نۇرجان وركەشبايەۆ... بۇل ەسىم سىزگە تاڭسىق بولماس. بەت-الپەتى ەرتە قارتايعان جاس جىگىت. ەسىڭىزگە ءتۇستى مە؟ بىرنەشە جىل بۇرىن كوپشىلىككە تانىلعان، ءتىپتى شەتەلدىك باعدارلامالارعا شاقىرتۋ العان نۇرجان وركەشبايەۆتىڭ ەسىمىن بۇگىندە ءبىرى بىلسە، ءبىرى بىلمەس. 5-6 جىل بۇرىن اتى دۇركىرەپ تۇرعان وركەشبايەۆتىڭ تاعدىرىنا، ومىرىنە الاڭداعان، كوڭىل بولگەن، جاناشىرلىق تانىتىپ، تىلەۋلەس بولعان حالىقتىڭ قاراسى كوپ ەدى. ال بۇگىنگى تاڭدا ەسىمى كوك جاشىكتە دە، الەۋمەتتىك جەلىدە دە اتالماي، كوزدەن عايىپ بولعان جىگىتتىڭ تاعدىرىنا الاڭداپ جاتقان كىم بار؟ كوزدەن كەتسە، كوڭىلدەن دە كەتەدى دەمەكشى، جاي عانا ۇمىت بولعان كەيىپكەرگە اينالدى...
اتىراۋ وبلىسى مۇقىر اۋىلىندا تۇراتىن جاس بالانىڭ ەرتە قارتايىپ بارا جاتقانى تۋرالى جاڭالىق ءبىر كەزدەرى بۇكىل ەلگە تاراعان. الايدا جەرگىلىكتى بيلىك نۇرجاندى رەسەيلىك تانىمال «پۋست گوۆوريات» شوۋ-باعدارلاماسىنا شاقىرىلعان سوڭ عانا ەسىنە الادى. سول ساتتەرگە ءبىر كوز جۇگىرتىپ شىقساق...
نۇرجاننىڭ اۋرۋى جايلى العاش ايتىلا باستاعان 2000 جىلدارى ول نەبارى 10 جاستاعى بالا ەدى. 2001 جىلى رەسەي، گەرمانيا كلينيكالارىنا بارعانىمەن، ەرتە قارتايۋ اۋرۋى تۋرالى دنك ساراپتامالارىنان باسقا كورسەتىلگەن ەم-دوم بولعان جوق. قازاقستاندىق ماماندار دا بۇل جىگىتتىڭ دەنساۋلىعىنا ەتەنە ءمان بەرە قويمادى. سەبەبى وبلىس ورتالىعىنان 250 شاقىرىمعا الشاق ورنالاسقان اۋىلدىڭ قاراپايىم تۇرعىنىن ەلەگەن ەشكىم بولمادى. تەك 2011 جىلى تانىمال باعدارلامادان كەيىن نۇرجاننىڭ جاعدايىنا الاڭداپ، كومەك قولىن سوزعىسى كەلگەندەر كوبەيگەن. سول جىلدىڭ جەلتوقسانىندا نۇرجان وركەشبايەۆقا وپەراسيا جاسالىپ، وتاندىق حيرۋرگتار ەرتە قارتايعان ادامدى 30 جىلعا جاسارتتىق دەپ قۋانىشتى جاڭالىقتارىن بۇكىل الەمگە جار سالىپ، ءسۇيىنشىسىن سۇرادى.
اۋرۋى بالا كۇنىندە بەلگى بەرە باستاعانىمەن، نۇرجاندى رەسەيلىك شوۋ ارقىلى تانىعان وتاندىق باعدارلامالار جىگىتتى شىقىرىپ، سۇحباتتاسىپ ۇلگەردى. الايدا، نۇرجاننىڭ بۇعان رەنىشى قارا قازانداي ەدى. سەبەبى ولاردى جىگىتتىڭ دەنساۋلىعى ەمەس، قارتايىپ كەتكەن تۇر-الپەتى قىزىقتىردى. ال وپەراسيا جاسالعاننان كەيىن كوك جاشىك تە، وركەشبايەۆتىڭ ءوزى دە ءۇنسىز قالدى.
Qamshy.kz اقپارات اگەنتتىگىنىڭ ءتىلشىسى كوزدەن عايىپ بولعان كەيىپكەردى حالىقپەن قايتا قاۋىشتىرۋدى ماقسات ەتتى. بۇگىنگى قال جاعدايى قانداي، سوڭعى جىلدارداعى ءومىرى قالاي وزگەردى، وسى جانە وزگە دە سۇراقتاردىڭ جاۋابىن ءبىلۋ ءۇشىن جۋرناليست نۇرجان وركەشبايەۆتىڭ وزىمەن سۇحباتتاستى.
ەشكىمنەن كومەك سۇرامايمىن...
– ءومىرىڭىز سوڭعى جىلدارى قالاي وزگەردى؟ قازاقتى نەمەن قۋانتاسىز، قازاققا قانداي سىر ايتاسىز؟
قازىرگى تاڭدا الىپ بارا جاتقان وزگەرىس جوق. ءوزىمنىڭ تۋىپ وسكەن اۋىلىمدا ءجۇرمىن. سول باياعى تىرشىلىك...
– دەنساۋلىعىڭىز قالاي؟ ەم الۋدى ءالى دە جالعاستىرىپ كەلەسىز بە؟
ءيا، ءبىراق كەزىندە ەمدەلگەن الماتى جاققا كوپ بارىپ جاتقان جوقپىن. اۋىلدا ەم قابىلداپ ءجۇرمىن. تەكسەرىستەن ءوتىپ تۇرامىن. الايدا دەنساۋلىعىم جاقسى، الاڭداتاتىن ەشنارسە جوق. ءوزىمدى جاقسى سەزىنەمىن.
