ەلوردالىق كوللەدجدىڭ ستۋدەنتتەرى سۋ تاسقىنىنان زارداپ شەككەن وتباسىعا كومەكتەسۋ ءۇشىن جاپسىرما مەن شوكولاد ساتىپ ءجۇر، — دەپ حابارلايدى Qamshy.kz اقپارات اگەنتتىگى Sputnik قازاقستان سايتىنا سىلتەمە جاساي وتىرىپ.
كوللەدج ستۋدەنتتەرى استانادا باسپاناسىز قالعان وتباسىعا ءۇي سالۋعا قارجى جيناپ جاتىر.
"MeyrimdiAsyladam" قايىرىمدىلىق قورىنىڭ ەرىكتىلەرى قۇرىلىس بريگاداسىمەن ەسەپ ايىرىسۋ ءۇشىن وتكەن-كەتكەن ادامدارعا "شيپى" جاپسىرماسىن ساتۋدا.
قىلىمبەكتىڭ ايتۋىنشا، ول قور تۋرالى ەكسپو كورمەسىندە ەرىكتى رەتىندە جۇمىس ىستەپ جۇرگەندە بىلگەن. ەلورداداعى قوعامدىق تاماقتانۋ جانە سەرۆيس كوللەدجىنىڭ ستۋدەنتى ساباقتان بوس ۋاقىتىندا قايىرىمدىلىقپەن اينالىسۋعا شەشىم قابىلداپتى.
"مۇقتاج ادامعا كومەكتەسكىم كەلىپ جۇرەتىن. بىرەۋگە قول ۇشىڭدى بەرسەڭ، ءلاززات الاسىڭ. ءبىزدىڭ قوردا شوت اشىلعان، تۇراقتى تۇردە ەسەپ بەرىپ تۇرامىز. ەگەر كەڭسەگە 75 مىڭ تەڭگە الىپ بارساق، ول دەرەۋ قۇرىلىس بريگاداسىنىڭ كارتوچكاسىنا اۋدارىلادى"، — دەپ ءتۇسىندىردى قىلىمبەك.
قوردىڭ ەرىكتىلەرى جاپسىرمالاردى قالانىڭ ءار ءتۇرلى بولىگىندە، ادەتتە ساۋدا-ويىن-ساۋىق ورتالىقتارىنىڭ جانىندا ساتادى.
"جالپى بۇل جۇمىستا ەرىكتىلەرگە اقشا تولەنەدى. 12 جاپسىرما ساتساڭ، ەكى مىڭ تەڭگە الاسىڭ. الايدا ءبىز تەگىن جۇمىس ىستەپ جاتىرمىز. ۇيدە كومپيۋتەردىڭ الدىندا وتىرعانشا، ادامدارعا كومەكتەسكەن دۇرىس دەپ ويلايمىن. وقۋعا كەدەرگى كەلتىرمەيدى"، — دەدى ءسوز سوڭىندا قىلىمبەك اتاگەلدييەۆ.
قازىرگى تاڭدا ەرىكتىلەر سۋ تاسقىنىنان كەيىن باسپاناسىز قالىپ، كيىز ۇيدە تۇرىپ جاتقان راۋشان يمانعالييەۆاعا كومەكتەسۋ ءۇشىن قارجى جيناپ جاتىر.
