رەسەي پرەزيدەنتى ۆلاديمير پۋتين تەگەرانداعى رەسمي ساپارى بارىسىندا 2015 جىلى يرانمەن جاساعان يادرولىق كەلىسىمدى قولدايتىنىن ايتىپ، سيريا قاقتىعىسى ماسەلەسىندە يرانمەن ىنتىماقتاستىققا وڭ كوزبەن قارايتىنىن مالىمدەدى، دەپ جازادى Qamshy.kz اقپارات اگەنتتىگى.

پۋتين يران استاناسىنا 1 قاراشادا رەسەي، ءازىربايجان جانە يران ەلدەرى اراسىنداعى ساۋدا، ترانسپورت جانە ەنەرگەتيكا سالالارىنداعى ىنتىماقتاستىق ماسەلەلەرى بويىنشا كەلىسسوزدەر جۇرگىزۋگە كەلگەن.

الايدا ءپۋتيننىڭ يران پرەزيدەنتى حاسسان روۋحانيمەن جانە رۋحاني كوسەم اياتوللا ءالي حامەنەيمەن اراسىنداعى كەلىسسوزىندە يران مەن الەمدىك دەرجاۆالار اراسىندا جاسالعان يادرولىق كەلىسىم جانە سيرياداعى ازاماتتىق سوعىس ماسەلەسى دە قوزعالدى.

رەسەي – تەگەرانداعى يادرولىق باعدارلامانى توقتاتۋ ماقساتىندا تاريحي يادرولىق كەلىسىمگە قول قويعانداردىڭ ءبىرى. اقش پرەزيدەنتى دونالد ترامپ وتكەن ايدا يرانمەن جاسالعان كەلىسىمدەگى “سالماقتى كەمشىلىكتەر” تۇزەلمەسە، ونى قابىلداۋدان باس تارتاتىنىن مالىمدەگەن. ەۋروپا وداعى مەن كەلىسىمگە قاتىسقان باسقا دا ەلدەر - رەسەي، ۇلىبريتانيا، جۇڭگو، فرانسيا مەن گەرمانيا ترامپتى اقش-تى كەلىسىمنەن شىعارماۋعا شاقىرعان.

. سيريا تۋرالى ايتقان پۋتين يرانمەن وسى سالا بويىنشا ىنتىماقتاستىقتى "وتە ناتيجەلى" دەپ باعالاعان. ءپۋتيننىڭ سوزىنشە، ماسكەۋ مەن تەگەران "سيريا ماسەلەسىندە ءوز ۇستانىمدارىن ۇيلەستىرە الدى".