حيتكە اينالعان «زىڭ-زىڭ» ءانىنىڭ اۆتورى قايتىس بولدى. مۇنداي حاباردى ءانشى سەرىك يبراگيموۆ ءوزىنىڭ ينستاگرام پاراقشاسىندا جەتكىزدى، دەپ جازادى Qamshy.kz اقپارات اگەنتتىگى.

“اسسالاۋماعالەيكۋم، جاقىندار! ايتايىن دەگەنىم، قامشىنىڭ سابىنداي ومىردە سىيلاسىپ وتەيىكشى! قولىمىزدان كەلگەنشە جاقسىلىق جاسايىق، كەلمەسە ۇندەمەيىك! كەشىرىم سۇرايىق، كەشىرەيىك! بۇگىن بارمىز، ەرتەڭ جوقپىز! شىنىندا دا جالعان دۇنيە! ءبىزدىڭ ءسوزىمىزدىڭ، ىستەگەن ءىسىمىزدىڭ، جازعان جازۋمىزدىڭ قايسىسى سوڭعى ەكەنىن اللا عانا بىلەدى! سوندىقتان جاقسى امال جاساپ جۇرەيىكشى! جاماندىق جاسايمىز دەپ، كەلمەيتىن ساپارعا اتتانىپ كەتىپ، وكىنىپ قالمايىقشى!

سۋرەتتە تۇرعان باۋىرىمنىڭ، دوسىمىزدىڭ ەسىمى بولات! ول باۋىرىمىز ەندى ارامىزدا جوق! وتە جاقسى ادام ەدى! كىشىپەيىل، اق كوڭىل جىگىت بولاتىن! باقيلىق بولدى! اللا مەيىرىمىنە السىن! مەيىرىمى شەكسىز اللاxىم ءجانناتتان ورىن بەر! كەشىرىمدى اللا بارشامىزدى كەشىر! يا اللام راقىمىڭا العايسىڭ! اۋمين! دۇعا جاساپ قويىڭىزدار، اعايىن! اللا جار بولسىن، بارشامىزعا!” – دەپ جازدى يبراگيموۆ.

ايتا كەتەيىك، بىرنەشە كۇن بۇرىن Tengrinews.kz پورتالى جاستار اراسىندا كەڭىنەن تارالعان «زىڭ-زىڭ» ءانىنىڭ اۆتورىنىڭ بەلگىلى بولعانىن حابارلاعان. ول كومپوزيتور بولات نۇرىموۆ ەدى. شىمكەنتتە تۋعانىمەن الماتىدا وسكەن جاس جىگىت كوپتەگەن تانىمال انشىلەرگە ءان جازعانىن ايتقان.