قازاقستاننىڭ سىرتقى ىستەر ءمينيسترى قايرات ءابدىراحمانوۆ قىتايدا قيىندىققا تاپ بولعان قازاقتاردىڭ ماسەلەسى قالاي شەشىلىپ جاتقانىن ايتتى، دەپ حابارلايدى Qamshy.kz اقپارات اگەنتتىگى Sputnik قازاقستانعا سىلتەمە جاساپ. 

23 ماۋسىمدا استانادا وتكەن دۇنيەجۇزى قازاقتارىنىڭ V قۇرىلتايىندا گەرمانيادان كەلگەن قازاق ەلباسىعا جۇڭگو ۇكىمەتىنىڭ ونداعى قازاقتارعا قىسىم كورسەتىپ، قانداستارىمىزدىڭ قۇقىقتارىن تاپتاپ جاتقانىن جەتكىزگەن بولاتىن. نۇرسۇلتان نازاربايەۆ بۇل جاعدايدان حابارسىز ەكەنىن ايتىپ، سىرتقى ىستەر مينيسترلىگىنە ماسەلەنىڭ انىق-قانىعىن انىقتاۋدى تاپسىرعان ەدى. 

"جۋىردا وتكەن قازاقتاردىڭ قۇرىلتايىندا ەلباسى نۇرسۇلتان نازاربايەۆ سىرتقى ىستەر مينيسترلىگىنە، باسقا ءتيىستى ۆەدومستۆولارعا ماسەلەلە كوتەرىلسە، ونى ەگجەي-تەگجەي ەكى جاقتى قاراستىرۋ جونىندە ناقتى تاپسىرما بەردى. وسى تاپسىرمانى ورىنداۋ بارىسىندا بىزگە رەسمي تۇردە مالىمەت تۇسسە، مىندەتتى تۇردە جۇڭگو تاراپىمەن، ولاردىڭ سىرتقى ىستەر مينيسترلىگى، باسقا دا مەكەمەلەردەگى ارىپتەستەرىمىزبەن ماسەلەنى كوتەرەمىز. قازاق دياسپوراسىنىڭ شەتەلدەگى مۇددەلەرى مەن قۇقىقتارىن قورعاۋ — بۇل ءبىزدىڭ تىكەلەي مىندەتىمىز"، — دەدى بۇگىن سىرتقى ىستەر ءمينيسترى قايرات ءابدىراحمانوۆ تىلشىلەردىڭ سۇراعىنا بەرگەن جاۋابىندا. 

ول قىتايمەن رەسمي ۇكىمەتارالىق دەڭگەيدە قارقىندى ديالوگ ورناعانىن اتاپ ءوتتى. ايتۋىنشا، ەكى جاقتى كەلىسسوزدەر بارىسىندا بارلىق ماسەلەلەر تالقىلانادى. 

"قۇرىلتاي قورىتىندىسى بويىنشا قىتايداعى قازاقتار، ونىڭ ىشىندە شىڭجاڭ-ۇيعىر اۆتونوميالىق اۋدانىندا رەسمي قۇجاتتار الۋ، شەكارانى كەسىپ ءوتۋ ءۇشىن قولعا ءتولقۇجات الۋ بويىنشا قيىندىقتار كورىپ وتىرعانىن انىقتادىق. قىتايدا مەملەكەتتىك قىزمەتتەگى قازاقتار ءتولقۇجات الا الماي قينالىپ ءجۇر. وسى ماسەلەلەردىڭ ءبارىن ەگجەي-تەگجەي زەردەلەپ، سارالاپ، قىتايلىق ارىپتەستەرىمىزبەن تالقىلاپ جاتىرمىز"، — دەپ ءمالىم ەتتى مينيستر.  

مينيستر ەكى جاقتى كەلىسسوزدەردىڭ كۇن ءتارتىبىن تولىق اشا المايتىنىن ايتتى.