بۇگىن ق ر پرەمەر-مينيسترى باقىتجان ساعىنتايەۆ تاشكەنتتە تاۋەلسىز مەملەكەتتەر دوستاستىعىنىڭ ۇكىمەتتەرى باسشىلارى كەڭەسىنىڭ وتىرىسىنا قاتىستى، دەپ حابارلايدى ق ر ۇكىمەتىنىڭ باسپا ءسوز قىزمەتى.
شارا قارساڭىندا، 2 قاراشا كۇنى كەشكە، باقىتجان ساعىنتايەۆ وزبەكستان رەسپۋبليكاسىنىڭ پرەزيدەنتى شاۆكات ميرزيويەۆپەن كەزدەستى. كەزدەسۋ بارىسىندا ساۋدا-ەكونوميكالىق ىنتىماقتاستىقتى دامىتۋ جانە كولىك-ترانزيتتىك، اۋىل شارۋاشىلىعى، ەنەرگەتيكا سالالارىنداعى بىرلەسكەن جوبالاردى ىسكە اسىرۋ ماسەلەلەرى تالقىلاندى.
شاعىن قۇرامداعى وتىرىس اياسىندا ەكونوميكالىق ءوزارا ءىس-قيمىل مەن تمد-عا قاتىسۋشى ەلدەردىڭ ساۋدا-ەكونوميكالىق قارىم-قاتىناسىن نىعايتۋعا جاعدايلار جاساۋ بويىنشا وزەكتى ماسەلەلەر تالقىلاندى. سونىمەن قاتار ساۋدا كەدەرگىلەرىن ودان ءارى ازايتۋ مەن ساۋدا مەن كووپەراسيا الەۋەتىن اشۋعا قاتىستى شارالار قارالدى.
كەڭەيتىلگەن قۇرامدا وتكەن وتىرىستا ۇكىمەتتىك دەلەگاسيالاردىڭ باسشىلارى تمد ەركىن ساۋدا ايماعى تۋرالى كەلىسىمشارتتىڭ ىسكە اسىرىلۋ بارىسىن، مۇناي-گاز ماشيناسىن جاساۋ، جەردى مەليوراسيالاۋ، تاۋارلاردىڭ كەدەندىك قۇنىنا باقىلاۋ ورناتۋ، حالىقارالىق كارتەلدەرگە ءوزارا ءتيىمدى ءىس-قيمىل شارالارىن دامىتۋ جانە ت. ب. ماسەلەلەردى قارادى. سونداي-اق، ۇيىمداستىرۋشىلىق سيپاتتاعى ءبىرقاتار قۇجاتتار تالقىلاندى.
بۇدان وزگە، تمد ۇكىمەتتەرى باسشىلارى كەڭەسىنىڭ كەزەكتى وتىرىسىن 2018 جىلدىڭ كوكتەمىندە تاجىكستان رەسپۋبليكاسىندا وتكىزۋ تۋرالى شەشىم قابىلداندى. ق ر پرەمەر-مينيسترى باقىتجان ساعىنتايەۆ ءور پرەمەر-مينيسترى ابدۋللا اريپوۆپەن قازاقستان مەن وزبەكستان پرەزيدەنتتەرى اراسىنداعى كەلىسىمدەردى ىسكە اسىرۋ ماسەلەلەرى بويىنشا كەزدەسۋ وتكىزدى. تاراپتار ەكىجاقتى ىنتىماقتاستىقتى دامىتۋ، ءوڭىرارالىق ءوزارا ءىس-قيمىلدى، اسىرەسە شەكارا ماڭى اۋماقتارىندا كۇشەيتۋ ماسەلەلەرىن تالقىلادى. تاۋار اينالىمى كولەمىن ۇلعايتۋعا ەرەكشە كوڭىل ءبولىندى.
سونداي-اق، ماشينا جاساۋ جانە اۆتوموبيل قۇراستىرۋ، ازاماتتىق اۆياسيا، فارماسيەۆتيكا سالالارىندا ينۆەستيسيالىق ءوزارا بايلانىستى كەڭەيتۋ، كولىك-ترانزيتتىك ينفراقۇرىلىمدى دامىتۋ شارالارى، سونىمەن قاتار اسكەري-تەحنيكالىق جانە اەروعارىش سالالارىنداعى بىرلەسكەن جۇمىستاردىڭ كەلەشەگى قارالدى.
