قازاقستان ۇكىمەتى قىرعىزستاندى ەاەو اياسىنداعى ءوز مىندەتتەرىن ايقىنداۋعا شاقىردى، دەپ حابارلايدى Qamshy.kz اقپارات اگەنتتىگى قازاقپاراتقا سىلتەمە جاساپ.
ەسكە سالا كەتەيىك، تاشكەنتتە ءوتىپ جاتقان تمد ۇكىمەت باسشىلارى كەڭەسىنىڭ كەڭەيتىلگەن وتىرىسىندا قىرعىز پرەمەرى ساپار يساكوۆ قازاقستاننىڭ قىرعىز رەسپۋبليكاسىنا قاتىستى 2011 جىلعى 18 قازانداعى تمد-نىڭ ەركىن ساۋدا ايماعى تۋرالى شارتىن تولىق ورىنداماعانىن ايتىپ، وقىس مالىمدەمە جاساعان بولاتىن.
«قازاقستان ۇكىمەتى قىرعىز تاراپىنىڭ مالىمدەمەسىن ورىنسىز دەپ سانايدى. اتالعان ماسەلە بويىنشا ءبىزدىڭ مەملەكەتتىك ۇستانىم بارشاعا ءمالىم. ول ەۋرازيالىق ەكونوميكالىق وداق ەلدەرىنىڭ ورتاق ەكونوميكالىق كەڭىستىگىن قۇرۋ يدەولوگياسىنا تولىق سايكەس كەلەدى جانە وداققا قاتىسۋشى-ەلدەردىڭ ەكونوميكالىق شىعىندارى مەن قاۋىپ-قاتەرلەرىن ازايتۋعا باعىتتالعان»، - دەدى ق ر پرەمەر-مينيسترى باقىتجان ساعىنتايەۆ تاشكەنتتە وتكەن تمد ۇكىمەت باسشىلارى كەڭەسىنىڭ وتىرىسىندا. اتالعان جيىندا قازاقستان-قىرعىز شەكارا اۋماعىنداعى باقىلاۋ ماسەلەلەرى تالقىلانعان بولاتىن.
«ءبىز قىرعىزستان ۇكىمەتىن ەۋرازيالىق ەكونوميكالىق وداق اياسىنداعى ءوز مىندەتتەرىن راستاۋعا جانە قىرعىز رەسپۋبليكاسىنىڭ ءوز مىندەتتەمەلەرىن يمپلەمەنتاسيالاۋعا شاقىرامىز. بۇل تاقىرىپتى ۇنەمى اشىق ايتىپ كەلەمىز جانە مالىمدەمەمىزدىڭ قىرعىزستاندىق ارىپتەستەرىمىزگە جەتكەنىن قالايمىز»، - دەدى ب.ساعىنتايەۆ.
سونداي-اق، پرەمەر-مينيستر قازاقستان ۇكىمەتىنىڭ قىرعىزستاندىق تاراپتىڭ سىندارلى ۇستانىمىنا ءۇمىت ارتاتىنىن اتاپ ءوتتى.
