«ەلباسى كۋرستاستارى» قورى بۇگىندە پرەزيدەنتىمىز نۇرسۇلتان ءابىش ۇلى نازاربايەۆتىڭ جۇرگىزىپ وتىرعان ساياساتىن ناسيحاتتاۋ، ەل مەن ەلباسى اراسىندا دانەكەر بولۋ باعىتىندا ءبىرقاتار جۇمىستار اتقارۋدا. قور جۇمىسىنىڭ باسى-قاسىندا جۇرگەن ەلباسىمىزدىڭ كۋرستاسى ەرمەنتاي ساپاربايەۆپەن بولعان سۇحباتىمىزدا ەل جايى، ەلباسىنىڭ عيبراتتى ءومىرى تۋرالى اڭگىمە قوزعادىق.

—ءوزىڭىزدى ەلباسىنىڭ كۋرستاسى رەتىندە تانيمىز. سول تانىستىعىڭىز تۋرالى ايتا وتىرساڭىز.

دنەپرەدزەرجنيسك قالاسىنا كومسومولدىق جولدامامەن باردىق. ءبىر اپتا وتكەننەن كەيىن ءبىزدى ماماندىقتارعا ءبولدى. نۇرەكەڭ شويىن قورىتۋشى ماماندىعىن تاڭدادى. مەن شويىنشى بولدىم. ءتورت جىل بويى بىرگە جۇمىس ىستەدىك.

1961 جىلى اكەم قايتىس بولىپ، ەلگە قايتتىم. اكەمدى جەر قوينىنا تاپسىرىپ، جىلىن وتكىزىپ بولعاننان كەيىن نۇرەكەڭە حات جازدىم. «وسىلاي دا وسىلاي جاعدايمەن ەلگە كەتىپ ەدىم. ەندى قايتا ورالسام بولا ما؟» دەگەن ءوتىنىشىمدى جەرگە قالدىرمادى. جانىنا جۇمىسقا الدى. سودان ءتورت جىل بىرگە جۇمىس ىستەدىك.

نۇرەكەڭ قامقور، ۇيىداستىرۋ شەبەرلىگى كەرەمەت. «جىگىتتەر، جۇمىستى دۇرىس ىستەيىك. ءتارتىپتى بولايىق. ءبىزدى قازاقستان كۇتىپ وتىر» دەيتىن. كومسومول جۇمىسىندا دا بەلسەندى بولدى.

—بولاشاق پرەزيدەنتتى سول كەزدە انىق تاني الدىڭىزدار ما؟

نۇرەكەڭنىڭ دارىن-قابىلەتىنىڭ ەرەكشە ەكەندىگىن سول كەزدەگى قاتار جۇرگەن ازاماتتاردىڭ بارلىعى بايقادى. كوشباسشىلىق، ۇيىمداستىرۋشىلىق قابىلەتىنە، العىرلىعىنا، كورەگەندىگىنە ءتانتى بولاتىنبىز. كۇنى بۇرىن بارلىعىن ويلاستىرىپ قوياتىن. ىسىراپقا جول بەرمەيتىن.

—ءوزىڭىز تۋرالى اقپارات بەرە كەتسەڭىز.

اكەم شارۋا بولعان. كەيىن بىرنەشە جىل لەڭگىر قالاسىنىڭ شاحتاسىندا جۇمىس ىستەدى. وعان دەيىن ۇجىمداستىرۋ جىلدارىندا كەڭەستىك شارۋاشىلىقتى ورناتۋعا كوپ كومەگىن تيگىزگەن. مالدى اسىلداندىرۋ جۇمىستارىنا ارالاسقان. شاحتاعا دا زور ەڭبەك سىڭىرگەن. شاحتانىڭ جىلقىلارىن ماعان باقتىردى. سوندا شاحتاداعى جۇمىسىنىڭ شەت جاعاسىن ءبىلىپ وستىك. ماماندىق تاڭداۋىما دا سول كىسىنىڭ اقىل-كەڭەسى كوپ اسەر ەتتى.

—ەلباسى ساياساتىن ونىڭ كۋرستاس دوستارى قانشالىقتى قولداپ ءجۇر؟

ەلباسى ساياساتى ەلدىڭ بۇگىنگى تىنىس، تىرشىلىگىنەن انىق كورىنىپ تۇر عوي. قازاق بالاسى بۇرىن باستان وتكەرمەگەن كۇندەر كەشىپ وتىر. ءوندىرىس تە، ءعىلىم-بىلىم دە ءوز رەتىمەن دامىپ جاتىر. جيىنداردا، كەزدەسۋلەردە ەلباسىنا ەلدىڭ جاعدايىن جەتكىزىپ، ەل ىشىندەگى احۋالدان حاباردار ەتىپ تۇرامىز. ەلباسى دا كوڭىلىندەگى سۇراقتارىن قويىپ، ويىمىزدى ءبىلدى. ونداي جيىنداردا جەكە باسىمىزدىڭ جاعدايىن سۇراپ جاتسا دا اڭگىمەمىز نەگىزىنەن ەل جايىندا بولادى. وسى تۇرعىدان العاندا نۇرەكەڭە بارلىق زامانداستارى تىلەكشى، ەلىمىزدىڭ تىنىش بولۋىن، وسى باعىتىمەن دامي بەرگەنىن قالايمىز.

سۇحباتتاسقان: ەرلان تولەۋباي