الماتى اكىمدىگىندە قالاعا ەت تاسىمالداۋ ماسەلەسى تالقىلاندى.

الماتى اكىمىنىڭ ورىنباسارى الماس مادييەۆ پەن شىعىس قازاقستان وبلىسى اكىمىنىڭ ورىنباسارى شالقار بايبەكوۆ ەكىجاقتى ىنتىماقتاستىقتى ارتتىرۋ بويىنشا كەلىسىمگە كەلدى.

«بۇگىنگى تاڭدا شىعىس قازاقستان وبلىسىندا 28 مىڭ باس ءىرى قارا ۇستايتىن 96 بورداقىلاۋ الاڭى بار. مۇندا كانادا، اقش جانە اۆستراليانىڭ «Angus»، «گەرەفورد»، «Charolais» تۇقىمدى ەتتى مالدارى سويىلادى. وسىعان بايلانىستى، شقو-دان ساپالى ەت تاسىمالداۋ ءۇشىن ديستريبيۋتورلىق ورتالىق اشۋ ماسەلەسىن تالقىلادىق. بۇل شقو-نىڭ ەت برەندىن قالىپتاستىرۋعا سەپتىگىن تيگىزبەك» - دەدى شقو اكىمىنىڭ ورىنباسارى شالقار بايبەكوۆ.

شىعىس قازاقستان وبلىسىنىڭ دەلەگاسياسى الماتى كاسىپكەرلەرىنە مەملەكەتتىك قولداۋ تەتىكتەرىن ۇسىندى. وسىلايشا، كاسىپكەرلەرگە ساتىپ الىناتىن جابدىق پەن كولىك قۇنىنىڭ 50% وتەلەتىن بولادى. مەملەكەتتىك بيۋدجەت قاراجاتى ەسەبىنەن كاسىپورىن ينفراقۇرىلىممەن قامتاماسىز ەتىلەدى جانە جەر تەلىمدەرىن ءبولۋ مەن تىركەۋ بويىنشا كومەك كورسەتىلەدى.

بۇل جوباعا الماتىلىق «يسكب» كومپانياسى ينۆەستيسيا سالۋعا ءازىر.

بۇل كومپانيا الاكول كولىنىڭ جاعاسىندا مەيرامحانا سالعان.

كاسىپكەر شىعىس قازاقستان وبلىسىندا مال سويۋ ورنىن اشۋ جانە ءسۇتتى تەرەڭ وڭدەۋ ارقىلى ءسۇت فەرماسىن سالۋعا دايىن. دايىن ءونىمدى كاسىپورىن ءوزىنىڭ مەيرامحاناسىنا جانە الماتى نارىعىنا جەتكىزۋدى جوسپارلاپ وتىر.

بۇدان باسقا ءوڭىرارالىق ىنتىماقتاستىق اياسىندا شىعىس قازاقستان وبلىسىنان الماتىعا جەتكىزىلەتىن اۋىل شارۋاشىلىعى ءونىمى كولەمىنىڭ ارتىپ كەلە جاتقاندىعى ايتىلدى.

الماتى كاسىپكەرلىك جانە يندۋستريالدى-يننوۆاسيالىق دامۋ باسقارماسى تاراتقان اقپاراتقا سايكەس، 2016 جىلى 416 توننا، ال 2017 جىلى 1000 توننا ءسۇت ءونىمى جەتكىزىلگەن.