الماتىدا مەديا-قاۋىمداستىق وكىلدەرى جوو-لاردا جۋرناليست مامانداردى دايىنداۋ ماسەلەسىن تالقىلادى، دەپ Qamshy.kz اقپارات اگەنتتىگى قازاقپاراتقا سۇيەنە وتىرىپ جازادى. 

مامانداردى دايارلاۋ ماسەلەسىن «مەديااليانس» قوعامدىق بىرلەستىگىنىڭ تەڭ قۇرىلتايشىسى ارمان شورايەۆ كوتەردى. «جۋرناليستيكا سالاسى دەپرەسسيادا. كاسىبي بىلىكتى ماماندار جوقتىڭ قاسى.

قازۇۋ-دان باسقا ۋنيۆەرسيتەتتەردە جۋرناليستيكا فاكۋلتەتتەرىن جابۋ كەرەك. باسقالارى تالابى، دارىنى جوق مامانداردى شىعارىپ جاتىر. تەك قازۇۋ-دان شىققان ساناۋلى ازاماتتاردى عانا مىقتى جۋرناليست دەپ ايتۋعا بولادى، قالعانى ءمۇعالىم، وقىتۋشى بولا الادى»، - دەدى ارمان شورايەۆ.

ونىڭ ايتۋىنشا، باتىستا مىقتى جۋرناليستەر بەلگىلى ءبىر سالانى وقىپ زەرتتەيدى. ماسەلەن بىلىكتى زاڭگەر سول سالادا جازاتىن جۋرناليست بولا الادى. «ق ر ءبىلىم جانە عىلىم مينيسترلىگى ليسەنزيانى وڭدى-سولدى شاشىپ جاتىر. ول جەردە سىبايلاس جەمقورلىق تا جوق ەمەس.

قوستانايدا جۋرناليستيكانى وقىتاتىن 15-20 پروفەسسور بار ما؟ جۋرناليستيكانى تەك پراكتيكا جۇزىندە ۇيرەنۋگە بولادى»، - دەدى ول. قاتىسۋشىلار، رەسپۋبليكالىق ينتەرنەت باسىلىم جەتەكشىلەرى 4 جىلدا العان ءبىلىم تەز ارادا ەسكىرىپ قالاتىندىعىن ايتتى. حالىقارالىق اقپاراتتىق تەحنولوگيالار ينستيتۋتىنىڭ كافەدرا مەڭگەرۋشىسى ايگۇل نيازعۇلوۆا ايتىلعان سىنعا قارسىلىق ءبىلدىردى.

«ءبىزدى ەشتەڭە وقىتپايدى دەگەن سىن بىزگە اۋىر تيەدى. جۋرناليستيكانى وقىعان ماماننىڭ باسقالاردان ەرەكشەلىگى - تەحنولوگيانى مەڭگەرىپ شىعادى. ەگەر كەي ادامدارعا بەلگىلى ءبىر جوو-لاردىڭ مامان دايارلاۋى ۇنامايتىن بولسا، جالپى وتىرىپ شەشۋ كەرەك»، - دەدى ا.نيازقۇلوۆا.

ق ر بعم وكىلدەرى جۇمىس بەرۋشىلەردىڭ تالابى تىم جوعارى ەكەندىگىن ايتتى. «رەداكسيالار باكالاۆرياتتان دايىن مامان كەلەدى دەپ كۇتەدى. ءبىراق باكالاۆرياتتىڭ ءاۋ-باستاعى مىندەتى - ۇيرەنۋگە ۇيرەتۋ. تۇلەكتەر پراكتيكالىق تاجىريبەمەن عانا مامانعا اينالادى. نارىق پەن ءبىلىم بەرۋ سالاسىنىڭ اراسى الشاقتاپ كەتكەن. ءقازىر بارلىق سالادا مۇمكىندىك بار. جوو-لاردا شەبەرلىك ساعاتتارى وتەدى. جۋرناليستيكا فاكۋلتەتتەرىن ەشكىم جاپپايدى. ونى جاڭعىرتۋ كەرەك»، - دەدى ق ر بعم كەڭەسشىسى مايراش تايكەنوۆا.

ق ر اقپارات جانە كوممۋنيكاسيالار ۆيسە-مينيسترى الان اجىبايەۆ ماماندىعى بويىنشا باعدارلاماشى-فيزيك ەكەندىگىن، ۇلىبريتانيادا ماسس-مەديا كۋرسىن ءتامامداعانىن ايتىپ، جۋرناليست بولۋ ءۇشىن 4 جىل ءبىلىم الۋدىڭ قاجەتى جوقتىعىن اتاپ ءوتتى.

«كوپ جاعدايدا جاڭساق پىكىر ايتىلىپ جاتادى. مەدياكەڭىستىك كۇندە وزگەرىپ كەلەدى. ماسەلەن، وقو-دا 150-دەن استام گازەت-جۋرنال شىعادى. كەي جاعدايدا ولاردىڭ تيراجى رەسپۋبليكالىق باسىلىمداردان اسىپ كەتەدى. ءبىز ورتالىق قالالارعا قاراپ بوي تۇزەمەۋىمىز كەرەك، ينتەرنەتتەن گورى گازەتتەر ءالى دە سۇرانىسقا يە شاعىن قالالار دا بار.

ەڭ باستىسى فاكۋلتەتتەردە وزگەرىپ جاتقان مەدياكەڭىستىكتىڭ تالاپتارىنان قالىپ قويماي، زامان كوشىنە ىلەسىپ وتىرعان ابزال»،-  دەدى ۆيسە-مينيستر. جيىن بارىسىندا ب ا ق باسشىلارى، جوو وكىلدەرى، قوس مينيسترلىك وكىلدەرى جۋرناليست مامانداردىڭ بىلىكتىلىگىن قالاي ارتتىرۋ ماسەلەسىن جان-جاقتى تالقىعا سالدى.