قمدب-نىڭ ءتوراعاسى، باس ءمۇفتي ەرجان قاجى مالعاجى ۇلى وڭتۇستىك قازاقستان وبلىسى، ورداباسى اۋدانى، شۇبارسۋ ەلدى مەكەنىندە كوپ بالالى 4 اناعا ءۇيدىڭ كىلتىن تابىس ەتتى،- دەپ جازادى Qamshy.kz اقپارات اگەنتتىگى. 

شارانى قازاقستان مۇسىلماندارى ءدىني باسقارماسىنىڭ وڭتۇستىك قازاقستان وبلىسى بويىنشا وكىلدىگى مەن وبلىستىق «زەكەت» قورى بىرلەسىپ ۇيىمداستىرعان بولاتىن.  

«ءدىني باسقارما جاعدايى تومەن، كوپ بالالى، التىن قۇرساقتى انالار مەن ءومىر تاۋقىمەتىن تارتقان وتباسىلارعا ءۇي سالىپ بەرۋ جۇمىسىن ءداستۇرلى تۇردە جۇرگىزىپ كەلەدى. بيىلعى جىلى وڭتۇستىكتە 8 ءۇي سالىندى. بۇل شارالارعا ءدىن قىزمەتكەرلەرى مەن جەرگىلىكتى قولى اشىق جومارت جاندار دەمەۋشىلىك جاسادى. مۇنداي يگى ىستەر جىل سايىن جالعاسىن تاباتىن بولادى»، دەپ اتاپ ءوتتى باس ءمۇفتي.

قمدب ءتوراعاسى قايىرىمدىلىق شارا كەزىندە 4 وتباسىعا ازىق-تۇلىك، ءۇي جيھازدارى مەن وزگە دە تۇرمىستىق زاتتاردى تارتۋ ەتتى.

جالپى، ءاربىر وتباسىعا بولىنگەن جەر تەلىمى 8 سوتىق، سالىنعان ءار ءۇيدىڭ كولەمى 120 شارشى مەتر. اۋىز سۋمەن قامتاماسىز ەتۋ ماقساتىندا 280 مىڭ تەڭگەگە ءار ۇيگە قوسىمشا جەراستى قۇدىق سۋى تارتىلدى. سونىمەن قاتار، 273 مىڭ تەڭگەگە ءبىر شاقىرىم جەردەن 15 باعانا ورناتىلىپ، ەلەكتر جارىعى تارتىلدى. سالىنعان ءار جەكە ۇيگە 7 ملن تەڭگە  كولەمىندە قاراجات جۇمسالدى.

باس ءمۇفتي اسىل ءدىنىمىزدىڭ وركەندەۋىنە جان-جاقتى ۇلەس قوسىپ، حالىقتىڭ الەۋەتىن كوتەرۋگە اتسالىسىپ كەلە جاتقان جەرگىلىكتى قايىرىمدى جاندارعا ايرىقشا العىسىن جەتكىزدى.