تاشكەنتتە ۇلدارى مەن كۇيەۋلەرىن زاڭسىز تۇردە ايىپتادى دەگەن نارازىلىقپەن 6 ايەل وز-وزدەرىن ورتەمەك.
ءوزىن-وزى ورتەۋ اكسياسى 20 قازاندا ساعات 12:00-دە ەۋروپالىق وداقتىڭ وزبەكستانداعى دەلەگاسياسى ورنالاسقان حالىقارالىق بيزنەس-ورتالىعىنىڭ عيماراتىندا وتپەك.
اكسياعا قاتىسۋعا 6 ايەل نيەت ءبىلدىردى: ينوبات ارزييەۆا، شاحنوزا ارزييەۆا، ديلشادا تانگاتاروۆا، بارنو ۆوسييەۆا، ماتليۋبا رۋزييەۆا جانە موحيرا ماننولوۆا.
وزبەكستان قۇقىققورعاۋ اليانسىنىڭ حابارلاۋىنشا، ايەلدەدىڭ كۇيەۋلەرى مەن ۇلدارى 2015-2016 جىلدارى قامالعان، 2016 جانە 2017 جىلدارى ۇلتتىق قاۋپىسىزدىك قىزمەتى مەن ناۆوي ءىىب وتكىزگەن تەرگەۋ بارىسىندا ولار 6 جىلدان 7 جىلعا دەيىن سوتتالعان.
ولارعا ەلدە تىيىم سالىنعان ەكسترەميستىك ۇيىمعا قاتىسى بار دەگەن ايىپ تاعىلدى. اتاپ ايتقاندا، سيرياداعى دايش ۇيىمىنىڭ قاتارىنا سوعىسقا جىبەرەتىن ادامداردى جينادى دەپ ايىپتالدى.
سوتتالعان 16 جاستاعى حاسان ارزييەۆتىڭ اناسى ينوبات ارزييەۆا تەرگەۋ بارىسىندا ۇلىنىڭ ازاپتالعانىن، بەل ومىرتقاسىنىڭ سىنعانىن، بۇگىندە بالداقپەن عانا جۇرە الاتىنىن ايتتى.
ارزييەۆ ساۋىردە تاشكەنت اۋەجايىندا سانكت-پەتەربۋرگتان قايتىپ كەلە جاتقان ۋاقىتىندا ۇستالدى. سول كۇننەن بەرى انا بالاسىن كورمەگەن.
ارزييەۆانىڭ ايتۋىنشا، پوليسەي قىزمەتكەرلەرى ايىپتىلاردى مويىنداتۋ ماقساتىندا جىگىتتەردى سوققىعا جىققان.
شەشىندىرگەن، ەلەكتروشوك پايدالانعان، قوقان-لوقى كورسەتىپ، تۋعان تۋىستارىمەن قورقىتقان. سوت ۇستىندە ايىپتالعان جىگىتتەر ازاپتالعان دەنەلەرىن كورسەتۋگە دايىن بارعان كورىنەدى.
2 قازان كۇنى سوت شەشىم قابىلداپ، جىگىتتەردى 6 جىلدان 7 جىلعا دەيىن باس بوستاندىعىنان ايىردى.
ال ايەلدەر سوتتان ادىلدىكتى كۇتەدى. كوكتەم باستالعالى بىرنەشە ايەل پرەزيدەنت شاۆكات ميرزيەيەۆكە ارىز جازىپ، وزبەكستان باس پروكۋرورى يحتيەر ابدۋللايەۆتىڭ الدىنا بارماقشى بولعان. الايدا بۇل ارەكەتتەرى ناتيجەسىز اياقتالدى.
«ءوز-وزىمىزدى ورتەۋ اكسياسىنان باسقا قولىمىزدان كەلەر شارا جوق»، - دەدى امالى تاۋسىلعان انا.
انالارى مەن ايەلدەرى وزدەرىن قۇربان ەتۋگە دايار ەر ادامداردىڭ ەسىمى تومەندەگىدەي:
- ياحشيمۋرود ۆوسييەۆ
- حاسان ارزييەۆ
- فاررۋح ارزييەۆ
- اديل شوكيروۆ
- سانات ساليموۆ
- دجامشيد سايفۋللايەۆ
- ازامات گايبۋللايەۆ
