مۇمكىندىك بولسا، مۇلدەم سەنبەۋ. ءبارى ءوز ورنىمەن قويىلعان، باسقاشا سەزىم، تالانتتى رەجيسسەر، شىنايى وبرازدار... اۋىرلىعىنا قاراماستان ءازىل-ويىنداردى ءتيىمدى پايدالانعان.
قايرات، جارايسىڭ، سەنى ماقتان تۇتامىن، ايەلىڭ دە – وتە سۇلۋ!».
تەرىس پىكىرلەر دە جوق ەمەس. بەلگىلى زاڭگەر ايگۇل ورىنبەك ءفيلمنىڭ يدەياسى ۇرلانعان دەيدى.
«وتاندىق ءونىمدى قولداۋ ءۇشىن كينوعا باردىق. قارجىسى كوپ قايرات نۇرتاسقا مىقتى كينو ءتۇسىرۋ نە تۇرادى دەپ ويلاعان ەدىم ؟ ءبىراق وكىنىشكە وراي تاعى دا سول كوشىرمە! ەڭ سوراقىسى كينو قاتىگەزدىككە تۇنىپ تۇر. ونسىزدا تەلەارنالارىمىزدا انشىلەر قاپتاپ، زورلىق قورلىقتى كۇندە كورسەتىپ جاتقانى ازداي، ەندى كينو ءتۇسىرىپ ناسيحاتتايىن دەدى مە؟ اراق شاراپ ءىشىپ قىزدى ۇرلاپ زورلاۋ، ناشا شەگۋ سياقتى دۇنيەنى ءتۇسىرىپ جاستارعا نە تاربيە بەرمەكشى بولدى ەكەن؟ ءفيلمنىڭ ماعىناسىن تۇسىنە المادىم!
بىرەۋدىڭ يدەياسىن ۇرلاعان سوڭ فيلم ماعىناسىز بولعان. قاي مەكتەپ ساباق ۇستىندە "استانا" ارناسىن قوسىپ قويىپ، جاڭالىقتار كورەتىنىن ماعان كورسەتىڭدەرشى؟ زاڭدى تۇردە شارا قولدانايىق . مىلتىقپەن تۇنگى كلۋب نەمەسە مەيرامحاناعا كىرىپ بارا جاتقاندا كۇزەتشىلەر قالايشا جىبەرىپ قويدى؟ بايدىڭ بالالارى وتىراتىن قىمبات رەستوراندى بۇل فيلمدە ەشكىم كۇزەتپەي قويعان با؟ جىگىتتەردى اتامىن دەپ ستول جانىنا كەلىپ، مىلتىقتى كەزەنگەندە نەگە قالعان قوناقتار جايباراقات بيلەپ ءجۇر؟ جازا بەرسەم كوپ! "وسى ءبىزدىڭ قازاققا ەشتەڭە جاقپايدى" - دەپ رەنجۋى مۇمكىن قايراتتىڭ اناسى. ءبىراق كينو تۇسىرەر الدىندا سىن بولاتىنىن ءبىلدى ول كىسى. گۇلزيرا حانىم ءسىز اناسىز، ونسىز دا زورلىق پەن قورلىعى كوبەيگەن زاماندا، جاستارعا مەيرىمدىلىك ناسيحاتتايتىن، ءمان-ماعىناسى بار كينو ءتۇسىرۋ ءسىزدىڭ قولىڭىزدان كەلەدى. قولدارىڭىزدا جۇلدىز سياقتى مىقتى اكتريسا قىز تۇرعاندا سىزدەر ءۇشىن بۇل قيىن ەمەس دەپ ويلايمىن. ال مىنا فيلمدەرىڭىزگە ەكى دەگەن باعا بەرەم!»، دەپ كەلتىردى ءوز پىكىرىن زاڭگەر.
ايتا كەتەيىك، 2013 جىلى ءانشى «وكىنىش» اتتى العاشقى كينو تۋىندىسىن كورەرمەنگە ۇسىنعان. سول جىلدىڭ 11 ساۋىرىنەن باستاپ شىققان فيلم ەكى كۇندە 34،8 ميلليون تەڭگە قارجى جيناعان.