تاشكەنتتەگى تاۋەلسىز مەملەكەتتەر دوستاستىعىنىڭ ۇكىمەتتەرى باسشىلارىنىڭ كەڭەسى وتىرىسىنىڭ قورىتىندىسى بويىنشا ءبىرقاتار قۇجاتتارعا قول قويىلدى، ولاردىڭ ىشىندە: تمد-عا قاتىسۋشى مەملەكەتتەردە تاۋارلاردىڭ كەدەندىك قۇنىن انىقتاۋ جانە باقىلاۋعا قاجەتتى اقپاراتپەن الماسۋ تۋرالى كەلىسىم؛ تمد اياسىندا تەرروريزممەن جانە ەكسترەميزمنىڭ وزگە دە كۇشتەۋ شارالارىمەن، سونداي-اق، ولاردى قارجىلاندىرۋمەن كۇرەس سالاسىندا اقپاراتپەن الماسۋ تۋرالى كەلىسىم؛ تمد-عا قاتىسۋشى مەملەكەتتەردىڭ جەردى مەليوراسيالاۋ سالاسىنداعى ىنتىماقتاستىعىنىڭ تۇجىرىمداماسى جانە ونى ىسكە اسىرۋ بويىنشا ءبىرىنشى كەزەكتى شارالاردىڭ جوسپارى؛ تمد-عا قاتىسۋشى مەملەكەتتەردىڭ مۇناي-گاز ماشيناسىن جاساۋ سالاسىنداعى ىنتىماقتاستىعىنىڭ تۇجىرىمداماسى جانە ونى ىسكە اسىرۋ بويىنشا ءبىرىنشى كەزەكتى شارالاردىڭ جوسپارى؛ تمد-عا قاتىسۋشى ەلدەردە 2020 جىلعى كەزەڭدە حالىق ساناعىن جۇرگىزۋگە دايارلىق بارىسى تۋرالى؛ 2020 جىلعا دەيىن تمد-عا قاتىسۋشى ەلدەردە مەديسينالىق-الەۋمەتتىك كومەك كورسەتۋدى جانە جەرگىلىكتى شيەلەنىستەرگە قاتىسقان سوعىس ارداگەرلەرى مەن ولاردىڭ وتباسى مۇشەلەرىنىڭ ءومىر ساپاسىن ارتتىرۋدى ودان ءارى دامىتۋدىڭ نەگىزگى باعىتتارىن ىسكە اسىرۋ بويىنشا شارالار جوسپارىن 2018 جىلى قارجىلاندىرۋ تۋرالى.
بۇدان وزگە، تمد-دا تاۋارلاردىڭ شىعارىلعان ەلىن انىقتاۋ ەرەجەلەرى تۋرالى، حالىقارالىق اۆتوكولىك تاسىمالداۋشىلارىنىڭ كاسىبي بىلىكتىلىگى مەن قوسىمشا وقىتىلۋىنا تالاپتاردىڭ ۇيلەسىمدىلىگى تۋرالى، مەملەكەتتەردىڭ ۇيلەستىرۋشىلىك كولىك كەڭەستەرى تۋرالى كەيبىر كەلىسىمدەرگە وزگەرىستەر ەنگىزىلدى.
ايتا كەتەيىك، بيىل قازاقستان مەن وزبەكستان اراسىنداعى ديپلوماتيالىق قارىم-قاتىناستىڭ ورناعانىنا 25 جىل تولادى. 2018 جىلى قازاقستاندا وزبەكستان جىلى وتەدى. ەكى ەل اراسىنداعى سىرتقى ساۋدا اينالىمى 2017 جىلدىڭ سەگىز ايىندا $1،2 ملرد (ەكسپورت - $747 ملن) قۇرادى، وتكەن جىلدىڭ وسى كەزەڭىندەگى ءوسىم كورسەتكىشى 31% قۇرادى.
