استانانىڭ مامانداندىرىلعان اۋدانارالىق قىلمىستىق ىستەر سوتى بۇرىنعى ەكونوميكا ءمينيسترى، كوررۋپسيالىق قىلمىس جاسادى دەگەن كۇدىككە ىلىنگەن قۋاندىق بيشىمبايەۆتىڭ ءىسى بويىنشا الدىن الا سوت تىڭداۋىن باستادى، دەپ حابارلايدى Qamshy.kz اقپارات اگەنتتىگى ازاتتىق راديوسىنا سىلتەمە جاساپ.
الدىن الا سوت تىڭداۋى اسكەري سوت عيماراتىندا ءوتىپ جاتىر.
الدىن الا تىڭداۋ اشىق تۇردە ءوتىپ جاتىر. ءىس بويىنشا بارلىعى 23 ادام سوتقا تارتىلىپ جاتىر. سوتت سۋديا ءادىلحان شايحيسلاموۆ قاراپ جاتىر.
پارا الدى دەگەن كۇدىككە ىلىنگەن بيشىمبايەۆ استانا قالالىق ىشكى ىستەر دەپارتامەنتىنىڭ ۋاقىتشا قاماۋ يزولياتورىندا وتىر. ول قاڭتاردىڭ 10-ى كۇنى "توپ بولىپ الدىن الا ءسوز بايلاسۋ ارقىلى اسا ءىرى كولەمدە بىرنەشە رەت پارا الۋ فاكتىسى" بويىنشا ۇستالعان. ەكى كۇننەن سوڭ ول استانانىڭ الماتى اۋداندىق سوتىنىڭ سانكسياسى بويىنشا قامالىپ، سودان بەرى قاماۋ مەرزىمى بىرنەشە رەت ۇزارتىلعان.
تەرگەۋ مالىمەتىنشە، بيشىمبايەۆ "بايتەرەك" حولدينگىن باسقارىپ تۇرعانىندا قىزىلورداداعى اينەك زاۋىتىن سالۋ كەزىندە "كوررۋپسيالىق قيتۇرقىلىقتار جاساعان".
قازاننىڭ ورتاسىندا جەرگىلىكتى اقپارات اگەنتتىگى كوررۋپسياعا قارسى ءىس-قيمىل ۇلتتىق بيۋروسى دەپارتامەنتى ديرەكتورىنىڭ ورىنباسارى تالعار سەرىكبايەۆقا سىلتەمە جاساپ، قىزىلورداداعى اينەك زاۋىتى قۇرىلىسىن سالۋ كەزىندەگى قارجى جىمقىرۋ تۋرالى قىلمىستىق ءىستى تەرگەۋ اياسىندا مەملەكەتكە "1،2 ميلليارد تەڭگە كولەمىندە شىعىن وتەلگەنىن" حابارلاعان. ال بيۋرو بيشىمبايەۆ وزىنە تاعىلعان ايىپتى مويىندامايتىنىن جانە "شىعىندى وتەۋگە ارالاسپاعانىن" مالىمدەگەن. ءبىراق كەيىن بيشىمبايەۆتىڭ ادۆوكاتتارى بيۋرونىڭ "شىعىن وتەلدى" دەگەن مالىمدەمەسىن تەرىستەگەن. ادۆوكاتتار قىزىلوردا شىنى زاۋىتىنىڭ قۇرىلىسىنا بولىنگەن قاراجات بانك كەپىلىندە بولعانىن، بيۋرو مەردىگەر كومپانيالاردىڭ جەتەكشىلەرىن قاماۋعا الىپ، قۇرىلىس توقتاعان سوڭ بانك كەپىل ەرەجەسى بويىنشا، قۇرىلىس قاراجاتىن قايتارعانىن مالىمدەگەن.
بيشىمبايەۆ ۇلتتىق ەكونوميكا ءمينيسترى قىزمەتىنەن 2016 جىلدىڭ جەلتوقسانىندا كوررۋپسياعا قارسى ءىس-قيمىل ۇلتتىق بيۋروسى "بايتەرەك DEVELOPMENT" ۇلتتىق كومپانياسى قاتىستى تەرگەۋ باستاعان سوڭ بوساتىلعان. كومپانيا بيشىمبايەۆ 2013 جىلدىڭ مامىرىنان 2016 جىلدىڭ مامىرىنا دەيىن باسقارعان "بايتەرەك" حولدينگى قۇرامىنا كىرەدى.
پىكىر قالدىرۋ