ءسوزدىڭ مارجانىن سازبەن جەتكىزەتىن ناعىز دالا ونەرپازدارىن انىقتايتىن «تەكتى ءسوزدىڭ تورەسى – تەرمە» بايقاۋى مارەسىنە جەتتى،-دەپ جازادى Qamshy.kz اقپارات اگەنتتىگى. 

قازاقستان رەسپۋبليكاسى مادەنيەت جانە سپورت مينيسترلىگىنىڭ تىلدەردى دامىتۋ جانە قوعامدىق-ساياسي جۇمىس كوميتەتىنىڭ تاپسىرماسىمەن ش.شاياحمەتوۆ اتىنداعى تىلدەردى دامىتۋدىڭ رەسپۋبليكالىق ۇيلەستىرۋ-ادىستەمەلىك ورتالىعى ۇيىمداستىرعان ءداستۇرلى بايقاۋ ساتبايەۆ قالاسىندا ءوتتى.

رەسپۋبليكالىق بايقاۋدا استانا، الماتى قالالارى مەن 14 ايماقتىڭ جىر دۇلدىلدەرى ب ا ق سىنادى. تەكتى ونەردىڭ ناسيحاتشىلارى بايقاۋ بارىسىندا ەل بىرلىگى مەن الاش ءۇشىن ايتۋلى وقيعا الاشوردانىڭ 100 جىلدىعىن جىرعا قوستى. انا ءتىلدىڭ تاعدىرىن ايتىپ، تىڭدارماننىڭ كوڭىلىندەگىن ءدوپ باستى.

كومەيىنە بۇلبۇل ۇيالاعان ونەرپازداردىڭ شەبەرلىگىن ايتىس اقىندارى مەن جىرشى-تەرمەشىلەردىڭ حالىقارالىق وداعىنىڭ ءتوراعاسى، ق ر ەڭبەك سىڭىرگەن قايراتكەرى ءجۇرسىن ەرمان (ءتوراعا)، قازاقستاننىڭ حالىق اقىنى قونىسباي ءابىل، جىرشى، ق ر ەڭبەك سىڭىرگەن قايراتكەرى ەلميرا جاڭابەرگەنوۆا، جىراۋ، جىرشى مۇقاش قوجاحمەتوۆ جانە ماڭعىستاۋ جىرشىلىق مەكتەبىنىڭ وكىلى اماندىق كومەكوۆ باعالادى.

بايقاۋ قورىتىندىسى بويىنشا باس جۇلدەنى اتىراۋلىق گۇلدانا تايىروۆا يەمدەندى. ال ءبىرىنشى ورىن شىنبولات دىلدەبايەۆتىڭ «شىڭىراۋدا شىڭدالۋمەن كەلەمىن...» تەرمەسىن ناقىشىنا كەلتىرىپ ورىنداعان اينۇر قونىسبايەۆاعا بۇيىردى. جۇلدەلى ەكىنشى ورىندى سىر مەكتەبىنىڭ تۇلەگى مارات سۇگىرباي ەنشىلەسە، ءۇشىنشى ورىندى ماڭعىستاۋدىڭ مارعاسقاسى تەمىربەك اسقامبايەۆ پەن پاۆلودارلىق تالعات بلانكين ءوزارا ءبولىستى.

بايقاۋ جۇلدەگەرلەرى مەن جەڭىمپازدارىنا ارنايى ديپلوم مەن قوماقتى قارجىلاي سىيلىق تابىستالدى. ال بارلىق قاتىسۋشىلارعا ۇيىمداستىرۋشىلار تاراپىنان العىسحاتتار ۇسىنىلدى.