– حالىقتان نەمەسە جەرگىلىكتى بيلىكتەن كومەك كورسەتىلىپ جاتىر ما؟
جوق، كومەك كورسەتىپ جاتقان ەشكىم جوق، ءوزىم دە ەشكىمنەن كومەك سۇراپ جۇرگەن جوقپىن. بارىنە ءوز كۇشىممەن جەتىپ جاتىرمىن.
– «كومەك كەرەك پە؟» دەپ حابارلاسىپ، جاعدايىڭىزدى سۇراساتىندار ءالى دە بار ما؟
ەلدىڭ اعالارى حابارلاسىپ، جاعدايىمدى سۇراپ تۇرادى. كەز كەلگەن كومەگىن ۇسىنۋعا دايىن. ءبىراق، قازىرگى ۋاقىتتا الىپ بارا جاتقان كومەك كەرەك ەمەس.
اۋىلعا، اتا-اناما كەرەكپىن...
– اتىراۋ بيلىگى سىزگە پاتەر ۇسىنعانى جايلى اقپار تاراعان، الايدا ءسىز قابىل الماپسىز، بۇل قانشالىقتى راس؟
2012-دە پاتەرىمدى الدىم. ءبىراق ءوزىم اۋىلدا تۇرىپ جاتىرمىن. اۋىلدا بولعان سوڭ دەمالىس كۇندەرى قالاعا بارىپ جاتسام، سول پاتەرىمە بارامىن.
–مۇقىر اۋىلىنىڭ بۇگىنگى جاعدايى قانداي؟
اۋىلدىڭ جاعدايى جاقساردى. بۇرىنعىداي سۋ تاسىمايمىز، پەش جاقپايمىز. گاز دا، سۋ دا، جارىق تا ورناتىلدى. قالاعا بارام دەسەڭ، پويىز دا ءجۇرىپ تۇر، تەحنيكاسى دا دامىعان، ءبارى جاقسى. ەڭ باستىسى تازا اۋادا ءومىر ءسۇرىپ جاتىرمىز.
–قازىرگى ۋاقىتتا نەمەن اينالىسىپ ءجۇرسىز؟
مۋزىكا سالاسىندا ءجۇرمىن، تويعا شىعامىن. مۋزىكا اپپاراتىن باسقارامىن.
–تەك تويدا جۇرگەن كورىنەسىز. تويلاردان تاۋىپ جاتقان قاراجاتىڭىز وزىڭىزگە جەتكىلىكتى مە؟
اپتاسىنا كەمىندە 2-3 رەت تويعا شىعامىن. ودان تاپقان قاراجات ءوزىمدى اسىراۋعا تولىقتاي جەتەدى.
تاعدىرىما مويىنۇسىندىم...
–ءبىر سۇحباتىڭىزدا شوۋ-بيزنەستى باعىندىرعىم كەلەدى دەگەن ەدىڭىز. سول قارقىنىڭىز قالاي ءجۇرىپ جاتىر؟
ءيا، بۇرىندارى باستاماسىن باستاپ ەدىك، ءبىراق جالعاسپادى. ءوزىمنىڭ جەكە جاعدايلارىما، شارۋالارىما بايلانىستى بۇل جوسپاردى كەيىنگە قالدىرۋعا تۋرا كەلدى. اۋىلعا، اتا-اناما كومەك كەرەك بولعاندىقتان، وسىندا قايتىپ كەلدىم. ءبىراق ءالى دە ويىمدا تۇرعان جوسپار ەكەنىن ايتقىم كەلەدى.
– بىرنەشە اي بۇرىن ءسىزدىڭ اجىراسقانىڭىز جايلى اقپار ەستىدىك. نۇرجان ۇيلەندى دەگەندى ەستىگەندە حالىق قاتتى قۋانعان بولاتىن. قۋانىشتارىڭىز نەگە ۇزاققا سوزىلمادى؟
اشىپ ايتپاي-اق قويايىن. ارادا ءبىراز كەلىسپەۋشىلىكتەر بولدى. جاي عانا، جاراسپادىق... مەن ەشتەڭەگە وكىنبەيمىن.
– قيىندىققا شىداماي پەندە ومىردەن كۇدەرىن ءۇزىپ، دەپرەسسياعا سالىنىپ كەتەدى. ال ءسىزدى العا جەتەلەپ، رۋح بەرەتىن نە نارسە؟ نەمەسە كىم؟
الدىمەن وزىمە رۋح بەرەتىن مەنىڭ اكە-شەشەم، باۋىرلارىم، اعالارىم مەن ىنىلەرىم. دوستارىم دا جانىمدا. «ەشقاشان مۇڭايما، باسىڭدى تىك ۇستا!» دەپ مەنى قاشان دا قولداپ جۇرەتىن جاقىندارىم بار.
– بولاشاققا جوسپارىڭىز قانداي؟ قانداي ارمانىڭىز بار؟
نەگىزى، كوپ ارماندامايمىن، بولاشاققا دا جوسپار قۇرا بەرمەيمىن. كۇندەلىكتى تىرشىلىكپەن جۇرگەن اداممىن. ارمانداپ، ماقسات قۇرىپ جاتقانىم جوق. ءومىردى قالاي بار، سولاي قابىلدايمىن. تاعدىردىڭ جازعانىنا كونەمىن، ودان باسقا امالىم جوق.
سۇحباتتاسقان: گۇلىم جاقان
پىكىر قالدىرۋ