قازاقستان پرەزيدەنتى «Rothschild & Co» كومپانياسىنىڭ باسشىلارى ەريك دە روتشيلدپەن، كلاۋس مانگولدپەن جانە دجوۆانني سالۆەتتيمەن كەزدەستى، دەپ جازادى Qamshy.kz اقپارات اگەنتتىگى. بۇل تۋرالى اقوردانىڭ باسپا ءسوز قىزمەتى حابارلادى.

مەملەكەت باسشىسى «روتشيلد» كومپانياسىنىڭ قارجى سەكتورىنداعى جۇمىس تاجىريبەسى مول جانە حالىقارالىق بەدەلى بيىك ەكەنىن اتاپ ءوتتى.

– «روتشيلد» كومپانياسى – الەمدەگى ەرتەدەن كەلە جاتقان ءىرى قارجى ينستيتۋتتارىنىڭ ءبىرى. سىزدەردىڭ جەكە كاپيتال سالىمشىلارمەن جۇمىس جونىندەگى تاجىريبەلەرىڭىز مول. بۇل تاجىريبە ءبىزدىڭ ەلىمىز ءۇشىن دە ماڭىزدى. سول سەبەپتى ءقازىر قازاقستاننىڭ ۇلتتىق بانكىنە كەڭەس بەرىپ وتىرسىزدار، – دەدى نۇرسۇلتان نازاربايەۆ.

ەريك دە روتشيلد قازاقستان پرەزيدەنتىنە كەزدەسۋگە مۇمكىندىك تۋعىزعانى ءۇشىن العىس ايتىپ، ەلىمىزدىڭ قارقىندى دامىپ كەلە جاتقانىنا قىزىعا قارايتىنىن جەتكىزدى.

– بۇل – مەنىڭ قازاقستانعا العاشقى ساپارىم. سوڭعى ەكى كۇندەگى اسەرلەرىم وتە جاقسى. ءسىزدىڭ ارقاڭىزدا بولاشاقتا ەلىڭىز جوعارى قارقىنمەن داميتىن بولادى. قازاقستان گەوگرافيالىق تۇرعىدان ۇتىمدى جەردە ورنالاسقان. ول ازيا مەن ەۋروپا اراسىنداعى كوپىر بولىپ سانالادى. ءسىزدىڭ ەكونوميكانى ءارتاراپتاندىرۋعا، ونەركاسىپتى دامىتۋعا جانە شيكىزاتتىق ەكونوميكادان باس تارتۋعا جەتەلەگەن ۇردىستەردى ايقىنداي العان كورەگەن قادامىڭىز مەنى ءتانتى ەتتى، – دەدى كومپانيانىڭ ديرەكتورلار كەڭەسىنىڭ ءتوراعاسى ەريك دە روتشيلد.