ءبىر كۇنى ءمۇعالىم سىنىپتا وتىرعان بالالارعا: − سەندەردىڭ جەك كورەتىن ادامدارىڭ بار ما؟ − دەگەن سۇراق قويادى.
وقۋشىلار ويلانىپ قالدى. كەيبىرەۋى ءۇنسىز قالىپ، كەيبىرى قاباقتارى تۇيىلە باستارىن يزەدى.
ولاردىڭ ءارقايسىسىنا بىردەن قاعاز قالتا تاراتقان ءمۇعالىم: − ءبىز ءبىر قىزىق ويىن وينايىق، − دەدى.
− وتكەن ءبىر جەتى ىشىندە كىم ءسىزدى رەنجىتتى، تۇگەلدەي ەسكە ءتۇسىرىڭىز. سوسىن ول بالانىڭ اتى مەن ىستەگەن ءىسىن تىلدەي قاعازعا جازىڭىز. مەكتەپتەن قايتقان سوڭ وزەن جاعاسىنا بارىپ، ءتۇرلى سالماقتاعى تاستاردان تەرىپ الىپ، الگى جازۋى بار قاعازدى سوعان جاپسىرىڭىز. جۇرەگىڭىزدى اۋىرتقان ءىسى اۋىر بولسا، تاس تا ۇلكەن بولسىن، كىشكەنە بولسا، تاس تا كىشكەنە بولسىن. سوڭىنان تاستىڭ ءبارىن وزدەرىڭمەن بىرگە الىپ بارعان قالتاعا سالىپ ماعان اكەلىپ كورسەتىڭدەر.
بۇل تاپسىرما بالالارعا وتە قىزىقتى بولدى. ساباقتان قايتقان سوڭ بارلىعى وزەن بويىنا بارىپ، تاس تەرەدى. ەرتەسى تاڭەرتەڭ تاستارىن كوتەرىپ مەكتەپكە كەلگەن ولار بۇل ءىس جونىندە قىزۋ اڭگىمەگە كىرىسەدى. ارادا ءبىر كۇن وتەدى. ەرتەسى تاعى ءبىر كۇن وتەدى. ءۇشىنشى كۇن جىلجيدى. كەيبىر وقۋشىلاردىڭ دورباسى تاسقا تولىپ، ءتىپتى كوتەرە الماۋعا اينالادى.
اقىرى ءبىر كۇنى وقۋشىلار بۇل ىسكە قارسى شىعىپ، باس تارتادى. − ءمۇعالىم، تاپسىرماڭىز تىم قيىن ەكەن! − دەيدى ولار رەنجىپ. − وندا قولدارىڭداعى باسقالاردىڭ قىلىعىن كورسەتەتىن تاستاردى تاستاڭدار! − دەيدى ءمۇعالىم جىميىپ. − بوسقا بىرەۋدىڭ كەمشىلىگىن "قىمبات زات" كورىپ، جۇرەككە جۇك قىلىپ ارقالاپ جۇرگەنشە، ونى كەشىرە ءبىلۋدى ۇيرەنىڭدەر. سەبەبى ۋاقىت وتە كەلە كىم بولسا دا بۇل اۋىرلىققا توزە المايدى. كەشىرىمدىلىك − شاتتىققا باستار جول. كەشىرە بىلەتىن ادام ادامگەرشىلىگى مول ادام قاتارىنا جاتادى، − دەيدى.
